އަޖައިބުކުރަނިވި މިހިރަ ރީތިކަމަކަށް ބަލާބަލަ

ގިނަ ބައެއްގެ ނަޒަރު މިހާރު ހުއްޓިފައި ހުރީ މި މަންޒަރަށެވެ. ސޯޝަލް މީޑިއާގައި އެތައް ބަޔަކު މި ވީޑިއޯ ޝެއާ ކުރަމުން ދާއިރު އެންމެން ވެސް ބުނަމުންދަނީ އެކައްޗެކެވެ؛ ހާދަހާވާ ފުރިހަމަ އެވެ. ހާދަ ހިތްގައިމެވެ.

މިއީ ހދ. ވައިކަރަދޫގެ އުތުރު ފަރާތު ބަނދަރުމައްޗެވެ. ރާއްޖޭގެ ހިތްގައިމުކަން ދައްކާލުމަށް އެކި ރަށްރަށަށް ދަތުރުކޮށް، ފޮޓޯ އާއި ވީޑިއޯ ނަގަމުން އަންނަ މުހައްމަދު ހައްސާންގެ ލެންސަށް މި މަންޒަރު އެރީ ހަފުތާއެއްގެ ޗުއްޓީއަކަށް އުފަން ރަށަށް ކުރި ދަތުރެއްގަ އެވެ. އޭނާއަށް ފެނުނީ، ފުންކޮަށްފައިވާ ބަނދަރާ މާދުރުނޫން ހިސާބެއްގައި، ރަށުގެ އުތުރު ފަރާތް ޗާލު މުރަކަތަކަކުން ހިކިފައި އޮއްވަ އެވެ. މިއީ ރާއްޖޭގައި ވެސް މާ އާއްމު ނޫން، މޮންޓިޕޯރާގެ މުރަކައިގެ ބަގީޗާ އެކެވެ.

ބޮޑެތި މި މުރަކަތައް އެންމެ ވައްތަރީ، ރީތިކޮށް ފޮޅިލާފައި އިންނަ ފިނިފެންމަލަކާ އެވެ. ގާތް ގާތުގައި، މި މުރަކަތައް މާ ދުރަށް ފެތުރިލާފައި އިން އިރު، އެ ސަރަހައްދުގައި މި ނޫން ބާވަތުގެ ގަލެއް ނެތެވެ. ރަށުގެ ބޭރު ތޮއްޓާ ހަމައަށް ވެސް އޮތީ މި މުރަކަތައް ފެތުރިފަ އެވެ. އެހެންވެ، މުޅި މަންޒަރު ސިފަ ވަނީ ހަމަ މުރަކައިގެ ފިނިފެންމަލުގެ ބަގީޗާއެއްގެ ގޮތަށެވެ.

"ރަށަށް ދާން އުޅެން ހެދީމަ ރައްޓެއްސަކު ބުނި މިތަން ބަލާލަން ދައްޗޭ. ވަރަށް ރީތިވާނެއޭ،" ހައްސާން ބުންޏެވެ.

"އެކަމަކު މިހާ ރީތިވާނެ ކަމަކަށް ހިޔެއް ނުކުރަން."

ކުޑައިރުގެ ގިނަ ދުވަސްތަކެއް ހޭދަކުރި އަމިއްލަ ފަސްގަނޑަށް ވިޔަސް، އެ މަންޒަރު އޭނާ ދުށީ އަދި އަލަށެވެ. ވައިކަރަދޫގެ ބައެއް މީހުން ބުނާގޮތުގައި މިއީ ކުރިން އެ ރަށުގައި ހުންނަ އެއްޗެއް ނޫނެވެ. މުރަކަތައް އެތަނުގައި އުފެދި އާލާވާން ފެށީ، ބައެއް މީހުންގެ ބަހުން ނަމަ 2020 ވަނަ އަހަރުގެ ފަހުންނެވެ. ފަސް އަހަރުގެ ތެރޭގައި ބޮޑު ސަރަހައްދަކަށް މި ރީތިކަން މިހާރު ވަނީ ފެތުރިފަ އެވެ.

ހައްސާން ބުނި ގޮތުގައި، ދިޔަވަރު ހިކިފައި އޮންނަ ވަގުތުތަކުގައި، ފެނުން މައްޗަށް ހުރިހާ މުރަކަތަކެއް ހުންނަނީ ތިލަވެފަ އެވެ. އެއްކޮށް ހުންނަ މުރަކަތަކުގެ ދޭތެރެއިން 'މަގުތަކެއް' ހެދިފައި ހުރެ އެވެ. އެ މަގުތަކުގައި އެކި ކުލަކުލައި ރީތި މަސްތައް ދުވެއުޅޭތަން އޭނާއަށް ފެނުނެވެ.

ދިޔަވަރު ބޮޑުވުމުން ފީނާލައިގެން ވެސް މުރަކަތަކުގެ ރީތިކަން ބަލާލެވެ އެވެ. އެ ހިތްގައިމު ކަމަކަށް ބަދަލެއް ނާދެ އެވެ.

"ހަމަ އަޖައިބެއް ކަހަލަ ރީތިކަމެއް މިއީ،" ފެނުނު މަންޒަރެއް ހިތް ދޫކޮށްލައިގެން ހުރެ ހައްސާން އަނެއްކާވެސް ބުންޏެވެ.

'ފިނިފެންމަލު'ގެ މި ފަދަ އެންމެ ބޮޑު ބަގީޗާ މިހާރު އޮންނަނީ ބ. ފުޅަދޫގަ އެވެ. މޫދު އަޑީގައި އޮންނަ މި ބަގީޗާ ބަލާލުމަށް ކިތަންމެ ބަޔަކު އެ ރަށަށް ދެ އެވެ. ރާއްޖޭގެ އުތުރުގެ އެހެން ރަށަކުން މިހާ ބޮޑަށް މުރަކަތައް ހެދިފައި އޮއްވާ މި ފެނުނީ އަދި އަލަށެވެ.

މުރަކަތަކުގެ ރީތިކަން ފެންނަ ގޮތަށް، ހައްސާން ނެގި ދެތިން މިނިޓްގެ ވީޑިއޯ، ސޯޝަލް މީޑިއާގައި ވަރަށް ބޮޑަށް ދައުރުވި އެވެ. އެއް ބަޔަކު ބުނީ، ދަތުރު ހަދައިގެން ވައިކަރަދޫއަށް މިހާރު ކޮންމެހެން ވެސް ދާން ޖެހިއްޖެ ކަމަށެވެ. އަނެއް ބަޔަކު ބުނީ މީހުންގެ އުނދަގުލާއި ފަޅު ހިއްކަން ބޭނުންވާ މީހުންގެ ކިބައިން އެތަން ރައްކާތެރިކޮށްފައި ބޭއްވުން މާ މުހިއްމު ކަމަށެވެ.