މީޑިއާ ބިލާ ދެކޮޅު އިހްތިޖާޖުގެ ތެރެއިން ނޫސްވެރިއަކު ހައްޔަރުކޮށްފި

މީޑިއާ ރެގިއުލޭޓުކުރުމުގެ ނަމުގައި ސަރުކާރުން ފާސްކުުރަން އުޅޭ ކޮންޓްރޯލު ބިލާ ދެކޮޅަށް ރައްޔިތުންގެ މަޖިލިސް ދޮށަށުގައި މިހާރު ކުރަމުންދާ އިހްތިޖާޖުގެ ތެރެއިން ނޫސްވެރިއަކު ހައްޔަރުކޮށްފި އެވެ.

ތަފްސީލް - މިއަދު ހެނދުނުން ފެށިގެން ކުރަމުންދާ އެ އިހްތިޖާޖުގައި، ފުލުހުން ވަނީ ދެ މީހަކު ހައްޔަރުކޮށްފަ އެވެ. އެއީ އަދަދު ނޫހުގެ ނޫސްވެރިޔާ އަދި މީޑިއާ ކައުންސިލްގެ މެމްބަރު ލީވާން އަލީ ނާސިރު ، 28، އާއި ޓެކްސީ ޑްރައިވަރެއް ކަމަށްވާ މުހައްމަދު ޝާމިން، 40، އެވެ.

ވީޑިއޯއަކުން ފެންނަނީ ތިން ފުލުހަކު ވެގެން ލީވާންގެ ދެ އަތް ފުރަގަހަށް ލައިގެން އޭނާ ހައްޔަރުކޮށްގެން ގެންދާ ތަނެވެ.

ދައުރުން ބޭރުން މިއަދު ވެސް ޖަލްސާއެއް ބާއްވަން ނިންމާފައިވާތީ ނޫސްވެރިން މިއަދު ހެނދުނު 8:30 އިން ފެށިގެން މަޖިލިސް ދޮށަށް އެއްވެ، ދަނީ ކަންބޮޑުވުންތައް އިއްވަމުންނެވެ. މެންދުރު ފަހު ވަގުތުކޮޅަކަށް އިހްތިޖާޖު މެދުކަނޑާލީ، ހަވީރު އެ ޖަލްސާ ބާއްވަން އިއުލާން ކުރުމުންނެވެ.

އެއާއެކު ގިނަ ބަޔަކު އަނެއްކާވެސް މަޖިލިސް ދޮށަށް އެއްވެ، އެ ބިލާ ދެކޮޅަށް ދަނީ އަޑު އުފުލަމުންނެވެ.

ނޫސްވެރިން ދުރަށް ޖައްސަން މަސައްކަތްކުރިއިރު ފުލުހުން ހާލަތާ ނުބައްދަލު ބާރުގެ ބޭނުންކުރުމުން ބައެއް ނޫސްވެރިންނަށް އަނިޔާވެފައި ވެސް ވެ އެވެ.