އެމްޑީޕީ ޕާލިމެންޓްރީ ގްރޫޕުގެ މެމްބަރުން ގަވަރުނަރާ ބައްދަލުކުރަން އެމްއެމްއޭގައި. (ފޮޓޯ/އެމްަޑީޕީ)

އެމްޑީޕީ

އެމްޑީޕީން ގަވަރުނަރު ހޯދަން އެމްއެމްއޭއަށް ވަދެއްޖެ

އެމްޑީޕީ ޕީޖީ މެމްބަރުން އެމްއެމްއޭއަށް ވަނީ ޑޮލަރު ލިބުން ދަތިވާ މައްސަލައިގައި ކަންބޮޑުވުން ފާޅުކޮށް، މަޝްވަރާކުރުމަށްޓަކައި ގަވަރުނަރާ ބައްދަލުކުރަން އެދި މިދިޔަ ބުދަ ދުވަހު ފޮނުވި ސިޓީއަށް ޖަވާބެއް ނުލިބުމުން

ބޭރު ފައިސާއާ ބެހޭ ގާނޫނަށް ގެނައި އިސްހާލުތަކާ ގުޅިގެން ޑޮލަރުގެ އަގު ބޮޑުވެ، އާންމުންނާއި ވިޔަފާރިވެރިންނަށް ޑޮލަރު ލިބުން ދަތިވެފައިވާތީ އެކަމާ ބެހޭ ގޮތުން މަރުކަޒީ ބޭންކު، އެމްއެމްއޭގެ ގަވަރުނަރު އަހުމަދު މުނައްވަރާ މަޝްވަރާ ކުރެވޭތޯ އެމްޑީޕީގެ ޕާލިމެންޓްރީ ގްރޫޕުގެ މެމްބަރުން މިއަދު އެމްއެމްއޭއަށް ވަދެއްޖެ އެވެ.

ވީ ކިހިނެއް؟ - ގަވަރުނަރާ ބައްދަލުކުރަން އެދި އެމްޑީޕީގެ ޕީޖީއިން ވަނީ މިދިޔަ ބުދަ ދުވަހު ސިޓީއެއް ފޮނުވާފަ އެވެ.

ތަފްސީލު - އެމްޑީޕީއިން ބުނީ އެ ސިޓީއަށް އެއްވެސް ޖަވާބެއް އަދި މިހާތަނަށް އައިއިރު ނުލިބޭ ކަމަށެވެ. އެހެންވެ، ގަވަރުނަރާ ބައްދަލުކުރެވޭތޯ އެމްޑީޕީގެ ޕީޖީ މެމްބަރުން ވަނީ މަރުކަޒީ ބޭންކަށް ވަދެފަ އެވެ.

"ޑޮލަރުގެ އަގު ހިފެހެއްޓުމެއް ނެތި އުފުލެމުންދާއިރު އެކަމުގައި އެއްވެސް ބަހެއް ވިދާޅު ނުވެ ހުންނެވުމާއި ދައުލަތުގެ ރިޒާވު ބޭނުންކޮށްގެން ރަސްމާލެ ހިއްކަން ފައިސާ ދައްކާތީ އެމްއެމްއޭގެ ގަވަރުނަރާ ބައްދަލުކުރަން އެދުނު ސިޓީއަށް ޖަވާބެއް ދީފައި ނުވާތީ އެމްޑީޕީގެ ޕީޖީ މިވަގުތު ތިބީ ގަވަރުނަރު ހޯދަން މަރުކަޒީ ބޭންކުގައި،" އެ ޕާޓީއިން 'އެކްސް'ގައި ކުރި ޕޯސްޓެއްގައިވެ އެވެ.

ގަލޮޅު ދެކުނު ދާއިރާގެ މެމްބަރު މީކާއިލް އަހްމަދު ނަސީމް ކުރެއްވި ޕޯސްޓެއްގައި ވިދާޅުވީ މި ދަނޑިވަޅުގައި އަހްމަދު މުނައްވަރު، އެމްއެމްއޭގެ ގަވަރުނަރުގެ މަގާމުގައި ވަކިކުރަން އުޅޭކަމަށް އަޑު ފެތުރެމުން އަންނާތީ އެކަމާ ކަންބޮޑުވާ ކަމަށެވެ.

ގަވަރުނަރުގެ މަގާމުން މުނައްވަރު ވަކިކުރަން އުޅެނީ، މީކާއިލްއަށް އެނގިވަޑައިގެންފައިވާ ގޮތުގައި، މި ސަރުކާރުން ހިންގަން މަސައްކަތް ކުރަމުން އަންނަ ރަސްމާލެ މަޝްރޫއަށް ދައުލަތުގެ ޔޫސަބަލް ރިޒާވުން ހަރަދުކުރަން ދެކޮޅު ހައްދަވާތީ އެވެ.

ނަމަވެސް އެކަން ކޮށްފި ނަމަ، މީކާއިލް ވިދާޅުވި ގޮތުގައި މިހާރު ކުރިމަތިވެފައި އޮތް ޑޮލަރުގެ މައްސަލަ އިތުރަށް ގޯސް ވާނެ އެވެ.

އެނގުން މުހިންމު - އެމްޑީޕީއިން ގަވަރުނަރާ ބައްދަލުކުރަން އެދި ފޮނުވި ސިޓީގައި މައިގަނޑު ގޮތެއްގައި ފާހަގަކުރި ކަންބޮޑުވުންތަކަކީ:

  • ޑޮލަރު ލިބުން ދަތިވެ، ގިނަ ވިޔަފާރިތަކެއް ހުއްޓުމަކަށް އަތުވެދާނެ ކަމުގެ ބިރު ހީވުން

  • މިފަދަ ދަނޑިވަޅެއްގައި ސަރުކާރަށް ބޭނުންވާ މިންވަރަށް ޑޮލަރު ހޯދުމުގެ ބޭނުމުގައި ބޭރު ފައިސާ މާރުކުރުމާއި ބޭރު ފައިސާއިން މުއާމަލާތްކުރުމުގެ ގަވާއިދުތަކަށް ގެންނަ ކުއްލި ބަދަލުތަކުގެ ސަބަބުން ޑޮލަރު ލިބުން އިތުރަށް ދަތިވުން

  • މިއީ ރާއްޖެއިން ބޭރުގައި ދިރިއުޅޭ ދިވެހިންނާއި އެކިއެކި ބޭނުންތަކުގައި ރާއްޖެއިން ބޭރަށް ދަތުރުކުރާ ރައްޔިތުންނަށް ކުރިމަތިވާ ބޮޑު ތަކުލީފެއް

  • މި މައްސަލައިގެ ސަބަބުން މުދަލާއި ހިދުމަތުގެ އަގުތައް އިންތިހާއަށް އުފުލުން

  • ޑޮލަރު ނުލިބޭތީ ވިޔަފާރިވެރިން މުދާ އެތެރެކުރުން ހުއްޓާލަން ޖެހި، ރާއްޖޭގައި ގިނަ ބާވަތްތަކުގެ އަސާސީ ތަކެއްޗާއި ކާބޯތަކެތި އަގުބޮޑުވުން، ލިބުން ދަތިވުން ނުވަތަ ހުސްވުން

ކޮމެންޓް (4)

ހަސަން

21 ޖުލައި 2025
ކަލޭމެން ގޮސް ކުރީގެ ގަވަނަރު ހޯދަބަލަ
2 2

ދޮވެމި ކަލަމިންޖާ

21 ޖުލައި 2025
ކިތަންމެ ވަރަކަށް ފޮނު އެރުވިޔަސް، ގަވަރުނަރަކަށް އެކަނި މިކަމެއް ހައްލެއް ނުވާނެ. ކޮންމެ މީހަކު ވެރިކަމުގައި ނުވަތަ ފިނޭންސް މިނިސްޓަރު ކަމުގައި ހުއްޓަސް ޑޮލަރުގެ އަގަކަށް ބަދަލެއް ނާންނާނެ. މާރކެޓް ފޯރސަސް އަކާއި އެއްވެސް މީހަކަށް ނުކުޅެވޭނެ. މިއީ އުފަންކުރުވި އިޤްތިސާދީ ޙާލަތު. ދަރަންޏާއި ނުލާ ދިރިއުޅެން ނޭގުމުގެ ނަތީޖާ. މިކަމަށް އެއްވެސް ހައްލެއް އަންނާނީ 2026 ގެ ދަރަނި އަދާކުރުމަށް ފަހު، އެދަރަނީ ރީފައިނޭންސްކޮށްފިއްޔާ ވަގުތީ ހައްލެއް ލިބޭނެ. އެކަމަކު ޙާލަތު ދެމިއޮންނާނެ
4 0

ކޮސް

21 ޖުލައި 2025
@ދޮވެމި ކަލަމިންޖާ ނޫނޭ އޮޅުވާލަން ނޫޅޭ .ދިވެހި ރައްޔިތުންނަށް ކޮންމެގޮތެއްވިއަސް ހެޔޮކަމަށް ރައީސް މުއިއްޒު ގެނައި ބަދަލަކުން މިއުނދަގޫ ދަތި އުފުލަން މިޖެހެނީ. އެބޭޅާ ޑޮލަރު އެބަހޯދާ. ރައްޔިތުން މިޖެހެނީ 20 ރުފިޔާއިން މަތިން ޑޮލަރު ގަންނަން. ދެންވެސް ބުނަންވީ ރައީސް އޯކޭއޭ..... ޤައުމަށް ޑޮލަރު އެބަވަދޭ. މިނިވަންދުވަސް ފާހަގަކުރާއިރު ދަރިން ލައްވާލާނެ އައު ހެދުމެއް ގަންނަން 550 ރ މިހާރު .ކުރިން 250 ރ. ހަމަ އޯކޭ ދެއްތޯ.
2 4

ދޮވެމި ކަލަމިންޖާ

23 ޖުލައި 2025
@ކޮސް އަދިވެސް ތިދައްކަނީ ބަލީގެ ޢަލާމާތްތަކުގެ ވާހަކަ. ބަލިން ޝިފާ ނުލިބޭހާ ހިނދަކު ތިކަންތައް ތިޔަގޮތުގައި ދެމިއޮންނާނެ. އެހެންނޫންތަ މިކިޔަނީ. ކޮންމެ ކަމަކަށް ވަގުތީ ހައްލު ހޯދަން އުޅެން ހަދަިއިގެން ވާހާގޮތް މީ. ނުވާފެންވަރުން ދަރަނިން އުޅެން އުޅުމުގެ ނަތީޖާ. މިވަގުތު ވެރިކަމުގައި މީދަލެއް ހުއްޓަސް ޑޮލަރުގެ އަގަކަށް ބަދަލެއް ނާންނާނެ. މަޖުބޫރުން މާރުކުރުމުގެ ސިޔާސަތު ނެތްނަމަ، ދަރަނި ނުދެއްކި ގައުމު ޑިފޯލްޓުވެއްޖެނަމަ ތިޔަ ގަންނަން އުޅުނު ހެދުމެއް ނޫން، 1 އިރު ކައިގެން އުޅެންޖެހޭނީ. އެއީ ސްރީލަންކާ ދެއްކި ނަމޫނާ. ޕޮލިޓިކަން ބްލައިންޑްނެސް އަކީވެސް ބައްޔެއް
0 0

އިތުރު އާޓިކަލް

އިތުރު އާޓިކަލް