ބަންޑާރަނައިބު އަހްމަދު އުޝާމް ވަޒީރުންގެ މަޖިލީހުގެ ބައްދަލުވުމަކަށް ވަޑައިގަންނަވަނީ: ބަދަލު ދޭން ހެދި އެއްބަސްވުންތައް ސައްހަ ނޫން ކަމަށް އޭޖީ ވަނީ ނިންމަވާފައި (ފޮޓޯ/ރައީސް އޮފީސް)
ބަދަލު ދޭން ކުރީ ސަރުކާރުން ހެދި 9 އެއްބަސްވުން އުވާލައިފި
ނިމިދިޔަ އެމްޑީޕީގެ ސަރުކާރުގައި ބަދަލު ދިނުމަށް އަމިއްލަ އެކި ކުންފުނިތަކާ އެކު ސޮއިކޮށްފައިވާ 9 އެއްބަސްވުން ބާތިލް ކަމަށް ކަނޑައަޅައި އެ އެއްބަސްވުންތަކަށް އަމަލުނުކުރަން އެޓާނީ ޖެނެރަލް އަހުމަދު އުޝާމް މިއަދު އިދާރާތަކަށް އަންގަވައިފި އެވެ.
ވީ ކިހިނެއް؟ - ކުރީ ސަރުކާރުން އެކުލަވާލާފައިވާ ބަދަލު ދިނުމާ ގުޅޭ އުސޫލު ބާތިލްކޮށް އެ އުސޫލުގެ ދަށުން ނިންމާފައިވާ ބަދަލު ދިނުމުގެ މައްސަލަތައް ދިރާސާކުރުމަށް ރައީސް މުހައްމަދު މުއިއްޒު ފޮނުއްވި މައްސަލަ ދިރާސާކުރުމަށް ފަހު އޭޖީ އޮފީހުން މިއަދު ނެރުނު ބަޔާނެއްގައި ބުނީ:
-
ބަދަލު ދިނުމަށް އުސޫލު އެކުލަވާލާފައި ވަނީ ގާނޫނުއަސާސީ އާއި ގާނޫނުތަކާ ހިލާފަށް
-
އެ ކޮމިޓީން މައްސަލަތައް ނިންމީ އޮޑިޓާ ޖެނެރަލްގެ ބަހެއް ނެތި ވަކި ފަރާތަކަށް ނުހައްގު މުއްސަނދިކަން ލިބޭ ގޮތަށް
-
އެހެންވެ، އެ އެއްބަސްވުމަކީ ގާނޫނީ ހައިސިއްޔަތެއް ނެތް ބާތިލް އަދި އަމަލުކުރަން ނުޖެހޭ އެއްބަސްވުންތަކެއް ކަމަށް އޭޖީ އޮފީހުން ބުނި
"އެ އުސޫލުގެ ދަށުން، ނިމިދިޔަ ރިޔާސީ ދައުރުގެ ތެރޭގައި ސޮއިކޮށްފައިވާ ... 9 ސެޓުލްމަންޓް އެއްބަސްވުމަކީ، ގާނޫނީ ގޮތުން ބަދެވޭ އެއްބަސްވުންތަކެއް ނޫން ކަމާއި، އެއީ ބާތިލް އެއްބަސްވުންތަކެއްކަން ކަމާ ބެހޭ ދައުލަތުގެ އިދާރާތަކަށް ބަންޑާރަ ނައިބު މިއަދު ވަނީ އަންގަވާފަ އެވެ،" ބަޔާނުގައިވެ އެވެ.
ތަފްސީލް - އޭޖީ އޮފީހުގެ ބަޔާނުގައި ވަނީ ބަދަލު ދޭން އެކުލަވާލި ކޮމިޓީން ނިންމާފައިވާ މައްސަލަތަކުގެ ތަފްސީލް ވެސް ހާމަކޮށްފަ އެވެ. އެގޮތުން ބަދަލުގެ ގޮތުގައި ސީދާ ފައިސާ ދޭން ނިންމާފައި ވަނީ ތިން މައްސަލައެއްގަ އެވެ. އެއީ:
-
1-
ދީބާޖާއަށް - 64 މިލިއަން ރުފިޔާ
-
2-
ޔޫމެޓް ކޮންސްޓްރަކްޝަނަށް - 26 މިލިއަން ރުފިޔާ
-
3-
އަމްސަން އެންޑް ފުޑް ބެވަރޭޖަށް - 5.1 މިލިއަން ރުފިޔާ
އެ ބަދަލުތަކުގެ ޖުމްލަ އަކީ 95.1 މިލިއަން ރުފިޔާ އެވެ.
ދެން ބާކީ ހުރި އެއްބަސްވުންތައް ހަދާފައި ވަނީ ބަދަލުގެ ގޮތުގައި ކުއްޔާއި ޖޫރިމަނާ މާފުކޮށް ދިނުމާއި ފަޅު ރަށްތައް ދޫކުރުން އަދި އެއްބަސްވުންތައް އާކުރުމަށެވެ. އެގޮތުން ނިންމާފައިވާ މައްސަލަތަކަކީ:
-
ލެޝާ ބީޗް ފެރީ ޕްރައިވެޓް ލިމިޓެޑް - ވ. ފޮއްތެޔޮބޮޑުފުށި ކުއްޔަށް ދިނުމަށް ހަދާފައިވާ އެއްބަސްވުން އާކުރުން
-
އެގްޒޯޓިކް ޕްރޮޮޕަޓީޒް - ނ. ރާފުށީގެ ބަދަލުގައި ނ. އެކުޅިވަރު 99 އަހަރަށް ދިނުން އަދި އެ ރަށް ތަރައްގީކުރަން ހަ އަހަރު ދިނުން. ކުރީގެ އެގްރިމަންޓާ ގުޅިގެން ދައްކަން ޖެހޭ ފައިސާ މާފުކޮށްދިނުން.
-
ކްލިއަ ސޭންޑްސް - ތ. ވަންބަދި ކަނި އަދި ފުށި މި ރަށްތައް 50 އަހަރަށް ދީ ތަރައްގީކުރަން ފަސް އަހަރު ދިނުން. ގެއްލުމުގެ ބަދަލުގެ ގޮތުގައި އއ. މާފަރުފަޅު 50 އަހަރަށް ކުއްޔަށް ދީ ތަރައްގީކުރަން ހަތް އަހަރު ދިނުން.
-
ބްލޫ ލެގޫން - އއ. މަޑޫގަލި އެ ކުންފުންޏަށް 50 އަހަރަށް ދިނުން. ބަދަލުގެ ގޮތުގައި 20 މިލިއަން ޑޮލަރު ނުދީ އޭގެ ބަދަލުގައި ރ. ވިލިނގިލި، ތާވަތާ އަދި އޮރިމަސްވަރު 50 އަހަރަށް ދިނުން.
-
ތްރީއޭ ކުންފުނި - ހދ. ހޮޑާފުއްޓަށް ދައްކަން ޖެހިފައިވާ ކުއްޔާއި ޖޫރިމަނާ މާފުކޮށްދިނުން އަދި އެ ރަށް 50 އަހަރަށް ކުއްޔަށް ދޫކުރަން އާ އެއްބަސްވުމެއް ހެދުން.
-
ޖޭއެޗް ރިސޯޓްސް - ހދ. ކުޑަމުރައިދޫ 50 އަހަރަށް ކުއްޔަށް ދޫކުރުން އަދި ކުރީގެ އެއްބަސްވުމުން ދައްކަން ޖެހޭ ކުއްޔާއި ޖޫރިމަނާ ދައްކަން ނުޖެހޭ ގޮތަށް ހެދުން.
ގުޅުންހުރި - މިފަހުން ރައްޔިތުން މަޖިލީހުގެ މާލިއްޔަތު ކޮމިޓީން ނިންމައި މަޖިލީހުން އެޖީ އޮފީހަށް އަންގާފައި ވަނީ ބަދަލު ދޭން ކުރީ ސަރުކާރުން ހެދި އެއްބަސްވުންތައް ބާތިލްކޮށް އެ އެއްބަސްވުންތަކުގެ ދަށުން ދީފައިވާ ބަދަލުތައް އަނބުރާ ހޯދުމަށް އަޅަން ޖެހޭ ގާނޫނީ ފިޔަވަޅުތައް އެޅުމަށެވެ. އަދި އެކަމާ ގުޅިގެން ކުރީގެ ރައީސް އިބްރާހިމް މުހައްމަދު ސޯލިހު އާއި އޭރުގެ އިކޮނޮމިކް މިނިސްޓަރު އަދި އެމްޑީޕީގެ ޗެއާޕާސަން ފައްޔާޒު އިސްމާއިލްގެ މައްޗަށް ތަހުގީގެއް ހިންގަން ވެސް އަންގާފައިވެ އެވެ.
ކޮމެންޓް