މިއަދާއި މާދަމާ ހަވީރު ވެސް އީދު ހަރަކާތްތައް އޮންނާނެ

ފިތުރު އީދާ ގުޅިގެން ބާއްވާ ހަރަކާތްތައް މިއަދާއި މާދަމާ ވެސް އޮންނާނެ ކަމަށް އެމްއެންޑީއެފުން ބުނެފި އެވެ.

ވީ ކިހިނެއް؟ - އީދުގެ މުނާސަބަތުގައި އެމްއެންޑީއެފް އާއި ފުލުހުން އަދި ސަރުކާރު ހިއްސާވާ ކުންފުނިތައް ބައިވެރިވެގެން އިއްޔެ ކުރިއަށްގެންދިޔަ 'އީދު ހަވީރު 1446' ބޮޑު ތަރުހީބެއް ލިބުނެވެ.

ތަފްސީލް - އެމްއެންޑީއެފުން ރޭ ބުނީ އެ ހަރަކާތްތައް މިއަދާއި މާދަމާ ހަވީރު 4 އިން 6އަށް ޖުމުހޫރީ މައިދާން އަދި އިސްލާމީ މަރުކަޒު މާބުލް ސަރަހައްދުގައި އޮންނާނެ ކަމަށެވެ.

ސަލްޓަން ޕާކާއި ޖޫމްހޫރީ މައިދާން ސަރަހައްދުގައި އިއްޔެ ކުރިއަށްގެންދިޔަ މި ހަރަކާތަށް ރައީސް މުހައްމަދު މުއިއްޒުގެ ދެކަނބަލުން ވެސް ޒިޔާރަތް ކުރައްވައި ހަވީރުގައި ބައިވެރިވި ކުޑަކުދިންނާ ސަލާމްކުރައްވައި ފޮޓޯ ނަންގަވާފައިވެ އެވެ.

ކުޑަކުދިންގެ ހަވީރުގެ ތެރެއިން އެމްއެންޑީއެފްގެ ހަތިޔާރުތައް ދައްކާލައި ފުލުހުންގެ ވެހިކަލްތައް ދައްކާލައި އެ ތަކެއްޗާ އެކު ފޮޓޯ ނެގުމުގެ ފުރުސަތު ވެސް ވަނީ ދީފަ އެވެ.

މީގެ އިތުރުން:

އީދާ ގުޅުވައިގެން ކުރިއަށްގެންދިޔަ ކުޑަކުދިންގެ ހަވީރުގެ ސްޓޯލުތަކުގައި ކުޑަކުދިން ގަޔާވާނެ ކާޓޫނު ކެރެކްޓާތައް ވެސް ވަނީ ހިމަނައިފަ އެވެ.