ސްޓެލްކޯގެ ޓްރާންސްފޯމަރެއް ފަޅާލާ ގެއްލުން ދީފައި
ހުޅުމާލޭ ފޭސް 2ގައި ހުރި ޓްރާސްފޯމަރުތަކަކަށް ގެއްލުން ދީފި
ހުޅުމާލޭ ފޭސް ދޭއްގައި ސްޓެލްކޯ އިން ބަހައްޓާފައިވާ ހައި ވޯލްޓޭޖު ދެ ޓްރާންސްފޯމަރަކަށް ބަޔަކު ގަސްތުގައި ގެއްލުން ދީފައިވާ ކަމަށް އެ ކުންފުނިން މިއަދު ބުނެފި އެވެ.
ވީ ކިހިނެއް؟ - ސްޓެލްކޯގެ މެނޭޖިން ޑިރެކްޓަރު ހުސެން ފަހުމީ މިއަދު 'އެކްސް'ގައި ކުރެއްވި ޕޯސްޓެއްގައި ވިދާޅުވީ، ބަޔަކު ގަސްތުގައި ދިން ގެއްލުމުގެ ސަބަބުން ކަރަންޓު ފޯރުކޮށްދޭ ނެޓްވޯކަށް ގެއްލުންވެފައިވާ ކަމަށެވެ.
ތަފްސީލް - އޭނާ ފާހަގަކުރެއްވި ގޮތުގައި، ހައި ވޯލްޓޭޖު ޓްރާންސްފޯމަރުތަކަށް ގެއްލުން ދީފައިވަނީ ޓްރާންސްފޯމަރުތަކުގެ އޮޕަރޭޝަންތަކުގެ ފަންނީ މައުލޫމާތު އެނގޭ ބައެކެވެ.
ޓްރާންސްފޯމަރުތައް ބަހައްޓާފައި ހުންނަނީ ބައުންޑަރީ ފާރެއްގެ އިތުރުން ޑަބަލް ލޮކްކޮށްފައިވާ އެންކްލޯޒާތަކާ އެކު އެވެ. ނަމަވެސް އެ ތަންތަނަށް ގެއްލުން ދިން މީހުން ގޭޓުތައް ފަޅާލައި ތަޅުތައް ހަލާކުކޮށްލާފައިވާ ކަމަށް ސްޓެލްކޯގެ އެމްޑީ ވިދާޅުވި އެވެ.
Earlier today, two high-voltage (HV) transformers in Hulhumale Phase 2 were deliberately vandalized, resulting in significant disruptions to the electricity network. Despite being protected by boundary walls and double-locked enclosures, the perpetrators breached the gates,… pic.twitter.com/iZt07J8tL3
— Hussain Fahmy (@HussainFahmy09) January 11, 2025
މިފަދަ ހައި ވޯލްޓޭޖު ޓްރާންސްފޯމަރުތަކާ ކުޅެހެދުމަކީ އޭގެ ސަބަބުން ނުރައްކާތެރި ހާދިސާއެއް ހިނގައިފާނެ ކަމެއްކަން ފަހުމީ ފާހަގަކުރެއްވި އެވެ. އެގޮތުން:
-
ކަރަންޓުގައި ޖެހި ސީރިއަސް އަނިޔާއެއް ވުން
-
ކަރަންޓުގައި ޖެހި މަރުުވުން ފަދަ ހިތާމަވެރި ހާދިސާއެއް
ސްޓެލްކޯގެ ހައި ވޯލްޓޭޖު ޓްރާންސްފޯމަރަކަށް ގެއްލުން ދިން މީހަކު ކަރަންޓުގައި ޖެހިގެން މިދިޔަ އަހަރު މަރު ވެސްވި އެވެ.
އެކަން ފާހަގަކުރައްވައި ފަހުވީ ވަނީ ޓްރާންސްފޯމަރުތަކާ ކުޅެހެދުމަކީ އެފަދަ ހާދިސާތައް ހިނގަން މެދުވެރިވާނެ ކަމެއްކަން ހަނދާންކޮށްދެއްވައިފަ އެވެ. އަދި އެފަދަ ކަންތަކަށް އާންމުން ހޭލުންތެރިކަން އިތުރުކުރަން ޖެހިފައިވާ ކަމަށް ވެސް އޭނާ ވިދާޅުވި އެވެ.
އެ މައްސަލަ ތަހުގީގު ކުރަމުންދާ ކަމަށާއި އެފަދަ ކަންތައް ތަކުރާރުވިޔަ ނުދިނުމަށް ފިޔަވަޅުތައް އަޅަމުންދާ ކަމަށް ފަހުމީ ވިދާޅުވި އެވެ.