ސުޕްރީމް ކޯޓަށް ދެން އިތުބާރެއް ނެތް: ޔާމީން

ސުޕްރީމް ކޯޓުގައި މިހާރު އޮތް ފަނޑިޔާރުންގެ ބެންޗުގައި ތިއްބެވީ، ރައީސް މުހައްމަދު މުއިއްޒު ސިޔާސީ ގޮތުން ހަދިޔާ ދެއްވާފައި ތިއްބެވި ބޭފުޅުން ކަމަށާއި އެ ކޯޓަށް މިހާރު އިތުބާރު ނެތް ކަމަށް ކުރީގެ ރައީސް އަބްދުﷲ ޔާމީން މިރޭ ވިދާޅުވެއްޖެ އެވެ.

ވީ ކިހިނެއް؟ - ޔާމީން މިހެން ވިދާޅުވީ މިރޭ އޮތް ޕީއެންއެފް ޖަލްސާގައި، ސުޕްރީމް ކޯޓުގެ ބެންޗަށް ގެނައި ބަދަލާ ގުޅޭގޮތުން ވާހަކަދައްކަވަމުންނެވެ.

ސުޕްރީމް ކޯޓުގެ ތިން ފަނޑިޔާރެއްގެ ސުލޫކީ މައްސަލައެއް ބަލަން ފަށައި، އެ ކޯޓުގެ ބެންޗުގައި ތިއްބެވި އަޒްމިރާލްދާ ޒާހިރު އަދި މަހާޒު އަލީ ޒާހިރު ވަނީ ވަކިކޮށްފަ އެވެ. މީގެ އިތުރަށް:

އެ ކޯޓުގައި ހުސްވެފައިވާ ދެ ފަނޑިޔާރުންގެ މަގާމަށް ހައި ކޯޓުގެ ފަނޑިޔާރު މުހައްމަދު ސަލީމް އާއި ހައި ކޯޓުގެ ކުރީގެ ފަނޑިޔާރު އަބްދުﷲ ހަމީދު މިހާރު ވަނީ އައްޔަންކޮށްފަ އެވެ.

ބުނީ ކީކޭ؟ - ސްޕްރީމް ކޯޓަށް އަލަށް އައްޔަންކުރެއްވި ފަނޑިޔާރުންނަށް ފާޑުވިދާޅުވެ މިރޭގެ ޖަލްސާގައި ޔާމީން ވިދާޅުވީ، މިހާރު ސުޕްރީމް ކޯޓުގައި ތިއްބެވި ފަނޑިޔާރުންނަކީ ރައީސް މުހައްމަދު މުއިއްޒު، ސިޔާސީ ގޮތުން ހަދިޔާ ދެއްވާފައި ތިބި ބޭފުޅުންތަކެއް ކަމަށެވެ.

"މިހާރު ސުޕްރީމް ކޯޓަކުނެތް ރައްޔިތުން އިތުބާރުކުރާ މީހެއް. މިހާރު ސުޕްރީމް ކޯޓުގައި އެތިބީ ކޮންބައެއްތޯ. ސިޔާސީ ގޮތުން ކަންތައްތަކެއް ކޮށްދިނީމާ ސިޔާސީ ހަދިޔާ ދީފައި ތިބި ބައެއް ސުޕްރީމް ކޯޓުގައި މިހާރު އެތިބީ،" ޔާމީން ވިދާޅުވި އެވެ.

އެގޮތުން ވިދާޅުވީ:

"މުއިއްޒު ވިދާޅުވާނެ ޖޭއެސްސީއަކަށް އަތެއް ނުބާނަމޭ، ފައިބޭނުވީ. ޖޭއެސްސީން ނިންމީ [ސަލީމް] ޝަރުތު ފުރިހަމަވާ ކަމަށް. އެކަމަކު މިއަށްވުރެ މާ ކޮލިޓީ މީހުން އެބަތިއްބޭ. މާ ކޮލިޓީ ތިން ފަނޑިޔާރުން ބޭރުކޮށްފައި އެ ގެނެސްލީ ސަލީމް،" ޔާމީން ވިދާޅުވި އެވެ.

"ކީއްތޯ އެކުރައްވަނީ. ކައްފާރާ ދައްކަވަނީ. ދަރަންޏެއް އަދާ އެކުރަނީ."

ސުޕްރީމް ކޯޓުގެ ފަނޑިޔާރުންގެ ފެންވަރު ދަށްވެގެން ދިއުމުން، އެތަނުން ނިންމާ މައްސަލަތަަކަށް އިންސާފު ލިބޭނެ ކަމަށް ގަބޫލެއް ނުރައްވާ ކަަމަށް ޔާމީން ވިދާޅުވި އެވެ.

އެނގުން މުހިންމު - ސުޕްރީމް ކޯޓަށް އައްޔަންކުރެއްވި ފަނޑިޔާރުންގެ ތެރޭ ހިމެނިވަޑައިގަންނަވާ ސަލީމަކީ ވ. އާރަށް މައްސަލާގައި ހައިކޯޓުގައި ކުރިއަށް ގެންދިޔަ ޝަރީއަތުގެ މަޖިލީހުގެ ފަނޑިޔާރުންގެ ބެންޗުގައި ހިމެނިވަޑައިގެންނެވި ފަނޑިޔާރެކެވެ.

މިދިޔަ ރިޔާސީ އިންތިހާބުގައި ވާދަކުރެއްވުމުގެ ފުރުސަތު ޔާމީންއަށް ގެއްލުނީ އެ އިސްތިއުނާފް ހައިކޯޓުގައި އިންތިހާބާ ދިމާކޮށް އޭރު މަޑުޖެހުމުގެ ސަބަބުންނެވެ.

ފާހަގަކޮށްލެވޭ ކަމެއް - ސުޕްެރީމް ކޯޓުގެ ބެންޗަށް އިތުބާރު ނެތް ކަމަށް ޔާމީން ވިދާޅުވިއިރު، އެމަނިކުފާނުގެ މައްސަލައެއް އެ ކޯޓުގައި މިހާރު ވެސް އެބަ ހިނގަމުންދެ އެވެ. އެއީ އާރަށުގެ މުއާމަލާތާ ގުޅިގެން އިއްވި 11 އަހަރުގެ ޖަލު ހުކުމް ބާތިލުކޮށް މައްސަލަ އަލުން ބަލަން އެންގިއިރު، ޔާމީންއާ ދެކޮޅަށް އާ ހެކި ބަލައިނުގަންނަން ހައި ކޯޓުން އަންގާފައިވާ އެންގުން ބަދަލުކުރަން ދައުލަތުން ހުށަހެޅި މައްސަލަ އެކެވެ.

އެ މައްސަލަ ސުޕްރީމް ކޯޓުގައި އޮތުމުން، ކްރިމިނަލް ކޯޓުގައި އަލުން ފެށި، އެ މައްސަލައިގެ ޝަރީއަތް މިވަގުތު އޮތީ މަޑުޖައްސާލާފަ އެވެ.