މިއީ ތަރައްގީގެ މަޝްރޫއުތައް ފަށައި އިގްތިސާދު އިއާދަވާނެ އަހަރެއް: ރައީސް

މިއަދު ފެށުނު 2025 ވަނަ އަހަރު ވެގެން ދާނީ، ތަރައްގީގެ މަޝްރޫއުތަކުގެ އަމަލީ މަސައްކަތް ފަށައި އިގްތިސާދު އިއާދަވާނެ އަހަރަކަށް ކަމަށް ރައީސް މުހައްމަދު މުއިއްޒު ރޭ ވިދާޅުވެއްޖެ އެވެ.

ވީ ކިހިނެއް؟ - ރައީސް މިހެން ވިދާޅުވީ، އާ އަހަރުގެ މުނާސަބަތުގައި  ތަހުނިޔާ ދެންނެވުމަށް ރޭ 12 ޖެހިއިރު ފޮނުއްވި އެ މަނިކުފާނުގެ ހިތޯބުގަ އެވެ. އެ ހިތޯބުގައި މިއަހަރަށް އެ މަނިކުފާނު އަމާޒުކުރައްވާ ބައެއް ކަންކަމަށް އަލިއަޅުއްވާލައްވާފައިވެ އެވެ.

ތަފްސީލު - ހިތޯބު ފައްޓަވަމުން ރައީސް ވިދާޅުވީ، 2025 ބައްދަލުކުރަނީ، "އުންމީދުގެ ދަންމަރުތަކާ" އެކު ކަމަށެވެ. އަދި "ތަރައްގީގެ ތަސައްވުރުތަކާއި އިސްލާމީ އަހްވަންތަކަމާ އެކު" ކަމަށް ވެސް އެ މަނިކުފާނު ވިދާޅުވި އެވެ.

އެއާ އެކު، ރައީސް ވިދާޅުވީ:

"މި ހުރިހާ ކަމަކާއެކީގައި ތަރައްގީވެފައިވާ ގައުމުތަކުގެ ސަފަށް ހިޖުރަކުރުމަށް ކުރަހާލެވިފައިވާ ސާފު މަގުޗާޓެވެ. ދިވެހިރާއްޖޭގެ ތަރައްގީގެ ދަތުރުގެ މިއަދުގެ އަމާޒަކީ މި އެވެ،" ރައީސް ވިދާޅުވި އެވެ.

ރައީސް ވިދާޅުވީ 2025 ވަނަ އަހަރު ވާނީ އަމާޒުތަކުގެ އަމަލީ މަސައްކަތް ފަށާނެ އަހަރުގެ ގޮތުގަ އެވެ.

"އެގޮތުން، ރާއްޖޭގެ އެކި ކަންކޮޅުތަކުގައި ތަރައްގީގެ އެކި މަޝްރޫއުތައް ފެށޭނެ އެވެ. ނަތީޖާއަކަށް ވާނީ، އިގުތިސާދީ ފުދުންތެރިކަން އިއާދަވާން ފެށުމެވެ. މަސައްކަތްތެރިންނަށް ފުރުސަތުތައް ހުޅުވިގެންދިއުމެވެ. އެއާ އެކު، އާންމު ތިޔާގިކަމެއް މުޅި ގައުމަށް ލިބެން ފަށާނެ އެވެ،" 2025އަށް އެ މަނިކުފާނުގެ ތަސައްވުރާ ގުޅޭ ގޮތުން ރައީސް ވިދާޅުވި އެވެ.

އޭގެ އިތުރުން، ރައީސް ވިދާޅުވީ:

އެ އަމާޒަށް މަސައްކަތް ކުރަމުގައި ރައްޔިތުންގެ އެއްބާރުލުމަށް ރައީސް އެދިވަޑައިގެންނެވި އެވެ.

މި ހިތޯބުގައި އެ މަނިކުފާނު ވަނީ ރައްޔިތުންނަށް ނަސޭހަތެއް ވެސް ދެއްވާފަ އެވެ. އެއީ:

"އެހެންކަމުން، މި ފެށުނު އާ އަހަރަކީ ތަރައްގީގެ އަހަރަކަށް ހެދުމަށްޓަކައި ކޮންމެ ރައްޔިތަކު ވެސް ކަންކަމާ މެދު ހެޔޮ ރަނގަޅު ވިސްނުން އިސްކުރުމަށް" ރައީސް އިލްތިމާސް ކުރެއްވި އެވެ.

"ރަނގަޅުކުރަން ޖެހޭ ކަންކަމަށް ރަނގަޅު ގޮތުގައި މަގުދެއްކެވުމަށް އެދެމެވެ."

ހިތޯބު ނިންމާލައްވަމުން ރައިސް ވިދާޅުވީ، 2025 ވަނަ އަހަރު ވެގެން ދާނީ ތިޔާގިކަމުގެ އަހަރަކަށް ކަމަށެވެ. އަދި އެންމެން ގުޅިގެން ގައުމީ ތަރައްގީގައި އެއް އަމާޒަކަށް ދަތުރުކުރުމުގެ އަހަރަކަށް ކަމަށް އެ މަނިކުފާނު ވިދާޅުވި އެވެ. 

"[އަދި] ދިވެހިންގެ ރާއްޖޭގެ އަންނަން އޮތް މުސްތަގުބަލަށްޓަކައި ޒިންމާދާރުކަމާ އެކީ ގައުމު ބިނާކުރުމުގެ އަހަރެވެ. އޯގާވަންތަ ﷲ، މި ގޮތުގައި އަޅުގަނޑުމެންނަށް ހެޔޮ ތައުފީގު ދެއްވާށި އެވެ! މި ލޮބުވެތި ވަތަން މިނިވަންކަންމަތީ އަބަދުމެ ލަހައްޓަވާށި އެވެ! އާމީން،" ހިތޯބު ނިންމާލައްވަމުން ރައީސް ވިދާޅުވި އެވެ.