ކުރެންދޫ 2 ވަނަ ފަހަރަށް ފެނުއަޑިއަށް؛ ސަލާމަތަށް އެއްވެސް ކަމެއް ނުކުރެވުނު

އިއްޔެއާ ހަމައަށް، ޅ. ކުރެންދޫގެ ޒުވާނުން ހަނދާންވާ ގޮތުގައި، ވިއްސާރައެއްގައި އެ ރަށަށް އެންމެ ބޮޑު ގެއްލުމެއް ލިބުނީ މިދިޔަ އަހަރެވެ. އެކަމަކު މިހާރު އެ ޒުވާނުން ބުނާ ގޮތުގައި، އިއްޔެ އެ ރަށަށް ކުރި ވިއްސާރައިގައި ލިބުނުވަރުގެ ބޮޑު ގެއްލުމެއް އަދި ނުލިބެ އެވެ. މިދިޔަ ދެ އަހަރު ކުރި ވިއްސާރައިގައި ވެސް މުޅި ކުރެންދޫ އޮތީ ފެނު "އަޑީގަ" އެވެ.

"މިދިޔަ އަހަރާ ބަލާއިރު މި އަހަރު ވަރަށް ބޮޑު ގެއްލުމެއް ލިބިއްޖެ. ވަރަށް ގިނަ ގެތަކަށް ފެންވަދެ، ވަރަށް ގިނަ ސާމާނު ހަލާކުވެއްޖެ،" ކުރެންދޫ ކައުންސިލް މެމްބަރު ހުސެން ޒާހިދު މިއަދު ވިދާޅުވި އެވެ.

މިދިޔަ އަހަރުގެ ސެޕްޓެމްބަރު މަހުގެ ތެރޭގައި އެ ރަށުގައި ފެންބޮޑުވީ މެދުނުކެނޑި ހަތް ގަޑިއިރު ބޯކޮށް ވާރޭވެހުމަށް ފަހު އެވެ. އެ ވިއްސާރައިގައި ރަށުގެ ވަރަށް ގިނަ ގެއަކަށް ފެންވަދެ، ހިފާ ގެންގުޅޭ ސާމާނާއި އިލެކްޓްރޯނިކް ތަކެއްޗާއި އެހެނިހެން މުދަލަށް ގެއްލުންވި އެވެ.

އެކަމަކު އިއްޔެ އެ ރަށަށް ވާރޭ ވެހުނީ، ކުރީ އަހަރާ ބަލާއިރު ނިސްބަތުން މަދު ވަގުތުކޮޅަކަށެވެ. އެގޮތުން، ޒާހިދު ވިދާޅުވި ގޮތުގައި، ބޯކޮށް ވާރޭ ވެހުނީ ތިން ގަޑިއިރަށެވެ. އޭގެ ކުރިން ދެ ގަޑިއިރު ތުނިކޮށް ވެހުނެވެ. ހަވީރު ވާރޭ ހުއްޓާލި އިރު، މަގުމަތީގައި އޮތީ ތިން ފޫޓަށް ފެންބޮޑުވެފަ އެވެ. ގާތްގަނޑަކަށް 120 ގޭގައި އެއްކޮށް ފެންބޮޑުވެ، ގިނަ އަދަދެއްގެ މުދާ ހަލާކުވި އެވެ.

ހާލުގައި ޖެހުނު މީހުންނަށް ސްކޫލުގައި ވަގުތީ ހިޔާ ގާއިމްކޮށް، މިއަދު ވެސް ވަނީ 150 މީހުންނަށް ކައުންސިލުން ކާއެއްޗެހި ފޯރުކޮށްދީފަ އެވެ. އެކަމަކު އެއަށް ވުރެ ބޮޑަށް މިއަދު ކުރެންދޫ މީހުންގެ ކަންބޮޑުވުމަކީ ދެން މި ފަދަ ކޮޅިގަނޑެއް ލައިގެންފި ނަމަ، ލިބޭނެ ގެއްލުމާ މެދު އެވެ. މިދިޔަ ވިއްސާރައިގައި ހަލާކުވި ބައެއް މުދާ، ދައުލަތުން އެހީގެ ގޮތުގައި ލިބުނު ފައިސާއިން ގަނެފައި ވާއިރު، އަނެއްކާވެސް މި ވިއްސާރައިގައި ހަލާކުވުމުން، އެކަމާ މެދު ކުރެވޭ ފިކުރު ވެސް އެ މީހުންގެ ބޮޑެވެ.

ގުދުރަތީ ގޮތުން ކުރެންދޫ އުފެދިފައި އޮންނަނީ މެދަށް ތަންކޮޅެއް އަޑިކޮށް، ވަށައިގެން އުސްކޮށެވެ. ހާއްސަކޮށް، ރަށުގެ ކަނޑޫފަލާ ދިމާލުން، އިރުމަތީ ފަރާތް ތިރިކޮށް އޮންނާތީ، ވިއްސާރައިގައި އެ ހިސާބުގަނޑުގައި ފަސޭހައިން ފެންބޮޑުވެ، ގެތަކަށް ގެއްލުންވެ އެވެ. އާއްމު ވިއްސާރަތަކުގައި ވެސް ކުރެންދު އަކީ ފަސޭހައިން ފެންބޮޑުވާ ރަށެކެވެ.

އެކަމަކު ކުރެންދޫ މީހުން ބުނާ ގޮތުގައި، މި ފަހަކަށް އައިސް، ވިއްސާރައިގައި ފެންބޮޑުވާ މިންވަރު ވަނީ ވަރަށް ބޮޑަށް މަތިވެފަ އެވެ. އޭގެ ހަގީގީ ސަބަބު ހޯދުމަށް، ރަށު ކައުންސިލުން އިސް ނަގައިގެން ދިރާސާއެއް ކުރަން ނިންމާފައިވާއިރު، ރަށުގެ ތަޖުރިބާކާރުން ލަފާކުރާ ގޮތުން، ހާލަތު އެހާ ގޯސްވެފައިވަނީ އެކި މަޝްރޫއުތަަކަށް މަގުތައް ކޮންނާތީ އެވެ.

"އަޅުގަނޑުމެންގެ ތެރޭގައި މިކަމާ ގުޅޭ ގޮތުން މަޝްވަރާކުރި އިރު ބޮޑަށް ބުރަވެވުނީ ކަރަންޓުލުން ފަދަ ކަންކަމަށް މަގުތައް ކޮންނާތީ ކަމަށް މިހާ ފެންބޮޑުވާން ފެށީ. އެކަމަކު އޭގެ ހަގީގީ ސަބަބު ޖެހޭނީ ދިރާސާއެއް ހަދައިގެން ދެނެގަންނަން،" ޒާހިދު ވިދާޅުވި އެވެ.

ކައުންސިލުން ވަނީ އެކަން ސަރުކާރުގެ ސަމާލުކަމަށް ވެސް ގެނެސްފަ އެވެ. ވިއްސާރައިގައި ބޮޑެތި ގެއްލުންތައް ވާތީ، އެކަމަށް ހައްލު ހޯދައިދިނުމަށް މާ ކުރިއްސުރެ ސަރުކާރުގައި އެދެމުން އަންނަ ކަމަށް ވެސް ކައުންސިލުން ބުންޏެވެ. އެގޮތުން ރަށުގެ ފެންބޮޑުވާ މަގުތައް ފާހަގަކޮށް، ކުރެހުންތައް ސަރުކާރަށް ހުށަހަޅާފައިވާ ކަމަށް ވެސް ޒާހިދު ވިދާޅުވި އެވެ.

މިދިޔަ އަހަރުގެ ވިއްސާރައިގެ ހާދިސާއާ ގުޅިގެން، ކުރެންދޫ ކައުންސިލުން ވެސް ވަނީ މި ފަދަ ހާލަތެއް ތަކުރާރު ވިޔަ ނުދިނުމަށް މަސައްކަތްތަކެއް ކޮށްފަ އެވެ. އެގޮތުން، ފެންބޮޑުވާ މަގުތަކުގައި ހޮޅިލައި، މޫދަށް ކާނުކޮނެ، ފެންގަނޑު ހިނދޭ ގޮތަށް ކޮންނަން މަސައްކަތް ކުރި ކަމަށް ކައުންސިލުން ބުންޏެވެ. އެކަމަކު ސަރުކާރުން އެކަމަށް ހައްލު ގެންނާނެ ކަމުގެ ކޮޅުމަތި ފެނުމުން، 'ބޭކާރު ކަމަކަށް ވެދާނެތީ' ކައުންސިލްގެ މަސައްކަތް ބެހެއްޓީ ކަމަށް ޒާހިދު ވިދާޅުވި އެވެ.

"އެކަމަކު ސަރުކާރުން ވެސް ފަހުން ހަބަރެއް ނުވި. އަޅުގަނޑުމެންނަށް ގަބޫލު ކުރެވޭ ގޮތުން ދެން ދުވަހަކު ވެސް އެކަމެއް ނުވާނެ،" އޭނާ ވިދާޅުވި އެވެ.

ކޮންމެ ގަދަ ވިއްސާރައެއްގައި ވެސް، މިހާރު ކުރެންދޫ އަކީ ބޮޑެތި ގެއްލުންތަކެއް ލިބިދާނެ ކަމަށް ބެލެވޭ ރަށެކެވެ. ވިއްސާރައަށް ބަނަކޮށްލުމާއެކު، ބަސްތާ ޖަހައި ގޭތެރެއަށް ފެންގަނޑު ވަނަ ނުދިނުމަށް މީހުން މަސައްކަތް ކުރި ނަމަވެސް، ވިއްސާރަ އަލިކޮށްލާއިރު އޮންނަނީ ބޮޑެތި ގެއްލުންތަކެއް ވެފަ އެވެ. މިހާރު އެ ރަށު މީހުން އެދި ތިބީ، އެކަމަށް ދާއިމީ ހައްލެއް ބަޔަކު ގެނެސްދޭނެ ކަމުގެ އުއްމީދުގަ އެވެ.