އެމްޑީޕީގެ ދަފްތަރުގައި ތިބި މެންބަރުން 'ވަގަށް' ޕީއެންސީއަށް ވައްދާ ކަމަށް ތުހުމަތުކޮށްފި

އެމްޑީޕީގެ ދަފްތަރުގައި ތިބި މެންބަރުން "ވަގަށް" ވެރިކަން ކުރާ މައި ޕާޓީ، ޕީއެންސީއަށް ވައްދަމުންދަމުންދާ ކަމަށް އެމްޑީޕީން މިއަދު ތުހުމަތުކޮށްފި އެވެ.

ވީ ކިހިނެއް؟- އިލެކްޝަންސްގެ ދަފްތަރުގައިވާ ގޮތުން 50،000 އަށް ވުރެ ގިނަ މެންބަރުންނާ އެކު މިވަގުތު ރާއްޖޭގައި އޮތް އެންމެ ބޮޑު ޕާޓީ އަކީ އެމްޑީޕީ އެވެ. އެމްޑީޕީން މިއަދު ވަނީ ޕީއެންސީއަށް އެ ތުހުމަތު އަމާޒުވާ ގޮތަށް އެ ޕާޓީގެ މެންބަރުން ބަދަލުކުރާ ކަމަށް ތުހުމަތުކޮށް، އެކަން ކުށްވެރިކޮށް ބަޔާނެއް ނެރެފަ އެވެ.

ބުނީ ކީކޭ؟ - އެމްޑީޕީގެ ބަޔާނުގައި ބުނި ގޮތުގައި އެޕާޓީގެ މެންބަރުން ވަގަށް އެހެން ސިޔާސީ ޕާޓީތަކަށް އަދި ވަކިން ހާއްސަކޮށް ޕީއެންސީގެ ދަފްތަރުގައި ހިމަނަމުންދާ ކަމުގެ ޝަކުވާ އެ ޕާޓީއަށް އަންނަނީ ލިބެމުންނެވެ.

"އެގޮތުން ޕީއެންސީއަށް ވަނުމަށް ފޯމު ފުރާފައި ނުވާ މި ޕާޓީގެ ބައެއް އާންމު މެމްބަރުންނާއި ގައުމީ މަޖިލީހުގެ މެމްބަރުން ވެސް އެމްޑީޕީގެ ދަފްތަރުން އުނިކޮށް ޕީއެންސީގެ ހިމަނާފައިވާތީ،" އެކަން ހަރުކަށި އިބާރާތުން ކުށްވެރިކުރާ ކަމަށް އެމްޑީޕީގެ ބަޔާނުގައި ބުނެފައިވެ އެވެ.

"ރައީސް ޑރ. މުހައްމަދު މުއިއްޒު ވިދާޅުވެފައިވާ ގޮތަށް ޕީއެންސީއަށް 100،000 މެންބަރުން ހަމަކުރަން ކަމަށް ބުނެ މީހުންގެ ސޮއި ފޯޖުކޮށްގެން އިލެކްޝަންސް ކޮމިޝަނަށް ފޯމު ހުށަހަޅާފައިވާކަން މިކަމުން އެނގޭއިރު ދައުލަތުގެ ހުރިހާ އިދާރާއަކަށް ނުފޫޒު ފޯރުވައި މިކަން ފޮރުވުމަށް ސަރުކާރުން މަސައްކަތް ކުރަމުންދިޔުމަކީ ކަންބޮޑުވުމެކެވެ." އެމްޑީޕީގެ ބަޔާނުގައި ބުންޏެވެ.

ބަޔާނުގައި އިތުރަށް ބުނީ އެ މައްސަލަ އިލެކްޝަންސް ކޮމިޝަން(އީސީ)އަށް ރަސްމީކޮށް ހުށަޅާނެ ކަމަށެވެ. އޭގެ އިތުރުން ބަޔާނުގައި އިތުރަށް ބުނީ:

"އޭގެ އިތުރުން ސޮއި ފޯޖުކޮށްގެން ޕީއެންސީގެ ދަފްތަރުގައި މީހުން ރަޖިސްޓްރީ ކުރަމުންދާ މައްސަލަތައް ތަހުގީގު ކުރުމަށް" މުއަސައްސާތަކަށް އެމްޑީޕީން ގޮވާލާފައިވެ އެވެ.