އަންނަ ރިޔާސީ އިންތިހާބުގައި ވާދަ ކުރާނަން؛ އިސްކަންދޭނީ އިގްތިސާދު ހަމައަކަށް އަޅުވަން: ޔާމީން

ހަތަރު އަހަރު ފަހުން، 2028ގައި އޮންނަ ރިޔާސީ އިންތިހާބުގައި ވާދަ ކުރައްވާނެ ކަމަށް އިދިކޮޅު ލީޑަރު، ކުރީގެ ރައީސް އަބްދުﷲ ޔާމީން މިއަދު އިއުލާން ކުރައްވައިފި އެވެ.

ވީ ކިހިނެއް؟ - ކްރިމިނަލް ކޯޓުން އޭރު އިއްވާފައި އޮތް 11 އަހަރުގެ ޖަލު ހުކުމާ ގުޅިގެން މިދިޔަ ރިޔާސީ އިންތިހާބުގައި ވާދަ ކުުރެއްވުމުގެ ފުރުސަތު ގެއްލުނު ޔާމީން، މިކަން އިއުލާން ކުރެއްވި މިއަދު ރާއްޖެ ޓީވީގެ 'ފަށާއިރު' ޕްރޮގްރާމްގައި ކުރިމަތި ކުރުވި ސުވާލުތަކަށް ޖަވާބު ދެއްވަމުންނެވެ.

ތަފްސީލު - ރިޔާސީ އިންތިހާބުގައި ވާދަ ކުރައްވާނެތޯ ޕްރެޒެންޓަރު އާމިރު ސަލީމް އެހުމުން، ޔާމީން ފުރަތަމަ ޖަވާބު ދެއްވީ ސުވާލަކުންނެވެ.

"ކުރިއަށް އޮތް ރިޔާސީ އިންތިހާބަށް އަޅުގަނޑު ޖަލަށް ނުލާނެތޯ؟،" ޔާމީން އެއްސެވި އެވެ.

އެއާ އެކު، އެ މަނިކުފާނު ވިދާޅުވީ އަދިވެސް އުޅުއްވަން ޖެހިވަޑައިގަންނަވަނީ ކޯޓުގައި ހިނގަމުންދާ ޝަރީއަތްތައް ނުނިމިގެން ކަމަށާއި އެކަންކަން އޮތީ މަޑު ޖެހިފައި ކަމަށެވެ.

އެ ދައުވާތަކުން ސަލާމަތްވެވަޑައިގެންފި ނަމަ، އިންތިހާބުގައި ވާދަ ކުރައްވާނަންތޯ ތަކުރާރުކޮށް ސުވާލު ކުރުމުން ޔާމީން ވިދާޅުވީ، އެ މައްސަލަތައް އޭނާއާ ދެކޮޅަށް ނިންމޭނެ އެއްވެސް ސަބަބެއް ނެތް ކަމަށެވެ. އަދި އިންސާފުވެރި ޝަރީއަތެއް ލިބިވަޑައިގެންފި ނަމަ، އެ ހުކުމްތަކުން ސަލާމަތްވެވަޑައިގަންނަވާނެ ކަމަށް ވަރަށް ޔަގީންކަމާ އެކު އެ މަނިކުފާނު ވިދާޅުވި އެވެ.

އެއާ އެކު، ހުކުމެއް ނެތް ނަމަ، އިންތިހާބުގައި ވާދަ ކުރައްވާނަންތޯ ތިން ވަނަ ފަހަރަށް އެހުމުން ޔާމީން ވިދާޅުވީ "ޝައްކެއް ވެސް ނެތް" ކަމަށެވެ.

"އެންމެ އިސްކަމެއް ދީގެން ބަލާނެ ކަމަކީ އިގްތިސާދު ހަމައަކަށް އެޅުވުން. ދެން އިންޑިއާއަށް އަޅުގަނޑުމެން ޑިޕެންޑްވެފައި އޮންނަ އޮތުމާ އެކު، އިންޑިއާއާ ވާހަކަ ދައްކައިގެން އިންޑިއާ އަސްކަރިއްޔާ ބޭލުމާއި ކަނޑުގެ ސަރަހައްދު އަތުލުން. ތިން ވަނަ ކަމަށް އަޅުގަނޑު ބޭނުން ވަނީ ދިވެހި ޒުވާނުންނަށް ވަޒީފާގެ ތަނަވަސް ފުރުސަތުތަކެއް ލިބޭނެ ގޮތަކަށް އިގްތިސޯދު ބައްޓަން ކުރުން،" ވެރިކަން ލިބިވަޑައިގެންފި ނަމަ، އެންމެ އިސްކަން ދޭނެ ތިން ކަމަކީ ކޮބައިތޯ އެހުުމުން ޔާމީން ވިދާޅުވި އެވެ.