ރައީސް މުއިއްޒު މިއަދު ހއ. އުތީމަށް ވަޑައިގެން އެ ރަށުގެ ކުޑަކުދިންތަކަކާ އެކު. (ފޮޓޯ/ރައީސް އޮފީސް)
ގައުމިއްޔަތަށް ހިދުމަތްކުރުމުގެ ޝަރަފު އުތީމު ރައްޔިތުންނަށް އަރުވައިފި
ދިވެހި ގައުމިއްޔަތަށް ހިދުމަތްކުރުމުގެ ޝަރަފު ހއ. އުތީމު ރައްޔިތުންނަށް އަރުވައިފި އެވެ.
ވީ ކިހިނެއް؟ - މި ޝަރަފު އެ ރަށު ރައްޔިތުންނަށް އެރުވީ ގައުމީ ދުވަސް ފާހަގަކުރުމަށް މިއަދު އުތީމުގައި ބާއްވަމުން އަންނަ ރަސްމިއްޔާތުގަ އެވެ.
ތަފްސީލް - އުތީމު ރައްޔިތުންނަށް މި ޝަރަފު އަަރުވައި ޝަރަފުގެ އައްޑަނަ ހަވާލުކޮށްދެއްވީ ރައީސް މުހައްމަދު މުއިއްޒު އެވެ.
އައްޑަނައާ ހަވާލުވެވަޑައިގަތީ އުތީމު ކައުންސިލްގެ ރައީސް އަބްދުﷲ ރަޝީދެވެ.
ގައުމިއްޔަތަށް ހިދުމަތް ކުރުމުގެ ޝަރަފު އުތީމު ރައްޔިތުންނަށް އެރުވުމަށް ރައީސް ނިންމެވީ:
-
އުތީމު ގަނޑުވަރު ބެލެހެއްޓެމުގައި އުތީމު ރައްޔިތުން އަދާކޮށްފައިވާ ދައުރާއި އެ ކަމަށް ދޭ އަހައްމިއްޔަތުގެ އަގު ވަޒަން ކުރުމުގެ ގޮތުން
-
އުތީމު ރައްޔިތުންގެ ބެލެހެއްޓުންތެރިކަމާ އެކު އުތީމު ގަނޑުވަރަށް 500 ވަރަކަށް އަހަރު މިހާރު ވެފައިވާތީ
އުތީމު ގަނޑުވަރަކީ ރާއްޖޭގެ ގައުމީ ދުވަސް ނިސްބަތްވާ ބޮޑުތަކުރުފާނު، ރާއްޖޭގެ ވެރިކަމާ ހަވާލުވެވަޑައިގަތުމާ ހަމައަށް ދިރިއުޅުއްވި ގެކޮޅެވެ. އެ ގަނޑުވަރު ފާއިތުވި 5 ގަރުނު ވެސް އުތީމު ރައްޔިތުން ވަނީ ރައްކާތެރިކަމާ އެކު ބަލަހައްޓައިފަ އެވެ.