ސަރުކާރުން ޓެކްސީ ހިދުމަތަށް ވަނުމުން 10،000 މީހުންނަށް އަސަރު ކުރާނެ: އަވަސް ރައިޑް

ސަރުކާރުން ޓެކްސީ ހިދުމަތުގެ ތެރެއަށް ވަނުމުން 10،000 މީހުންނަށް އޭގެ ނޭދެވޭ އަސަރުކުރާނެ ކަމަށް ފުޅާ ދާއިރާގައި ޓެކްސީ ހިދުމަތް ދެމުން އަންނަ އަވަސް ރައިޑުން ބުނެފި އެވެ.

ވީ ކިހިނެއް؟ - 'މާލެ ފެހި' ޕްރޮގްރާމްގެ ދަށުން، ތިމާވެއްޓާ ރައްޓެހި އިލެކްޓްރިކް ވެހިކަލް ހިމެނޭ، އީވީ ޓެކްސީގެ ހިދުމަތެއް ދިނުމަށް އެމްޓީސީސީއާ ވަނީ ހަވާލުކޮށްފަ އެވެ. އެ ކުންފުނިން ހިންގާ އާރުޓީއެލް ބަހުގެ ކޮންސެޕްޓަށް ތައާރަފްކުރާނީ 24 ގަޑިއިރުގެ ޓެކްސީ ހިދުމަތެކެވެ.

ތަފްސީލް - އެކަމާ ކަންބޮޑުވުން ފާޅުކޮށް އަވަސް ރައިޑް އެޕްއިން މިއަދު ވަނީ ނޫސް ބަޔާނެއް ނެރެފަ އެވެ. އެ ނޫސް ބަޔާނުގައި ބުނެފައިވަނީ ދައުލަތުގެ އެހީގައި ޓެކްސީ ފްލީޓެއް ތައާރަފްކުރުމަކީ ޓެކްސީ ދުއްވާ ފަރާތްތަކާއި އަދި ކުއްޔަށް ކާރު ދޫކުރާ ފަރާތްތަކުގެ ދިރިއުޅުމަށް ނޭދެވޭ އަސަރުކޮށް ކުދި ވިޔަފާރިތަކަށް ގެއްލުންވެ، މި ދާއިރާގެ ހަމަހަމަ ވާދަވެރިކަން ނެތިގެންދާނެ ކަމެއް ކަމަށެވެ.

އޭގެ އިތުރުން އެ ބަޔާނުގައި ބުނެފައިވަނީ:

"އަހަރުތަކެއްވަންދެން ކުރެވުނު މަސައްކަތުން ބިނާކުރެވުނު މި ދާއިރާއަށް އަމާޒުކޮށް އެޅެމުންދާ އިންސާފުވެރިނޫން ފިޔަވަޅުތަކާ ދެކޮޅަށް އިންސާފަށް ލޯބިކުރާ ހުރިހާ ފަރާތްތަކަށް ގޮވާލަމެވެ. މިނިވަން ޓެކްސީ ޑްރައިވަރުގެ ހައްގުތައް ރައްކާތެރިކުރުމަށް ގާނޫނީ އިމުގެ ތެރެއިން އަޅަންޖެހޭ ހުރިހާ ފިޔަވަޅެއް މި ކުންފުނިން އަޅާނެކަން ކަށަވަރުކޮށްދެމެވެ،" އަވަސް ރައިޑުން ނެރުނު ބަޔާން ނިންމާލަމުން ބުނެފައިވެ އެވެ.

ފާހަގަކޮށްލެވޭ - ސަރުކާރުގެ ޓެކްސީ ހިދުމަތް ދިނުމަށް އެމްޓީސީސީ އާ ހަވާލުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ޓްރާސްޕޯޓް މިނިސްޓަރު މުހައްމަދު އަމީން ވިދާޅުވީ މާލެ ސަރަހައްދުގައި ޓެކްސީގެ ހިދުމަތް ހޯދުމަށް މިހާރު ބޮޑެތި ދަތިތަކެއް އެބަހުރި ކަމަށެވެ. އެގޮތަށް ދިމާވަނީ ޓެކްސީގެ ހިދުމަތް ބަލައި މޮނިޓާކުރެވޭނެ ގޮތެއް މިހާތަނަށް ނެތުމުން ކަމަށް އޭނާ ވިދާޅުވި އެވެ.

އާ ޓެކްސީ ލައިނެއް ތައާރަފުކުރަން ސަރުކާރުން ނިންމީ އެ ހިދުމަތް ހަރުދަނާ ކުރަން ކަމަށާއި "އެ ވިޔަފާރީގެ ތެރެއަށް ވަންނާކަށް ނޫން" ކަމަށް އޭނާ ވިދާޅުވި އެވެ.