ޔޫއެސްއެއިޑުން ރާއްޖެއަށް 15 މިލިއަން ޑޮލަރު ދީފައިވޭ؛ ކޮން ބަޔަކަށް؟

ގައުމުތަކަށް ހިލޭ އެހީދޭ އެމެރިކާގެ މައި އިދާރާ، ޔޫއެސް އެޖެންސީ ފޯ އިންޓަނޭޝަނަލް ޑިވެލޮޕްމަންޓް (ޔޫއެސްއެއިޑް)، ރައީސް ޑޮނަލްޑް ޓްރަމްޕްގެ ސަރުކާރުން ވަގުތީ ގޮތުން ބަންދުކޮށް މިހާރު މުވައްޒަފުން ވަނީ ގެއަށް ފޮނުވާލައިފަ އެވެ. ޔޫއެސްއެއިޑް ހުއްޓާލުމުން އެހެން ގައުމުތަކެކޭ ވެސް އެއްގޮތަށް ރާއްޖެއަށް ވެސް އެ އިދާރާއިން ދެމުން އައި އެހީތައް ވަނީ ހުއްޓިފަ އެވެ. އަދި ބައެއްގެ ވަޒީފާތައް ވެސް ވަނީ ކުއްލިއަކަށްހެން ގެއްލިފަ އެވެ. 

މީގެ އިތުރަށް ޔޫއެސްއެއިޑުން އެކި ގައުމުތަކަށް ދިން އެހީތަކާ މެދު ރައީސް ޓްރަމްޕުގެ ސަރުކާރުން ގެންދަނީ ސުވާލު އުފައްދަމުންނެވެ. 

މިހާތަނަށް ޔޫއެސްއެއިޑުން ރާއްޖެއަށް ހަރަދުކުރީ ކިހާ އަދަދެއްގެ ފައިސާއެއް ހެއްޔެވެ؟ 

ޔޫއެސްއެއިޑްގެ ރަސްމީ ވެބްސައިޓަށް މިހާރު ނުވަދެވޭ ގޮތް ހަދާފައިވީ ނަމަވެސް އެމެރިކާއިން ބޭރުގެ އެކި ގައުމުތަކަށް ދޭ ހިލޭ އެހީތައް އާންމުކޮށް ފެންނަން ހުންނަ ސްޓޭޓް ޑިޕާޓްމަންޓުގެ ފޮރިން އެސިސްޓަންސް ޕޯޓަލްއިން ދައްކާ ގޮތުގައި މިދިޔަ 10 އަހަރުގެ ތެރޭގައި ޔޫއެސްއެއިޑުން ރާއްޖެއަށް ހަރަދުކޮށްފައި ވަނީ 15 މިލިއަން ޑޮލަރެވެ. އެގޮތުން: 

ޕޯޓަލްގެ މައުލޫމާތުތަކަށް ބަލާއިރު މިދިޔަ 10 އަހަރު ތެރޭ ސީދާ ޔޫއެސްއެއިޑުން ރާއްޖެއަށް އެންމެ ބޮޑު އެހީއެއް ދީފައިވަނީ ސިއްހީ ދާއިރާގެ ޕްރޮގުރާމްތަކަށެވެ. އެގޮތުން އެޗްއައިވީ އެއިޑްސްއާ ދެކޮޅަށް މަސައްކަތް ކުރުމާއި ސިއްހީ ދާއިރާއަށް ބޭނުންވާ ސާމާނު ހޯދުން އަދި ކޮވިޑް-19އާ ގުޅިގެން ސިއްހީ ގޮތުން ވެދީފައިވާ އެހީތައް ހިމެނެ އެވެ. އެގޮތުން: 

ދެން އެންމެ ބޮޑު އެހީއެއް ޔޫއެސްއެއިޑުން ދީފައި ވަނީ އެންމެން ޝާމިލްވާ ފަދަ ހަރުދަނާ ޑިމޮކްރަސީއެއް ރާއްޖޭގައި ގާއިމްކުރުމުގެ ޕްރޮޖެކްޓެއް ރާއްޖޭގައި ހިންގުމަށެވެ. 'ސްޓްރޯންގް އެންޑް އިންކްލޫސިވް މޯލްޑިވިއަން ޑިމޮކްރަސީ (ސިމްޑް)ގެ ނަމުގައި 2020ގައި ފެށި އެ ޕްރޮޖެކްޓަށް 3.06 މިލިއަން ޑޮލަރު ހަރަދުކޮށްފައިވެ އެވެ. އޮންލައިންކޮށް ލިބެން ހުރި މައުލޫމާތުތަކަށް ބަލާއިރު:

މީގެ އިތުރުން މޫސުމީ ބަދަލުތަކާއި ކާރިސާތަކުން އަރައިގަތުމަށް ކުރާ މަސައްކަތްތަކަށް ވެސް ޔޫއެސްއެއިޑުން އެހީ ދީފައިވެ އެވެ. އެގޮތުން، އެ ދާއިރާގެ އެކި ކަންކަމަށް 2.3 މިލިއަން ޑޮލަރު ޔޫއެސްއެއިޑުން އެހީގެ ގޮތުގައި ރާއްޖެއަށް ދިނެވެ. އެފަދަ ގިނަ ޕްރޮޖެކްޓްތަކަށް ބޭނުންވާ ފައިސާ ރާއްޖެއަށް ދީފައި ހުރީ  އދ.ގެ އެކި އެޖެންސީތައް މެދުވެރިކޮށެވެ. 

ޔޫއެސްއެއިޑްގެ އެހީތަކުގެ ތެރެއިން މަދަނީ ޖަމިއްޔާއަކަށް އެންމެ ގިނައިން އެހީ ދީފައި ވަނީ ޓްރާންސްޕޭރަންސީ މޯލްޑިވްއަށެވެ. އެގޮތުން:

ޔޫއެސްއެއިޑުން ނޫން ނަމަވެސް އެމެރިކާގެ ސްޓޭޓް ޑިޕާޓްމަންޓުން ދޭ އެހީގެ އެކި ޕްރޮގްރާމްތައް ވެސް ރާއްޖޭގައި ހިންގަ އެވެ. އެގޮތުން ސްޓޭޓް ޑިޕާޓްމަންޓުން ދޭ އެހީތައް ހިމަނައިގެން އެމެރިކާއިން ރާއްޖެއަށް މިދިޔަ އަހަރު އެހީގެ ގޮތުގައި ޖުމްލަ 4.8 މިލިއަން ޑޮލަރު ދީފަ އެވެ. ސްޓޭޓް ޑިޕާޓްމަންޓުގެ ގިނަ އެހީތަކަކީ ދިވެހި އަސްކަރިއްޔާއަށް ދީފައިވާ އެހީތަކެވެ. 

ފިނޭންސް މިނިސްޓްރީގެ އޮފިޝަލަކު ވިދާޅުވި ގޮތުގައި ޔޫއެސްއެއިޑްގެ ޕްރޮގްރާމްތައް ހުއްޓާލުމުން މި އަހަރު ރާއްޖެއަށް ހިލޭ އެހީގެ ގޮތުގައި ލިބޭނޭ ކަމަށް ޖަހާފައިވާ އަދަދު ދަށަށް ދިޔުމުގެ ފުރުސަތު ވަރަށް ބޮޑެވެ. 

އެމެރިކާގެ މިހާރުގެ ރައީސް ޓްރަމްޕްގެ ސިޔާސަތު ބޮޑަށް ބިނާވެފައި ވަނީ ދުނިޔޭގެ އެހެން ގައުމުތަކާ ދުރުވެ، އެމެރިކާ އެކަހެރިވުމުގެ މައްޗަށެވެ. އެމެރިކާގެ މައި ސަރުކާރުގެ ހަރަދުތައް މާ ބޮޑު ކަމަށް ބުނެ އެ ހަރަދުތައް ކުޑަކުރުމުގެ ފިޔަވަޅުތައް އެޅުން ހަވާލުކޮށްފައި ވަނީ ކުރިން ޓްވިޓާ މިހާރު، އެކްސްގެ ވެރިޔާ މަހުޖަނު އިލޯން މަސްކްއާ އެވެ.

ރައީސް ޓްރަމްޕް ވެސް އަދި މަސްކް ވެސް ބޭނުން ވަނީ ޔޫއެސްއެއިޑް އެކީ ހުއްޓާލާށެވެ.