އޮކްޓޯބަރު 2، 2018: ރިޔާސީ އިންތިހާބު 2018ގައި އިދިކޮޅު ކޯލިޝަނުން އިންތިހާބު ކާމިޔާބުކުރުމާ ގުޅިގެން އުފާ ފާޅުކުރުމަށް އުމަރު ޒާހިރުގެ ދައުވަތަކަށް އޭރުގެ އިންތިހާބީ ރައީސް އިބްރާހިމް މުހައްމަދު ސޯލިހް ޖޭޒް ކެފޭއަށް ވަޑައިގެން އުމަރު ޒާހިރާ ބައްދަލުކުރައްވަނީ. (ފައިލް ފޮޓޯ/އެމްޑީޕީ)
އުމަރު ޒާހިރުގެ ނަމުގައި ބިނާއެއް ހުރުން މުހިންމު: ރައީސް
ކޮވިޑް-19އަށް ފަރުވާ ހޯއްދަވަމުން ދަނިކޮށް މިދިޔަ ހަފްތާގައި އަވަހާރަވި ދައުލަތުގެ ހިދުމަތްތެރިޔާ އުމަރު ޒާހިރު ދިވެހި ދައުލަތަށާއި ގައުމަށާއި ރައްޔިތުންނަށް ކޮށްދެއްވި ހިދުމަތްތަކުގެ އަގު ވަޒަންކުރުމުގެ ގޮތުން، އޭނާގެ ނަމަށް ނިސްބަތްވާ ބިނާއެއް ހުރުމަކީ ވަރަށް މުހިންމު ކަމެއް ކަމަށް ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.
ވީ ކިހިނެއް؟ - ގައުމީ އެއްބައިވަންތަކަމުގެ ދުވަހުގެ ޖަލްސާގައި ވާހަކަދައްކަވަމުން ރައީސް ސޯލިހު ސިފަކުރެއްވި ގޮތުގައި، އުމަރު ޒާހިރަކީ ދިވެހިންގެ ހިތްތަކުގައި ގައުމީ އެއްބައިވަންތަކަން ދިރުވައި އާލާކުރުމަށް ވަރަށް މުހިންމު ދައުރެއް އަދާކުރެއްވި، ނަމޫނާ ބޭފުޅެކެވެ.
ބުނީ ކީކޭ؟ - ރައީސް ވަނީ އުމަރު ޒާހިރުގެ ހިދުމަތްތަކުގެ ހަނދާން އާކުރައްވައިފަ އެވެ. އެގޮތުން، އެ މަނިކުފާނު ފާހަގަކުރެއްވި ކަންކަމުގެ ތެރޭގައި ހިމެނެނީީ:
-
ހުޅުލޭ އެއާޕޯޓު ތަރައްގީކުރުން
-
ހުޅުމާލެ ތަރައްގީކުރުން
-
މާލެ ބޮޑުކުރުން
-
މާލޭގެ މަގުތައް ހެދުން
-
ތިލަފުށި ފަދަ ތަރައްގީގެ އެހެނިހެން ބޮޑެތި މަޝްރޫއުތައް
[އުމަރު ޒާހިރު] ދިވެހި ދައުލަތަށާއި ދިވެހި ގައުމަށާއި ދިވެހި ރައްޔިތުންނަށް އެ ކޮށްދެއްވި މަތިވެރި ހިދުމަތުގެ އަގު ވަޒަންކުރުމުގެ ގޮތުން، އެ މަނިކުފާނުގެ ނަންފުޅަށް ނިސްބަތްވާ ބިނާއެއް ނުވަތަ ތަނެއް ހުރުމަކީ ވަރަށް މުހިންމު ކަމެއް ކަމަށް އަޅުގަނޑު ދެކެން.
ގައުމީ ހިދުމަތްތަކުގެ އިތުރުން، އުމަރު ޒާހިރުގެ ޑައިރީ އަކީ ވެސް ގައުމަށް ވަރަށް މުހިންމު ތަރިކައެއް ކަމަށް ރައީސް ވިދާޅުވި އެވެ. އެއީ، ރައީސް ވިދާޅުވި ގޮތުގައި، އުމަރު ޒާހިރު ކިޔަވާވިދާޅުވަން މަޖީދިއްޔާ ސްކޫލަށް ވަދެވަޑައިގެންނެވި ދުވަސް ކަމަށްވާ ނޮވެމްބަރު 1943 އިން ފެށިގެން ދާދި ފަހަކާ ޖެހެންދެން ލިޔުއްވި 40އަށް ވުރެ ގިނަ ފޮތާއި ނޯޓުތަކެވެ.
"އެތައް އަހަރެއް ވަންދެން ލިޔުއްވި އެ ޑައިރީގެ ސޮފްހާތަކުން އަޅުގަނޑަށް މުޅިން ވެސް ފެނުނީ އިބްރަތްތަކާއި ފިލާވަޅުތައް. އެއީ ތާރީހީ މައުލޫމާތުގެ ކަންޒެއް،" އެ މަނިކުފާނު ވިދާޅުވި އެވެ.
ނަމަވެސް، މިއަދު ދައްކަންވީ އުމަރު ޒާހިރުގެ ގައުމީ ހިދުމަތުގެ ވާހަކަތައް އެކަނި ނޫން ކަމަށާއި އުމަރު ޒާހިރުގެ ގައުމީ ހިދުމަތުން ނަމޫނާ ލިބިގަނެ، ގައުމީ އެއްބައިވަންތަކަން ދެމެހެއްޓެވުމުގައި ގެންގުޅުއްވި ހިކްމަތްތެރި ސިޔާސަތުން ވެސް އިބުރަތް ލިބިގަންނަން ޖެހޭ ކަމަށް ރައީސް ވިދާޅުވި އެވެ.
"އެހެންކަމުން، އެ މަނިކުފާނު ދިވެހި ދައުލަތަށާއި ދިވެހި ގައުމަށާއި ދިވެހި ރައްޔިތުންނަށް އެ ކޮށްދެއްވި މަތިވެރި ހިދުމަތުގެ އަގު ވަޒަންކުރުމުގެ ގޮތުން، އެ މަނިކުފާނުގެ ނަންފުޅަށް ނިސްބަތްވާ ބިނާއެއް ނުވަތަ ތަނެއް ހުރުމަކީ ވަރަށް މުހިންމު ކަމެއް ކަމަށް އަޅުގަނޑު ދެކެން،" ރައީސް ވިދާޅުވި އެވެ.
އެނގުން މުހިންމު - އުމުރުފުޅުން 85 އަހަރުގައި އުމަރު ޒާހިރު އަވަހާރަވީ މިދިޔަ ހޯމަ ދުވަހު، ދަރުމަވަންތަ ހޮސްޕިޓަލުގައި އެޑްމިޓްކޮށްގެން ފަރުވާދެމުން ދަނިކޮށެވެ. ރަސްމީ އިއްޒަތުގައި އުމަރު ޒާހިރު ފަސްދާނުލީ ގަލޮޅު ސަހަރާގަ އެވެ.
އިތުރަށް ކިޔާލަން -