ޖީލެއްގެ ތަސައްވުރު ކަނޑައެޅުމުގެ މަސައްކަތް ރައީސް ފައްޓަވައިފި

ދަރުބާރުގޭގެ މައި މައިޒާނުގައި ބަހައްޓާފައި ހުރި ބޮޑު މޭޒު ވަށައިގެން މުޅިން ވެސް ތިބީ އެކި ދާއިރާތަކަށް ނިސްބަތްވާ މީހުންނެވެ. ޓީޗަރުންނާއި ދަރިވަރުންނާއި ސިއްހީ ހިދުމަތްތެރިންނާއި ފަންނުވެރިންނާއި ނުކުޅެދުންތެރިކަން ހުންނަ މީހުންނާއި ޒުވާން ވިޔަފާރިވެރިންނެވެ. ތިމާވެށީގެ ހިމާޔަތުގައި މަސައްކަތްކުރާ މީހުންނާއި އުމުރުން ދުވަސްވީ މީހުންނާއި މަތީ ތައުލީމުގެ ހިއްސާދާރުންނާއި ޓޫރިޒަމް އަދި އިގްތިސޯދީ ތަޖުރިބާކާރުންނެވެ. 

އެ ހުރިހާ އެންމެން އެއްވެ ތިބި މޭޒުގެ ރިޔާސަތުގައި އިންނެވީ ރައީސް މުހައްމަދު މުއިއްޒެވެ.

"މިއަދު އަޅުގަނޑުމެން މި ފެށީ، ޖީލެއްގެ ތަސައްވުރު ކަނޑައެޅުމުގެ މަސައްކަތް،" ރައީސް އިއުލާން ކުރެއްވި އެވެ.

"މިއަދު އަޅުގަނޑުމެން މިއުޅެނީ، ކުރިއަށް އޮތް 20 އަހަރަށް ރާއްޖޭގެ ތަރައްގީގެ އޮނިގަނޑު ކަނޑައަޅަން މަސައްކަތް ފަށަން."

މިއީ ތާރީހީ އަދި ގައުމުގެ ތަރައްގީގައި ބޮޑު މަސައްކަތެވެ. ކުރިއަށް އޮތް 20 އަހަރު ރާއްޖޭގެ ކުރިމަގު ބައްޓަން ކުރާނެ ގޮތް ކަނޑައަޅައި ގާނޫނަކުން ބާރުދޭ ބިޔަ މަސައްކަތެކެވެ. ރައީސް ވިދާޅުވި ގޮތުން ނަމަ، "ސިޔާސީ އޮއެވަރެއްގައި ޖެހިގެން، އަބަދު އަބަދު ބަދަލުތަކެއް އަންނަ ގޮތަށް ގައުމުގެ ތަރައްގީގެ ކަންކަން ދިޔަ ނުދިނުމަށް" ފަށާ މަސައްކަތެކެވެ.

މިއަދު މި ފެށީ، މި ޕްލޭން ކަނޑައެޅުމަށް އާއްމުންގެ ހިޔާލު ހޯދުމުގެ ފުރަތަމަ ފިޔަވައްސެވެ. ރައީސް ބޭނުންވެ ވަޑައިގަންނަވަނީ، މި ޕްލޭނުގައި ކޮންމެ ރަށެއްގެ ވެސް ބަސް ހިމަނާށެވެ. ހުރިހާ އުމުރަކުން، ހުރިހާ ދާއިރާއަކުން، ކޮންމެ ޖަމިއްޔާއަކުން، ކޮންމެ ސިޔާސީ ޕާޓީއަކުން، ހުރިހާ ސްޓޭކް ހޯލްޑަރުން ބަސް ބުނާށެވެ. އިޖްތިމާއީ ގޮތުންނާއި އިގްތިސޯދީ ގޮތުންނާއި ސިޔާސީ ގޮތުންނާއި ތައުލީމި އަދި ސިޔާސީ ގޮތުން ވެސް ކުރިއަށް ދާން ބޭނުންވާ ގޮތް މި ޕްލޭނުން ފެންނާށެވެ.

"މީގެ ސަބަބުން، ސިޔާސީ އޮއެވަރުގައި ޖެހި، އަންނަ ކޮންމެ ސަރުކާރަކުން ބޭނުންވާ ގޮތަކަށް އަމަލެއް ނުކުރެވޭނެ. މިއީ ރައްޔިތުންގެ ބަސް. ސިޔާސީ ގޮތުން ސަރުކާރަށް ގެނެވޭނެ ބަދަލުތައް ވެސް އިން ކަނޑައަޅައި މިންވަރު ބަޔާންކޮށްފައި މީގައި އޮންނާނެ،" ރައީސް ވިދާޅުވި އެވެ.

"ހުރިހާ އެންމެން ބޭނުންވާ ގޮތަށް ކަންކަން ދޭތޯ، މި ޕްލޭނުން ޔަގީން ކުރެވޭނެ."

ގައުމީ ތަރައްގީގެ ޕްލޭން ކަނޑައެޅުމުގެ ފުރަތަމަ ބައްދަލުވުމުން މިއަދު މާލޭގައި ފެށި ނަމަވެސް، މި ފަދަ ބައްދަލުވުންތައް ރާއްޖޭގެ ހުރިހާ ރަށެއްގައި ވެސް ކުރިއަށް އޮތްތަނުގައި ބާއްވާނެ އެވެ.  ރާއްޖޭގެ އެކި ކަންކޮޅުތަކުގައި އޮތް އާއްމު ދިރިއުޅުމުގެ ހާލަތު ދެނެގަނެ، ދާއިރާތަކަށް ކުރިމަތިވެފައިވާ ގޮންޖެހުންތައް ހޯދާނެ އެވެ. އަދި ހެއްކާއި މައުލޫމާތުގެ އަލީގައި، ކަންކަން އިސްލާހުކޮށް، އިލްމީ ނަޒަރަކުން ދެނެގަތުމަށް ދާއިރާތަކުގެ ތަޖުރިބާކާރުންނާއި ބޭރުގެ އެކްސްޕާޓުންގެ އެހީ ހޯދާނެ އެވެ. ސަރުކާރުގެ އަމާޒަކީ، އެންމެ ދާއިރާއެއް ވެސް އުނި ނުވާ ގޮތަށް، ހުރިހާ އެންމެންގެ ބަސް މި ޕްލޭނުގައި ހިމަނާށެވެ.

"މިއީ އެއްގޮތަކަށް ވެސް ސިޔާސީ ކަމެއް ނޫން. މިއީ ކުރިއަށް އޮތް 20 އަހަރަށް ބޭނުންވާ ކަންކަން ކަނޑައެޅުން. 20 އަހަރަކީ ޖީލެއް. އެހެންވެ، އަޅުގަނޑުމެން މި ފެށީ ޖީލެއްގެ ތަސައްވުރު ކަނޑައެޅުމުގެ މަސައްކަތް،" ރައީސް ވިދާޅުވި އެވެ.

އެ މަނިކުފާނު ވިދާޅުވި ގޮތުގައި، ބޭނުންވެވަޑައިގަންނަވަނީ 2040 އަންނައިރު، ރާއްޖެއަކީ ހުރިހާ ގޮތަކުން ވެސް ތަރައްގީވެފައިވާ ގައުމަކަށް ހަދާށެވެ. ޖީޑީޕީގެ މިންގަނޑާއި ހިއުމަން ޑިވެލޮޕް އިންޑެކްސް އަދި އުމްރާނީ ގޮތުންނާއި އިގްތިސޯދީ ގޮތުން ވެސް ކުރީގައި އޮތް ގައުމަކަށް ހަދާށެވެ. އެ ހިސާބަށް ދެވޭނީ، ވަރަށް ގިނަ ދާއިރާތަކުން، ވަރަށް ގިނަ އޭންގަލްތަކަކުން ކަންކަން ރަނގަޅުކޮށްގެން ކަމަށާއި މިއަދު މި ފެށީ އެ މަސައްކަތް ކަމަށް ވިދާޅުވި އެވެ.

ރައީސް ވިދާޅުވި ގޮތުގައި، މި ފަދަ ޕްލޭނެއްގެ މަގްސަދަކީ ގައުމު ތަރައްގީވުމެވެ. ރައްޔިތުން މުއްސަނދިވެ، އެންމެންނަށް ގެދޮރު ލިބުމެވެ. ތަފާތުކުރުމެއް ނެތި އެންމެންނަށް ވެސް ވަޒީފާ ލިބުމާއި ސިއްހީ އަދި ތައުލީމީ ފެންވަރު ރަނގަޅު ކުރުމެވެ. މިއީ، އަހަރުތަކަކަށް ދެމިގެންދާނެ، އޭގެ ފައިދާ އެތައް ބަޔަކަށް ކުރާނެ މަސައްކަތެއްކަން އެ މަނިކުފާނު ފާހަގަ ކުރެއްވި އެވެ.