ސިއްހީ އަދި ތައުލީމީ ދާއިރާގެ އޯޓީއާ ބެހޭ ގަރާރެއް މަޖިލީހަށް

ސިއްހީ ދާއިރާ އާއި ތައުލީމީ ދާއިރާގައި މަސައްކަތްކުރާ މީހުންނަށް އިތުރު ގަޑީގެ ފައިސާ ނުލިބޭ ގޮތަށް އިތުރު ވަގުތު މަސައްކަތް ކުރަންޖެހޭތީ ރައްޔިތުންގެ މަޖިލީހަށް ގަރާރެއް ހުށަހަޅަފި އެވެ.

ވީ ކިހިނެއް؟ - އެ ގަރާރު ހުށަހެޅުއްވީ މިއަދުގެ މަޖިލިސް ޖަލްސާގައި ކަނޑިތީމު ދާއިރާގެ މެންބަރު އަމީން ފައިސަލް އެވެ.

އެ ގަރާރު ހުށަހެޅުއްވީ އެ ދެ ދާއިރާގައި މަސައްކަތް ކުރާ މީހުން އިތުުރު ގަޑީގައި ކުރާ މަސައްކަތަށް ފައިސާ ދޭ އުސޫލުތަކާއި އަދުލުވެރި މާހައުލެއް ގާއިމްކުރުމަށް މަޖިލީހުގެ މެންބަރުން ދެކިވަޑައިގަންނަވާ ގޮތެއް ބެލުމަށެވެ.

ތަފްސީލް- ގަރާރުގައި ބުނެފައިވަނީ ސިއްހީ އަދި ތައުލީމީ ދާއިރާގެ މަސައްކަތްތެރިން އިތުރު އުޖޫރައެއް ނުލިބޭ ގޮތަށް ގިނަ ވަގުތުތަކެއް މަސައްކަތުގައި ހޭދަކުރާ ކަމަށެވެ.

އެ ގަރާރުގެ މައިގަނޑު ބޭނުމަކީ:

ސިއްހީ ދާއިރާގެ އެކި މަސައްކަތް ކުރާ ޓެކްނިކަލް ލެވެލްތަކުގެ މީހުން ޖޮބް މެޓްރިކްސްގެ އުސޫލަށް ހިިޖުރަކޮށްފައިވާ ކަމަށާއި ތައުލީމީ ދާއިރާގެ މީހުންގެ މުސާރަ ވެސް އެހެން ދާއިރާތަކާ އެއްހަމަ ކުރުމަށް އާ ފްރޭމްވޯކެއް ތައާރަފުކޮށްފައިވާކަން ގަރާރުގައި ވަނީ ފާހަގަކޮށްފަ އެވެ.

ނަމަވެސް މި ދެ ދާއިރާގައި މަސައްކަތްކުރާ މީހުން އިތުރު ގަޑީގައި ކުރާ މަސައްކަތަށް ފައިސާ ދިނުމާއި އިތުރު ގަޑީގެ މަސައްކަތް ކުރުވޭނެ އެންމެ މަތީ މިންގަނޑު ހިމެނޭ ސީލިން ތަކެއް ކަނޑައެޅިފައިވާކަން ގަރާރުގައި ވަނީ ފާހަގަކޮށްފަ އެވެ.

މި ދެ ދާއިރާގައި މަސައްކަތްކުރާ މީހުންނަކީ ގިނަ ވަގުތު މަސައްކަތުގައި ހޭދަކުރަންޖެހިފައިވާ ބަޔެއްކަން ވެސް ވަނީ ފާހަގަކޮށްފަ އެވެ.

މީގެ އިތުރުން:

އެ ގަރާރުގައި ވަނީ އާ ޕޭ ފްރޭމްވޯކުގެ ދަށުން އިތުރު ގަޑީގެ ފައިސާ ދިނުމަށް ކަނޑައަޅާފައިވާ ސީލިންއަށް ވުރެ އިތުރަށް އެއްވެސް ފަރާތެއް ލައްވާ މަސައްކަތް ކުރުވަންޖެހޭ ހާލަތުގައި އިތުރު ގަޑީގެ ފައިސާ ލިބިދެވޭނެ އިސްތިސްނާ އުސޫލެއް އޮތުން މުހިއްމު ކަމަށެވެ.

މީގެ އިތުރުން، ސިއްހީ އަދި ތައުލީމީ ދާއިރާގައި މަސައްކަތްކުރާ މީހުން، އިތުރު ގަޑީގައި މަސައްކަތް ކުރާ ނަމަ، އެ ގަޑީގައި ކުރާ މަސައްކަތުގެ އަގު ލިބޭނެ ގޮތަށް އުސޫލުތައް މުރާޖައާކުރަންޖެހޭ ކަމަށް ވެސް ގަރާރުގައި ބުނެފައިވެ އެވެ.