ލަމްހާ ބަންދުކޮށްދޭން ހުށަހެޅި މައްސަލަ ހައި ކޯޓުން ބޭރުކުރުމުން ފަނޑިޔާރުންގެ މަޖިލީހަށް

އައިޖީއެމްއެޗުގައި މަސައްކަތް ކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސް އޮނެޑް ޕިނެޑާގެ މަރުގެ މައްސަލާގައި ޝަރީއަތް ނިމެންދެން ބަންދުކޮށްފައިވަނިކޮށް ހަލީމަތު ލަމްހާ އަބްދުއްރަހްމާނު ބަންދުން ދޫކޮށްލި މައްސަލަ ބަލައިނުގަންނަން ހައި ކޯޓުގެ ރަޖިސްޓްރާ ނިންމި ނިންމުން މުރާޖައާކޮށްދޭން އެ ކޯޓުގެ ފަނޑިޔާރުންގެ މަޖިލީހަށް ހުށަހަޅަން ޕްރޮސެކިއުޓާ ޖެނަރަލް (ޕީޖީ) އޮފީހުން ނިންމައިފި އެވެ.

ވީ ކިހިނެއް؟ - ލަމްހާ ދޫކޮށްލުމުން އޭނާ އަލުން ބަންދުކޮށްދިނުމަށް އެދި ޕީޖީ އޮފީހުން ހައި ކޯޓަށް ހުށަހެޅީ މި މަހުގެ 14ގަ އެވެ. އެ މައްސަލަ ބަލައިނުގަތުމަށް ނިންމާ މިދިޔަ ބުދަ ދުވަހު އެ ކޯޓުގެ ރަޖިސްޓްރާ ވަނީ އެ މައްސަަލަ ބޭރުކޮށްލާފަ އެވެ.

އެ މައްސަލަ ބަލައިނުގަތުމަށް ނިންމެވި ސަބަބަކަށް ރަޖިސްޓްރާގެ ނިންމުމުގައި ވަނީ ބަންދުން ދޫކޮށްލުމުގައި ދަށު ކޯޓުގެ ފަނޑިޔާރު ގާނޫނީ ގޮތުން ހަދާފައިވަނީ ކޮން ގޯހެއްކަން ޕީޖީ އޮފީހުން ހުށަހެޅި އިސްތިއުނާފްގައި ބަޔާންކޮށްދީފައި ނުވާތީ ކަމަށެވެ.

ބުނީ ކީކޭ؟ - ރަޖިސްޓްރާ ނިންމަވާ ނިންމެވުމަކާ މެދު ހިތްހަމަނުޖެހޭ ނަމަ އެ ނިންމުން މުރާޖައާ ކުރަން ފަނޑިޔާރުންގެ މަޖިލީހަށް ހުށަހެޅުމުގެ ފުރުސަތު އޮވެ އެވެ.

ޕީޖީ އޮފީހުން މިއަދު 'ދައުރު'އަށް ބުނި ގޮތުގައި، ރަޖިސްޓްރާގެ ނިންމުން މުރާޖައާކޮށްދިނުމަށް ފަނޑިޔާރުންގެ މަޖިލީހަށް މިއަދު ހުށަހަޅާނެ އެވެ.

ދައުލަތުން ބުނަނީ ލަމްހާ ޝަރީއަތް ނިމެންދެން ބަންދުކުރަން މީގެ ކުރިން އަމުރުކުރި ހާލަތު އަދިވެސް ބަދަލުނުވާ ކަމަށާއި އޭނާގެ ފުށުން މުޖުުތަމައުއަށް އޮތް ނުރައްކާ ކުޑަނުވާ ކަމަށެވެ.

އެކަމަކު ކްރިމިނަލް ކޯޓުގައި މި މައްސަލަ ބައްލަވާ ގާޒީ ހުސެއިން ފާއިޒް ރަޝާދު ލަމްހާ ބަންދުން ދޫކޮށްލީ ދައުލަތުގެ ގިނަ ހެކިންތަކެއްގެ ހެކިބަސް ނެގިފައިވާތީ އާއި ބާކީ ތިބި ހެކިންނަކީ ބަންދުން ދޫކޮށްލިޔަސް ހެއްކަށް ނުފޫޒު ފޯރުވުމުގެ ފުރުުސަތު ކުޑަ ހެކިތަކަކަށް ވުމުންނެވެ.

އެނގުން މުހިންމު - ޝަރީއަތް ނިމެންދެން ބަންދުކޮށްފައި ވަނިކޮށް ލަމްހާ ފުރަތަމަ ބަންދުން ދޫކޮށްލާފައިވަނީ މިދިޔަ އަހަރުގެ ނޮވެމްބަރުގަ އެވެ. އެކަމަކު އޭނާ އަލުން ބަންދުކުރަން އެ އަހަރުގެ ޑިސެމްބަރު މަހު ހައި ކޯޓުން އަމުރުކުރުމާ ގުޅިގެން މިމަހުގެ 12 ވަނަ ދުވަހާ ހަމައަށް ހުރީ ޝަރީއަތް ނިމެންދެން ބަންދުކޮށްފަ އެވެ.

ޝަރުތުތަކާ އެކު ތިން މަސްދުވަހަށް ލަމްހާ އަނެއްކާވެސް މިހާރު ބަންދުން ދޫކޮށްލާފައިވަނީ އެ މައްސަލައިގެ ޝަރީއަތް ލަސްވެ ހައްގުތަކަށް ހުރަސްއެޅެމުންދާ ކަމަށް ބުނެ ބަންދު މުރާޖައާ ކޮށްދިނުމަށް އޭނާގެ ފަރާތުން އެދުމުންނެވެ.