'ހޮޅުދޫ ބޯޓު'ގައި ރޯވި އަލިފާންގަނޑު ނިއްވާލަން ފެން ޖަހަނީ.
ރޯވެ އެނދި ބޯޓު އަޑިއަށް ހިނގައްޖެ؛ ގެއްލުނު ޒުވާނާ ހޯދަނީ
އަލިފާން ރޯވެ، އެނދި 'ހޮޅުދޫ ބޯޓު' ކިޔާ މުދާ އުފުލާ ބޯޓު ރޭ ދަންވަރު އަޑިއަށް ގޮސްފައިވާ ކަމަށާއި އެ ބޯޓުން ދަތުރުކުރި މީހަކު ހޯދުމުގެ މަސައްކަތް ކުރަމުން އަންނަ ކަމަށް އެމްއެންޑީއެފުން މިއަދު ބުނެފި އެވެ.
ވީ ކިހިނެއް؟ - 'ހޮޅުދޫ ބޯޓު'ގައި ރޯވީ ތ. ހިރިލަންދޫން ފުރައިގެން މާލެ ދަތުރުކުރަމުން ދަނިކޮށް ރޭ 9:07 ހާއިރު އެވެ. އެ ބޯޓުން ދަތުރުކުރަނިކޮށް ގެއްލުނީ ލ. މާވަށަށް ނިސްބަތްވާ އަލީ މުޝްފިގް މުހައްމަދު ޝަރީފް، 25، އެވެ.
ތަފްސީލް - އެމްއެންޑީއެފުން މިއަދު މީޑިއާތަކަށް ފޮނުވި މެސެޖެއްގައި ބުނީ 'ހޮޅުދޫ ބޯޓު' ދަންވަރު 2:07 ހާއިރު އެ ސަރަހައްދަށް އަޑިއަށް ގޮސްފައިވާ ކަމަށެވެ.
"ބޯޓުގެ ބައިތައް އޮޔާދާތީ، އެ ސަރަހައްދުން ދަތުރުކުރައްވާ ފަރާތްތަކުން މިކަމަށް ސަމާލުކަން ދެއްވުމަށް އިލްތިމާސްކުރަން. އަދި ރޭގަނޑު މި ސަރަހައްދުން ދަތުރުކުރައްވާ ފަރާތްތަކުން ދަތުރުކުރެއްވުމުގައި ހާއްސަ ސަމާލުކަމެއް ދެއްވުމަށް ވެސް އިލްތިމާސްކުރަން،" އެމްއެންޑީއެފްގެ މެސެޖުގައިވެ އެވެ.
އެމްއެންޑީއެފްއިން ހިއްސާކޮށްފައިވާ ވީޑިއޯ އިން ފެންނަނީ މުޅި ބޯޓުގައި އަލިފާން ހިފާފައިވާ ތަނެވެ. އަލިފާން ރޯވެފައި ހުރި ވަރަށް ބަލާއިރު ބޯޓުގައި ހުރި މުދަލާއި ބޯޓު ސަލާމަތް ކުރެވޭނެ ކަމަކަށް ނުބެލެވެ އެވެ.
— Dhauru (@Dhaurunews) April 2, 2025
އިތުރަށް ކިޔާލަން: https://t.co/F1TDvDo3pl pic.twitter.com/RKxbQkKs9r
އެމްއެންޑީއެފް ކައްދޫ ފަޔާ ސްޓޭޝަނުން އަދިވެސް އަންނަނީ ‘ހޮޅުދޫ ބޯޓު’ގައި ރޯވި އަލިފާންގަނޑު ނިއްވާލަން މަސައްކަތް ކުރަމުން.
— Dhauru (@Dhaurunews) April 2, 2025
އިތުރު ތަފްސީލް: https://t.co/F1TDvDo3pl pic.twitter.com/GxQafFqw6H
މީގެ އިތުރުން، އެމްއެންޑީއެފުން ބުނީ މުޝްފިގް ހޯދުމުގެ މަސައްކަތް އެމްއެންޑީއެފް ސެންޓްރަލް އޭރިއާ ކޮމާންޑް ކޯސްްޓްގާޑުން ކުރަމުން އަންނަ ކަމަށެވެ. އެ މަސައްކަތުގައި ޑްރޯން ވެސް ހަރަކާތްތެރިވާކަން އެމްއެންޑީއެފުން ފާހަގަކުރި އެވެ.
އެމްއެންޑީއެފުން ބުނީ:
-
ބޯޓުން ދަތުރު ކުރަމުން ދިޔައީ ކެޕްޓަނާ އެކު 18 މީހުން
-
17 މީހުން ވަނީ ސަލާމަތްކޮށްފައި
-
ނުފެންނަނީ މުޝްފިގް
ފާހަގަކޮށްލެވޭ - 'ދައުރު'އާ ވާހަކަދައްކަވަމުން ތ. ކަނޑޫދޫ ކައުންސިލްގެ ރައީސް އަހުމަދު ރީހާން ރޭ ވިދާޅުވީ އެ ބޯޯޓުގައި އަލިފާން ރޯވީ ކަނޑޫދުއަށް ވަދެ މުދާ އަރުވައިގެން ހިރިލަންދުއަށް ގޮސް، އެ ރަށުން ފުރި ފަހުން ކަމަށެވެ.
އެ ބޯޓުގައި ކިހާ މުދަލެއް ހުރި ކަމެއް އަދި އަލިފާން ރޯވި ސަބަބެއް ސާފެއް ނުވެ އެވެ.