2028ގެ ރިޔާސީ އިންތިހާބުގައި ވާދަ ކުރެއްވުމާ މެދު ސޯލިހްގެ ނިންމެވުން ހާމައެއްނުކުރެއްވި

ކުރިއަށް އޮތް ރިޔާސީ އިންތިހާބުގައި ވާދަ ކުރެއްވުމާ މެދު ނިންމަވާފައިވާ ގޮތް އެމްޑީޕީގެ ލީޑާޝިޕްއާ ހިއްސާކުރައްވާފައިވާނެ ކަމަށް ވިދާޅުވެ، އެއީ ކޮން ގޮތެއްކަން ހާމަ ކުރެއްވުމަށް ކުރީގެ ރައީސް އިބްރާހިމް މުހައްމަދު ސޯލިހް މިއަދު ދެކޮޅު ހައްދަވައިފި އެވެ.

ވީ ކިހިނެއް؟ - ސޯލިހް މިގޮތަށް ވިދާޅުވީ، އެ މަނިކުފާނުގެ ވެރިކަން މީގެ އެއް އަހަރު ކުރުން ނިމި، މިހާރު އޮތް ރައީސް މުހައްމަދު މުއިއްޒުގެ ސަރުކާރަށް މިއަދު ފުރުނު އެއް އަހަރުދުވަހުގެ މުނާސަބަތުގައި ރާއްޖެ ޓީވީގެ 'ފަށާއިރު' ޕްރޮގްރާމަށް ދެއްވި އިންޓަވިއުގައި، ޕްރެޒެންޓަރު އާމިރު ސަލީމް 2028ގެ ރިޔާސީ އިންތިހާބާ ގުޅޭ ގޮތުން ކުރި ސުވާލަށް ޖަވާބު ދެއްވަމުންނެވެ.

ތަފްސީލު - ކުރިއަށް އޮތް ރިޔާސީ އިންތިހާބުގައި ވާދަ ކުރެއްވުމުގެ ޝައުގުވެރިކަން އެބަ ހުންނެވިތޯ ނުވަތަ އެމްޑީޕީގެ ރިޔާސީ ޕްރައިމަރީގައި ވާދަ ކުރައްވާނަންތޯ އާމިރު އެހި ސުވާލުގެ ޖަވާބުގައި ސޯލިހް ތަކުރާރުކޮށް ވިދާޅުވަމުން ގެންދެވީ، އެ މަނިކުފާނު އެކަމާ ގުޅޭ ގޮތުން ނިންމަވާފައިވާ ނިންމެވުން ޕާޓީގެ ލީޑާޝިޕްއާ ހިއްސާކުރައްވާފައިވާ ކަމަށެވެ. ނަމަވެސް އެ ނިންމުމާ ގުޅޭ ގޮތުން ތަކުރާރުކޮށް ސުވާލު ކުރުމުން ވެސް އެ މަނިކުފާނު އެކަން ހާމައެއް ނުކުރެއްވި އެވެ.

"އަޅުގަނޑު ތިކަމުގައި އަޅުގަނޑުގެ ސިޔާސީ ހަޔާތާ ބެހޭ ގޮތުން، ކުރިމަގާ ބެހޭ ގޮތުން ޕާޓީގެ އިސްވެރިންނާ އަޅުގަނޑު ވާނީ އެ ވާހަކަ ދައްކާފައި. އެކަން އަޅުގަނޑު ކުރިއަށް ގެންދާނެ ގޮތް އެބޭފުޅުންނަށް އެނގިވަޑައިގަންނަވާނެ މިހާރު، އެއްވެސް ޝައްކެއް ނެތް މިންވަރަށް،" މިވަގުތު އެމްޑީޕީގެ އެޑްވައިޒަރުގެ މަގާމުގައި ހުންނެވި ސޯލިހް ވިދާޅުވި އެވެ.

ސޯލިހް ވިދާޅުވި ގޮތުގައި، އެމްޑީޕީގެ ރިޔާސީ ޕްރައިމަރީގައި ވާދަ ކުރެއްވުމަށްޓަކައި އެ ޕާޓީގެ ރިޔާސީ ޓިކެޓަށް ޝައުވެރިވެވަޑައިގެންނަވާ ފަސް ވަރަކަށް ބޭފުޅުން އެބަތިއްބެވި އެވެ. އެ މަނިކުފާނު އެދިވަޑައިގަންނަވާ ގޮތަކީ ވެސް ޕާޓީ ތެރޭގައި ވާދަވެރި ސިޔާސީ މަސައްކަތް ކުރުން ކަމަށް ވިދާޅުވެ، އެ ފަސް ބޭފުޅުންނަށް ނަސޭހަތެއް ވެސް ދެއްވި އެވެ.

"އަޅުގަނޑަށް ވަރަށް ރަނގަޅު ކަމެއް އެއީ ވާދަވެރި އިންޓާނަލް މަސައްކަތްތައް ކުރުން. އެކަމަކު އަޅުގަނޑު އެ ހުރިހާ ބޭފުޅުންގެ ކިބައިން ވެސް އެންމެ އެދޭ ކަމަކީ ޕާޓީ ހިންގުމުގައި ހުރިހާ ބޭފުޅުން ޝާމިލުވެވަޑައިގަންނަވަން. އަމިއްލަ އިންޓްރެސްޓް އޮންނާނެ، އެކަމަކު އެއާ އެކު، ޕާޓީއައިގެން ކުރިއަށް ވަޑައިގަންނަވާށޭ،" ސޯލިހް ވިދާޅުވި އެވެ.

"މިއަދު އަޅުގަނޑުމެންގެ ގައުމު މިއޮތް ހާލަތަކީ އަދި 28 [2028ގެ ރިޔާސީ އިންތިހާބު] އަންނަން ދެން ކުރަން ޖެހޭ ބައިވަރު މަސައްކަތްތައް އެބަހުރި."

އެ މަނިކުފާނުގެ ވިސްނުމަކީ ފަހަތަށް ޖެހިވަޑައިގެން، އެ ބޭފުޅުންނަށް ފުރުސަތު ދެއްވުންތޯ އަމީރު އެހުމުން ސޯލިހް ސީދާ ޖަވާބެއް ނުދައްވަަ އެވެ.

"އަޅުގަނޑު ދަންނަވާފައި އޮންނާނީ ހުރިހާ ބޭފުޅުންނަށް ކުރިއަށް ވަޑައިގަންނަވާށޭ،" އެ ސުވާލުގެ ޖަވާބުގައި ސޯލިހް ވިދާޅުވި އެވެ.

އެއާ އެކު، ރިޔާސީ އިންތިހާބުގައި ވާދަ ކުރެއްވުމާ މެދު ގޮތެއް ނުނިންމަވަންތޯ އެހުމުން ސޯލިހް ތަކުރާރުކޮށް ވިދާޅުވީ އެ މަނިކުފާނުގެ އެ "ނިންމުން ޕާޓީގެ އިސް ސަފުގައި ތިއްބެވި ވަރަށް ގިނަ ބޭފުޅުންނަށް އެނގިވަޑައިގަންނަވާނެ" ކަމަށެވެ.

"ޕަބްލިކަށް އަޅުގަނޑު ހިތުން، މިއަދު އަޅުގަނޑު އޭގައި ނަގާފައި އޮތް ޑިޒިޝަން ހާމަކޮށްފިއްޔާ، ޕާޓީއަށް ލިބޭ ފައިދާއަށް ވުރެ ގެއްލުން ބޮޑުވެދާނެހެން އަޅުގަނޑަށް ހީވަނީ،" އެ ނިންމުން ހާމަ ކުރެއްވުމަށް މިވަގުތު ދެކޮޅު ހައްދަވައި ސޯލިހް ވިދާޅުވި އެވެ.

ނަމަވެސް، އެ މަނިކުފާނު ވިދާޅުވި ގޮތުގައި، ފަހުން އެ ނިންމުން ހާމަ ކުރައްވާނެ އެވެ.

"އަޅުގަނޑު ނުވާނެ ޕާޓީއަށް ހުރަހަކަށް. ޕާޓީއަށް ވެރިކަން ކާމިޔާބު ކުރުމަށް ހުރަހަކަށް ނުވާނަން،" އެ ސުވާލަށް ފަހު ބަހަކަށް އެ މަނިކުފާނު ވިދާޅުވި އެވެ.