ފްރާންސްގެ އާއިލާއަށް ކުރީގެ 2 ބަންޑާރަނައިބުން ގާނޫނީ އެހީ ދެނީ

ފްރާންސްގައި އުޅެން ދަތި ކަމަށް ބުނެ ވިސާއެއް ނެތި ރާއްޖޭގައި އުޅެމުންދާ އެ ގައުމުގެ މުސްލިމު އާއިލާއަށް ގާނޫނީ އެހީތެރިކަން ދިނުމަށް ކުރީގެ ދެ ބަންޑާރަނައިބުން ކަމަށްވާ ދިޔާނާ ސައީދާއި އައިޝަތު އާޒިމާ ޝަކޫރު ނިންމައިފި އެވެ.

ވީ ކިހިނެއް؟ - ފްރާންސްގެ ދެމަފިރިއަކާއި އެ މީހުންގެ ދަރިއަކު ރާއްޖެ އެތެރެވީ މީގެ 12 އަހަރު ކުރިން ޓޫރިސްޓު ވިސާއަކުންނެވެ. ނަމަވެސް ވިސާ އާނުކޮށް ރާއްޖޭގެ އެކި ރަށްރަށުގައި ދިރިއުޅެމުން މިހާރު އިތުރު ދެ ދަރިން ވެސް ތިބެ އެވެ.

އެ މީހުން މި ވަގުތު ތިބީ ތ. ވޭމަންޑޫގަ އެވެ.

ތަފްސީލް - ދިޔާނާ އަދި އާޒިމާ ވެސް ވަނީ ސޯޝަލް މީޑިއާގައި އެ އާއިލާއަށް ގުޅޭނެ ގޮތް ހޯދުމަށް އެދިވަޑައިގެންފަ އެވެ. އަދި މިހާރު ގުޅޭނެ ގޮތް ވެއްޖެ ކަމަށް ވެސް އާޒިމާ ފޭސްބުކްގައި ވިދާޅުވެފައިވެ އެވެ.

ދިޔާނާ މިއަދު 'ދައުރު'އަށް ވިދާޅުވީ އެ އާއިލާގެ ދެ ކުދިންނަކީ ރާއްޖެއަށް އުފަންވެ ރާއްޖޭގައި އުޅެ ބޮޑުވެ ރާއްޖޭގެ ސަގާފަތް ދަންނަ ދެ ކުދިން ކަމަށްވާތީ މިއީ އޭނާ އާއި އާޒިމާގެ ޝައުގުވެރިކަން އޮތް މައްސަލައެއް ކަމަށެވެ. އަދި ވީހާ ވެސް އަވަހަށް އާއިލާއަށް ގުޅި، ގާނޫނީ އެހީތެރިކަން ދޭން ޖެހޭނަމަ ދިނުމަށް ނިންމާފައިވާ ކަމަށް އޭނާ ވިދާޅުވި އެވެ.

"އަޅުގަނޑުމެންގެ އިންޓްރެސްޓް އެބަ އޮތް މި ކޭސްއަށް. އެ އާއިލާއަށް އަޅުގަނޑުމެން މި ދަނީ ކޮންޓެކްޓް ކުރުމަށް މަސައްކަތް ކުރުމުން. އަދި ދޭން ޖެހޭ ކޮންމެ އެހީއެއް، ގާނޫނީ އެހީތެރިކަން ދޭން ޖެހޭ ނަމަ އެ ކަންކަން ފޯރުކޮށްދޭން ވެސް ނިންމާފައިވޭ،" އޭނާ ވިދާޅުވި އެވެ.

އާޒިމާ 'ދައުރު'އަށް ވިދާޅުވީ އާއިލާ ފުރުވާލުމުގެ ކުރިއަށް އެ ފަރާތްތަކުން ފާހަގަކޮށްދޭ ގާނޫނީ ނުކުތާތަކަށް ސަރުކާރުން ފުރުސަތު ދޭން ޖެހޭނެ ކަމަށް ގަބޫލުކުރައްވާ ކަމަށެވެ. އަދި އެ މީހުން މި ވަގުތަށް ފުރުވައިލުން މަޑުޖައްސާލައި ގާނޫނުއަސާސީން ކަށަވަރުކޮށްދޭ ހައްގުތަކަށް ވަކާލާތު ކުރުމަށް ވަގުތު ދިނުމަށް ސަރުކާރުގައި އިލްތިމާސްކުރައްވާނެ ކަމަށް އޭނާ ވިދާޅުވި އެވެ.

"އަޅުގަނޑުމެން ނުދެކެން އެ މީހުން ފޮނުވާލެވެން ވާނެ ކަމަކަށް، ރާއްޖޭގައި އުފަންވެ ދިވެހި ބަހުން ވާހަކަ ދައްކާ، އެހެން ބަހަކުން ވާހަކަ ދައްކަން ނޭނގޭ ކުދިންތަކެއް، އެ އާއިލާ ނުރައްކަލަށް ހުށަހެޅޭ ގޮތަށް ފޮނުވައިލެވިގެން ނުވާނެ. އަޅުގަނޑުމެން އިލްތިމާސްކުރަން އަޅުގަނޑުމެންގެ ހުރި ގާނޫނީ ނުކުތާތަކަށް ފުރުސަތު ނުދީ، ފޮނުވައިނުލަން،" އޭނާ ވިދާޅުވި އެވެ.

ފަސްމަންޒަރު - އިމިގްރޭޝަނުން ބުނެފައިވަނީ ފްރާންސްގެ އާއިލާއިން ވެސް އެދެނީ ރަށްވެހިކަން ނުދެވޭ ނަމަ އެ މީހުން ފުރުވާލުމަށް ކަމަށެވެ. އަދި ފުރައިގެން ދާންވީ ގައުމެއް ވެސް ރާއްޖޭން ނާންގާނެ ކަމަށް ބުންޏެވެ.

ރަށްވެހިކަމަށް އެދުނު ނަމަވެސް ގަވާއިދާ ހިލާފަށް އުޅުނު އާއިލާއަށް ރަށްވެހިކަން ނުދެވޭނެ ކަމަށް ވެސް އިމިގްރޭޝަންގެ މީޑިއާ އޮފިޝަލް ވިދާޅުވި އެވެ.