ދިގުރަށު މަރު: މައްސަލަ ހިނގި ގޮތް ބަލަން ސިންގަޕޫރުގެ ޓީމެއް ރާއްޖެ އަތުވެއްޖެ

އދ. ދިގުރަށް ކައިރިން އެކްސްކާޝަނަށް ދިޔަ ދޯންޏަކުން ފުންމާލި ސިންގަޕޫރުގެ އަންހެން ކުއްޖެއްގެ ގައިގައި ދޯނީގެ ބުރަފަތިން ޖެހި އިއްޔެ މަރުވި ހާދިސާ ހިނގައި ދިޔަ ގޮތް ބެލުމަށް އެ ގައުމުގެ ޓީމެއް މިއަދު ރާއްޖެ އަތުވެއްޖެ އެވެ.

ވީ ކިހިނެއް؟- އިއްޔެ ހެނދުނު ހިނގި އެ ހާދިސާގައި މަރުވެފައިވަނީ، ވޭލް ޝާކްގެ ދިރާސާއަކަށް ސިންގަޕޫރުން އައިސް އުޅުނު 15 އަހަރުގެ އަންހެންކުއްޖެކެވެ. ސިންގަޕޫރުގެ އެސްޓީ ޖޯސެފްސް އިންސްޓްޓިއުޓް (އެސްޖޭއައި)ގައި ކިޔަވާ އެ ދަރިވަރު ރާއްޖެ އައީ، ސްކޫލުގެ ޕްރޮގްރާމެއްގަ އެވެ.

ސިންގަޕޫރު ނޫސްތަކަށް އެ ސްކޫލުން މައުލޫމާތު ދިން ގޮތުގައި އެ ހާދިސާގައި މަރުވެފައިވަނީ ޖެނާ ޗެން ކިޔާ ކުއްޖެކެވެ. އޭނާ ރާއްޖެ އައީ، ސްކޫލުގެ ސާނަވީ ގްރޭޑްގެ، 'ނެޝަނަލް ޔޫތު އެޗީވްމެންޓް އެވޯޑް'ގެ ދަށުން، ހިންގާ ޕްރޮގްރާމެއްގަ އެވެ. މި ޕްރޮގްރާމްގެ ދަށުން މިދިޔަ އަހަރު ވެސް އެ ސްކޫލުގެ ދަރިވަރުން ރާއްޖެ އަ އެވެ.

'ދައުރު'އަށް ޔަގީންވެފައިވާ ގޮތުގައި އެ ހާދިސާ ހިނގައި ދިޔަގޮތް ބެލުމަށް، ސިންގަޕޫރުގެ ޓީމެއް މިހާރު ވަނީ ރާއްޖެ އައިސްފަ އެވެ. އަދި ޖެނާގެ އާއިލާ އާއި ސްކޫލުގެ ބައެއް އިސްވެރިން ވެސް  ރާއްޖެ ވަނީ އައިސްފަ އެވެ.

މި ކަމާ ގުޅޭގޮތުން ފުލުހުން އަދި އިތުރު މައުލޫމާތެއް އާއްމެއް ނުކުރެ އެވެ.