ރައީސް މުހައްމަދު މުއިއްޒު ރައްޔިތުންގެ މަޖިިލީހުން ފާސްކުރި ބިލެއް އިސްލާހު ތަސްދީގުކުރެއްވަނީ: ރޭ އެމަނިކުފާނު ވަނީ ދުންފަތް ކޮންޓްރޯލް ކުރުމުގެ ގާނޫނަށް ގެނައި އިސްލާހު ތަސްދީގު ކުރައްވާފައި (ފޮޓޯ/ރައީސް އޮފީސް)
ދުންފަތުގެ ބިލު ތަސްދީގުކޮށްފި؛ މިރޭ 12އިން ފެށިގެން ވޭޕް އެތެރެކުރުން މަނާވާނެ
ރާއްޖޭގައި ވޭޕް އެތެރެ ކުރުމާއި ބޭނުން ކުރުން އަދި ވިއްކުން މަނާ ކުރުމަށް ދުންފަތް ކޮންޓްރޯލް ކުރުމުގެ ގާނޫނަށް ސަރުކާރުން ހުށަހެޅި އިސްލާހުގެ ބިލު ރައީސް މުހައްމަދު މުއިއްޒު ރޭ ތަސްދީގު ކުރައްވައިފި އެވެ. އެއާ އެކު މިރޭ 12 އިން ފެށިގެން ރާއްޖެއަށް ވޭޕް އެތެރެކުރުން މަނާވާނެ އެވެ.
ވީ ކިހިނެއް؟ - ދުންފަތާ ދެކޮޅަށް ހަރުކަށި ފިޔަވަޅުތަކެއް އެޅުން ހިމެނޭ ގޮތަށް ސަރުކާރުގެ ފަރާތުން ހެންވޭރު އުތުރު ދާއިރާގެ ޕީއެންސީ މެންބަރު އަހްމަދު އައިފާން މިދިޔަ މަހު ފަހުކޮޅު ރައްޔިތުންގެ މަޖިލީހަށް ހުށަހެޅުއްވި އެ ބިލު، ވަރަށް ކުދި ކުދި ބަދަލުތަކާ އެކު މަޖިލީހުން ފާސްކޮށްފައި ވަނީ މިދިޔަ އަންގާރަ ދުވަހުގެ ޖަލްސާގަ އެވެ.
ތިމަވެއްޓާ ބެހޭ ބައިނަލްއަގުވާމީ ބައްދަލުވުން، ކޮޕް ސަމިޓްގައި ބައިވެރިވެވަޑައިގަތުމަށް މި ވަގުތު އަޒަރުބައިޖާންގައި ހުންނެވި ރައީސް މުއިއްޒު، ރޭގެ ވަގުގެއްގައި މި ބިލު ތަސްދީގު ކުރެއްވިކަން ރައީސް އޮފީހުން މިހާރު ވަނީ އިއުލާންކޮށްފަ އެވެ.
ތަފްސީލު- މި ބިލު ރައީސް ތަސްދީގު ކުުރެއްވުމާ އެކު، މިރޭ 12 އިން ފެށިގެން ވޭޕް ރާއްޖެ އެތެރެކޮށްފި ނަމަ، ބޮޑެތި ޖޫރިމަނާތައް އަންނާނެ އެވެ. އޭގެ އިތުރުން އަންނަ މަހު 15 އިން ފެށިގެން ވޭޕް ބޭނުން ކުރުމާއި ވިއްކުން އަދި ބެހުން މަނާވާނެ އެވެ. އަންނަ މަހު 15ގެ ފަހުން އެކަންކަން ކޮށްފި ނަމަވެސް ބޮޑެތި ޖޫރިމަނާ އަންނާނެ އެވެ. އެގޮތުން:
-
ވޭޕް ކުރުމަށް ބޭނުން ކުރާ އާލާތްތަކާއި އެ އެއްޗެއްސަށް ބޭނުން ކުރުމަށް ތައްޔާރުކޮށްފައިވާ އުފެއްދުންތައް އެތެރެކޮށްފި ނަމަ، 50،000ރ. އިން ޖޫރިމަނާ ކުރެވޭނެ؛ އެތެރެކުރި ކޮންމެ އިލެކްޓްރޯނިކް ސިނގިރޭޓް ނުވަތަ ވޭޕް ކުރުމަށް ބޭނުން ކުރާ އާލާތަކަށް 10،000ރ.ގެ މަގުން ޖޫރިމަނާ ކުރެވޭނެ
-
އެފަދަ އާލާތެއް ނުވަތަ އުފެއްދުމެއް ވިއްކައިފި ނަމަ، 20،000ރ. އިން ޖޫރިމަނާ ކުރެވޭނެ؛ ވިއްކި ކޮންމެ އެއްޗަކަށް 10،000ރ.ގެ މަގުން ޖޫރިމަނާ ކުރެވޭނެ
-
އެފަދަ އާލާތެއް ނުވަތަ އުފެއްދުމެއް ހިލޭ ބަހައިފި ނަމަ، 10،000ރ. އިން ޖޫރިމަނާ ކުރެވޭނެ
-
އެފަދަ އާލާތެއް ނުވަތަ އުފެއްދުމެއް ވިއްކީ ނުވަތަ ހިލޭ ބެހީ ކުޑަކުއްޖަކަށް ކަމަށްވާ ނަމަ، އިތުރު 50،000ރ. އިން ޖޫރިމަނާ ކުރެވޭނެ
-
އެފަދަ އުފެއްދުމެއް ބޭނުންކޮށްފި ނަމަ، 5،000ރ. އިން ޖޫރިމަނާ ކުރެވޭނެ
މި ބިލުން ގެނައި އަނެއް ބޮޑު ބަދަލަކީ ސަރުކާރުން ނިންމާފައިވާ ގޮތަށް، ދުންފަތުގެ ބާވަތްތައް ވިއްކޭނެ އެންމެ ހަގު އުމުރަކީ ގާނޫނުގައި އޭރު އޮތް 18 އަހަރުގެ ބަދަލުގައި 21 އަހަރަށް މަތިކުރުމެވެ. އެހެން ކަމުން މިރޭ 12 އިން ފެށިގެން، 21 އަހަރުން ދަށުގެ ޒުވާނުންނަށް ދުންފަތުގެ ބާވަތެއް ވިއްކުމަކީ މަނާ ކަމަކަށްވާނެ އެވެ.
އޭގެ އިތުރުން މަނާ ތަންތަނުގައި ދުންފަތުގެ އިސްތިއުމާލުކޮށްފި ނަމަ، ހަރުކަށި ފިޔަވަޅު އެޅުމަށް ވެސް މި އިސްލާހުގައި ހިމަނާފައިވެ އެވެ.
ކޮމިޓީން ބިލަށް ގެނެސްފައިވަނީ ދެ އިސްލާހެކެވެ. އެއީ:
-
1-
ދައުލަތުގެ އޮފީސްތައް ހިންގާ އިމާރާތާއި އެ ތަންތަނުގެ ގޯތި ތެރޭ ދުންފަތުގެ އިސްތިއުމާލު ނުކުރެވޭ ގޮތަށް ބިލުގައި އޮތް އޮތުން ބަދަލުކޮށް، ގާނޫނުގެ ދަށުން ހަދާ ގަވައިދަކުން ކަނޑައަޅާ ގޮތެއްގެ މަތިން އެކަން ކުރެވޭނެ ފުރުސަތު ދިނުން
-
2-
ރާއްޖެއަށް އެތެރެ ކުރުން މަނާ ކުރާ ދުންފަތުގެ ބާވަތްތަކުގެ ތެރޭގައި، ދުންފަތުން ދުރުހެލިވުމަށް ދެވޭ ފަރުވާގެ ތެރެއިން ދޭ އަދި ފަންނީ އިދާރާތަކުން ހުއްދަ ކުރާ ނިކޮޓިން ރިޕްލޭސްމަންޓް ތެރަޕީ ނުވަތަ ފަރުވާގެ ގޮތުގައި ބޭނުން ކުރާ އެފަދަ އެހެން ބާވަތްތަކަށް އިސްތިސްނާ ދިނުން
ފާހަގަކޮށްލެވޭ ކަމެއް - ކުރީގެ ރައީސް މުހައްމަދު ނަޝީދުގެ ސަރުކާރުގައި އޭރު އޮތް 16 ވަނަ މަޖިލީހުން ފާސްކޮށް، އޮގަސްޓު 2010ގައި އަމަލު ކުރަން ފެށި ދުންފަތް ކޮންޓްރޯލް ކުރުމުގެ ގާނޫނަށް މިވީ، 14 އަހަރުގެ ތެރޭގައި އެއްވެސް އިސްލާހެއް ގެނެެސްފައެއް ނުވެ އެވެ. މިއީ މިވީ 14 އަހަރު ތެރޭ މި ގާނޫނަށް ގެނައި ފުރަތަމަ އިސްލާހެވެ.
މިރޭ 12އިން ފެށިގެން ވޭޕް އެތެރެ ކުރުން މަނާވާ އިރު، ސަރުކާރުން ވަނީ ދުންފަތުގެ ބާވަތްތަކުން ނަގަމުން އައި ޑިއުޓީ ވެސް ބޮޑުތަނުން ބޮޑުކޮށްފަ އެވެ. އެއާ އެކު ކުރިން 100ރ.އަށް ގަންނަން ލިބޭ ސިނގިރޭޓު ފޮއްޓެއްގެ އަގު މިހާރު ލިބެން ހުރީ 230ރ. އިން މަތިންނެވެ.
ކޮމެންޓް (1)
ސިކުނޑި