55 ކައުންސިލް އިމާރާތް ކުރުން އާރުސީސީއަށް

ކޮންޓްެރެކްޓާ ފައިނޭންސް އުސޫލުން 55 ރަށެއްގައި ކައުންސިލް އިދާރާގެ އިމާރާތް އަޅަން، ރަޝީދު ކާޕެންޓްރީ އެންޑް ކޮންސްޓްރަކްޝަން (އޭސީސީ)އާ ހަވާލުކޮށްފި އެވެ.

އެނގުން މުހިއްމު- ޖުމްލަ 36 މިލިއަން ޑޮލަރު (555 މިލިއަން ރުފިޔާ) ހަރަދުކޮށްގެން، ސަރުކާރުން ފަށަން ނިންމާފައިވާ މި މަޝްރޫއު އެންމެ ފުރަތަމަ ހަވާލު ކުރީ، މެލޭޝިއާގެ ހެކްސްޓާ ގްލޯބަލް ކުންފުންޏާ އެވެ. އެކަމަކު މިދިޔަ ޖެނުއަރީ މަހު ސޮއި ކުރި އެ އެއްބަސްވުން ޖުލައި މަހު ވަނީ އުވާލާފަ އެވެ.

ވީ ކިހިނެއް؟- ލޯކަލް ގަވަމެންޓް މިނިސްޓްރީ އިން ބުނީ، އާރުސީސީއާ އެ މަޝްރޫއު ހަވާލުކޮށް، އެއްބަސްވުމުގައި މިއަދު ސޮއިކޮށްފައިވާ ކަމަށެވެ. އެކަމަކު އެ ކުންފުންޏާ މަސައްކަތް ހަވާލުކުރީ، ކިހާ އަގަކަށް ކަމެއް ނުބުނެ އެވެ.

އެ މިނިސްޓްރީން ބުނިގޮތުގައި:

މެލޭޝިޔާގެ ކުންފުންޏާ އެ މަޝްރޫއު ހަވާލު ކުރީ ދެ އަހަރުގެ ތެރޭގައި ނިންމުމަށެވެ.

އެ އެއްބަސްވުން ބާތިލްކުރި ސަބަބާ ގުޅޭގޮތުން، ލޯކަލް ގަވަމެންޓް މިނިސްޓަރު އާދަމް ޝަރީފް ކުރިން ވިދާޅުވި ގޮތުގައި އެއްބަސްވުން ބާތިލްކުރީ ކައުންސިލްތަކުން ހުށަހެޅި ބަދަލުތައް އެ ކުންފުނިން ބަލައިނުގަތުމުންނެވެ. އަދި އެއްބަސްވުން ބާތިލްކުރި ނަމަވެސް އެ ކުންފުންޏަށް އެ ކަމާ ގުޅިގެން ބަދަލެއް ދޭކަށް ނުޖެހޭ ކަމަށް ވެސް ވިދާޅުވި އެވެ.

"ކައުންސިލް އިމާރާތް އެޅުމަށް ޝައުގުވެރިކަން ފާޅުކޮށްފައިވާ ކުންފުނިތަކުގެ ޕްރޮޕޯސަލްތައް އިވެލުއޭޓްކޮށް، މިމަސައްކަތް އެހެން ދިވެހި ކުންފުންޏަކާ ޙަވާލުކުރުމުގެ މަސައްކަތް މިހާރު މިދަނީ ކުރަމުން،" މިނިސްޓަރު ވިދާޅުވެފައިވެ އެވެ.