ސުއޫދު، މަހާޒު އަދި އަޒްމިރަލްދާ ސަސްޕެންޑްކޮށްފި

ޕާޓީން ވަކިކުރުމުން މަޖިލީހުގެ ގޮނޑި ގެއްލުވައިލެވޭ ގޮތަށް ގާނޫނުއަސާސީއަށް ބަދަލުކުރި މައްސަލައިގެ އަޑުއެހުމަށް ކުޑަ ތަން ވެފައި ވަނިކޮށް ސުޕްރީމް ކޯޓުގެ ތިން ފަނޑިޔާރަކު ޖުޑީޝަލް ސާވިސް ކޮމިޝަން (ޖޭއެސްސީ)ން  ސަސްޕެންޑް ކޮށްފި އެވެ.

ވީ ކިހިނެއް؟ - ސަސްޕެންޑްކުރި ފަނޑިޔާރުންނަކީ:

ތަފްސީލް - ތިން ފަނޑިޔާރުން ސަސްޕެންޑްކުރީ މިއަދު ޖޭއެސްސީން ބޭއްވި ބައްދަލުވުމެއްގަ އެވެ. މިކަން އެ ކޮމިޝަންގެ ސެކްރެޓަރީ ޖެނެރަލް އާމިނަތު ނަދާ ހުސެން 'ދައުރު'އަށް ކަށަވަރުކޮށްދެއްވި އެވެ.

އެނގިފައިވާ ގޮތުގައި، ތިން ފަނޑިޔާރުން ސަސްޕެންޑްކުރީ އެ ފަނޑިޔާރުންނާ ގުޅުން ހުރި މައްސަލަތަކެއް އެންޓި-ކޮރަޕްޝަން ކޮމިޝަން (އޭސީސީ)ން ބަލަމުންދާ ކަމަށް ބުނެ އެވެ.

އެނގުން މުހިންމު - މިއަދުގެ އަޑުއެހުމަށް ތާވަލުކޮށްފައި އޮތީ ގާނޫނުއަސާސީއަށް ފަހުން ގެނައި ބަދަލާ އެއްގޮތަށް މެންބަރުން ވަކިކުރުމުގެ އިޖުރާއަތްތައް މަޑުޖައްސައިލުމަށާއި ފަނޑިޔާރުންނާ މެދު ފިޔަވަޅު އެޅުން މަޑުޖައްސާލުމަށް އެދިފައިވާ ވަގުތީ އަމުރުތަކުގެ ކަންތަކެވެ.

އެ އަޑުއެހުން ތާވަލުކުރީ މިއަދު ހެނދުނު 11 ޖަހާއިރަށެވެ. އޭގެ އިރުކޮޅެއް ކުރިއަށް ތިން ފަނޑިޔާރުން ވަނީ ސަސްޕެންޑްކޮށްފަ އެވެ.

ފަނޑިޔާރުން ސަސްޕެންޑްކުރުމުގެ ކުރިއަށް، ސަރުކާރު ހިންގާ ޕީއެންސީގެ މެޖޯރިޓީ އޮންނަ ރައްޔިތުންގެ މަޖިލީހުން ވަނީ ސުޕްރީމް ކޯޓުގެ ދެ ފަނޑިޔާރަކު މަގާމުން ވަކިކޮށް، އެ ކޯޓުގެ ބެންޗު ހަތަކުން ފަހަކަށް ބަދަލުކުރަން ޖެހޭ ގޮތަށް ގާނޫނު ބަދަލުކުރަން ފާސްކޮށްފަ އެވެ.

މި މަސައްކަތް ވެސް ރައްޔިތުންގެ މަޖިލީހުގެ ތެރެއިން ފެށީ، ގާނޫނުއަސާސީއަށް ގެންނަ ބަދަލުގެ މައްސަލަ ސުޕްރީމް ކޯޓުން ކުރިއަށް ގެންދަން ނިންމާފައި ވަނިކޮށެވެ. މި މައްސަލަ އެ ކޯޓުގައި ބައްލަވަނީ ވެސް ހަތް ފަނޑިޔާރުންގެ ފުލް ބެންޗަކުންނެވެ.