ކުއްޖާގެ މޫނުމަތި ހުރީ ލޭކޮށާލާފައި؛ މައްސަލަ އެޑިއުކޭޝަނުން ބަލަނީ

އއ. އުކުޅަހު ސްކޫލުގައި ދަރިވަރަކަށް އަނިޔާކުރި މައްސަލަ ފެންމަތިވެ، އެޑިއުކޭޝަން މިނިސްޓްރީން އެ މައްސަލަ ބަލަން ފަށައިފި އެވެ.

ވީ ކިހިނެއް؟ - އެ މައްސަލައިގައި ހިމެނޭ ކުއްޖާގެ ބައްޕަ އިއްޔެ ވަނީ ސޯޝަލް މީޑިއާގައި، ކުއްޖާއަށް ކޮށްފައި ހުރި އަނިޔާތައް ފެންނަ ފޮޓޯއެއް ހިއްސާކޮށްފަ އެވެ. އޭގައި ފެންނަ ގޮތުން، ކުއްޖާގެ ލޮލާއި އަނގަ ކައިރީ ހުރީ ލޭކޮށާލާފަ އެވެ.

ތަފްސީލް - އޭނާ ބުނި ގޮތުގައި، ދަރިފުޅަށް އަނިޔާކުރިކަން އެނގުނީ، ސްކޫލުން ގުޅާފައި އެކަން އެންގުމުންނެވެ. އެތަނަށް ދިޔައިރު، ފެނުނީ ދަރިފުޅު މޫނުމަތި ޒަހަމްވެ، ބިރުގެންފައިވާތަން ކަމަށް ބުންޏެވެ. އެކަން ކުރީ ދަރިފުޅުގެ ކްލާސް ކުއްޖެއް ކަމަށް ވެސް ޕޯސްޓުގައި އޭނާ ބުނެފައިވެ އެވެ.

ކުއްޖާގެ ބައްޕަ ވަނީ، ސޯޝަލް މީޑިއާގައި އެޑިއުކޭޝަން މިނިސްޓްރީ އާއި ކަމާ ގުޅޭ އެހެން އިދާރާތައް ޓެގްކޮށް، މައްސަލަ އެތަންތަނުގެ ސަމާލުކަމަށް ގެނެސްފަ އެވެ.

އޭގެ ފަހުން އެޑިއުކޭޝަން މިނިސްޓްރީން ބުނީ މައްސަލަ މިހާރު އެތަނުން ބަލަމުންދާ ކަމަށެވެ.

ކުއްޖާގެ ބައްޕަ ބުނި ގޮތުގައި:

"އެކަމާ ގުޅޭ ގޮތުން ސުވާލުކުރުމުން ސްކޫލުން ބުނީ ދަރިފުޅު ވެސް އެކަން ސްކޫލަށް އަންގާފައި ނުވާ ކަމަށް،" އެ ޕޯސްޓުގައި ކުއްޖާގެ ބައްޕަ ބުނެފައިވެ އެވެ.

އޭނާ ވަނީ އެ ފަދަ ކަމެއް ހިނގިކަން އެނގި ހުރެ ސްކޫލުން އެކަމާ އަޅާނުލީތީ ޝަކުވާކޮށްފަ އެވެ. އަދި ބުލީކުރާކަން އެންގުމަކީ ކުއްޖާގެ މަސްއޫލިއްޔަތެއް ނޫން ކަމަށް ވެސް އޭނާ ބުންޏެވެ.