ވޭޕް މަނާކުރުމާ ގުޅޭގޮތުން ރައީސް: 'އަޅުގަނޑުގެ ނިޔަތް ސާފު'

ރައްޔިތުންނަށް ދަތިކުރަން ނުވަތަ އުނދަގޫކުރުމަށް އެއްވެސް ކަމެއް ނުނިންމަވާ ކަމަށާއި އެ މަނިކުފާނުގެ ނިޔަތް ވަރަށް ސާފުކަމަށް ވިދާޅުވެ، ވޭޕް މަނާކޮށް، ދުންފަތުގެ ބާވަތްތައް އަގުބޮޑުކުރުމުން ކުރިމަތިވެވަޑައިގެންފައިވާ ފާޑުކިޔުންތަކަށް ރައީސް މުހައްމަދު މުއިއްޒު މިއަދު ރައްދު ދެއްވައިފި އެވެ.

ވީ ކިހިނެއް؟ - އެކި ރަށްރަށަށް މިހާރު ކުރައްވާ ދަތުރުފުޅުގައި ގދ. ވާދުއަށް ވަޑައިގެން ވާހަކަފުޅު ދައްކަވަމުން، ރައީސް ވަނީ ބައެއް ނިންމެވުންތަކާ ގުޅިގެން އެ މަނިކުފާނަށް ކުރިމަތިވެވަޑައިގަންނަވާ ފާޑުކިޔުންތަކަށް ނުސީދާކޮށް ރައްދު ދެއްވާފަ އެވެ. އަދި އެފަދަ ކަންކަމުގައި ރައްޔިތުންގެ އެއްބާރުލުމަށް އެ މަނިކުފާނު އެދިވަޑައިގެންނެވި އެވެ.

ރައީސް ވާހަކަފުޅު ދެއްކެވީ ވޭޕް އާއި ދުންފަތުގެ ބައެއް ބާވަތްތައް ރާއްޖެ އެތެރެ ކުރުން މަނާކުރުމާ ގުޅިގެން ބައެއް މީހުން ނުރުހުން ފާޅުކުރާތީ އެކަމަށް އިޝާރާތްކުރައްވަ އެވެ.

ވަކި ކަމެއް ވިދާޅުނުވެ، ވާދޫގެ ޖަލްސާގައި ރައީސް ވިދާޅުވީ "ޒަމާންތަކެއް ވާންދެން ކަމެއް ގޯސްކޮށް ކުރުމަކީ އެކަން ދޫކޮށްލައިގެން ތިބެން ޖެހޭ ސަބަބެއް ނޫން" ކަމަށާއި އެހެންވެ، "މުސްތަގްބަލަށްޓަކައި، ޖީލުތައް ސަލާމަތް ކުރުމަށް ބައެއް އުނދަގޫ ނިންމުންތައް ނިންމަން" ޖެހިވަޑައިގެންނެވި ކަމަށެވެ.

"އަޅުގަނޑުމެންގެ ތެރޭގައި ހުރި އެކިއެކި ވަބާތަކުން ގައުމު ސަލާމަތް ކުރުމަށް، އަޅުގަނޑުމެންގެ ތެރޭގައި  އަަށަގަނެފައި ހުރި، މޫލާފައި ދެވިހިފާފައި ހުރި ބައެއް އާދަތަކުން ހިތްވަރު ލާފައި ސަލާމަތްކޮށްދިނުމުގެ ނިޔަތުގައި ކުރާ ކަންކަން މިއީ،" ރައީސް ވިދާޅުވި އެވެ.

"އެއްގޮތަކަށް ވެސް ރައްޔިތުންނަށް އުނދަގޫކުރުމަށް، ދަތިކުރުމަށް ކުރާ ކަންކަމެއް ނޫން."

އެ މަނިކުފާނު ވިދާޅުވި ގޮތުގައި:

ރައީސް ވިދާޅުވީ ލޯ ކުރިމަތިން ގޯސް ކަމެއް ފެނުމުން އެކަމަށް ނޫނެކޭ ބުނަން ކެރޭ ބަޔަކަށް ވާންޖެހޭ ކަމަށާއި ސަރުކާރުގެ ވިސްނުން ހުރީ ވެސް އެގޮތަށް ކަމަށެވެ. އެހެންވެ، އެކަމުގައި އާއްމުންގެ އެއްބާރުލުމަށް އެ މަނިކުފާނު އެދިވަޑައިގެންނެވި އެވެ.

ވޭޕް އާއި ދުންފަތް އެތެރެކޮށް ވިއްކުމާ ގުޅޭގޮތުން މިފަހުން ގެނައި ބައެއް ބަދަލުތަކުގެ ތެރޭގައި ހިމެނެނީ: