އަރަބިއްޔާގެ އާ އިމާރާތް ލަސްވަނީ 80 މިލިއަން ރުފިޔާ ސަލާމަތްކުރަން: މިނިސްޓަރު

އަރަބިއްޔާ ސްކޫލުގެ އާ އިމާރާތުގެ މަސައްކަތް ނުފެށި ލަސްވެފައިވަނީ 80 މިލިއަން ރުފިޔާ ބޮޑުކޮށް އެ މަސައްކަތް ކުރަން ބޭނުން ނުވާތީ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު މިއަދު ވިދާޅުވެއްޖެ އެވެ.

ވީ ކިހިނެއް؟ - މިނިސްޓަރު އެހެން ވިދާޅުވީ ދަރުމަވަންތަ ސްކޫލްގެ ހޯލުގެ މަސައްކަތް ގޮސްފައިވާ ހިސާބެއް ބެލުމަށް އެޑިއުކޭޝަން މިނިސްޓަރު މަޖިލީހުގެ މިއަދުގެ ޖަލްސާއަށް ހާޒިރުކުރުމުން، ހިތަދޫ ދެކުނު ދާއިރާގެ އެމްޑީޕީ މެންބަރު އިބްރާހީމް ނާޒިލް ކުރެއްވި، އަރަބިއްޔާ ސްކޫލްގެ މަސައްކަތް ގޮސްފައިވާ ހިސާބަކާ ގުޅޭ ސުވާލަށް ޖަވާބުދެއްވަމުންނެވެ.

މި ސަރުކާރުގެ ފުރަތަމަ 14 ހަފްތާގެ ތެރޭގައި އެ ސްކޫލްގެ މަސައްކަތް ފަށަން އޮތީ ނިންމާފަ އެވެ.

ތަފްސީލް - އެ ސުވާލަށް ޖަވާބު ދެއްވަމުން ޝަފީއު ވިދާޅުވީ ސަރުކާރުގެ ފުރަތަމަ 100 ދުވަހުގެ ތެރޭގައި އެ ސްކޫލްގެ މަސައްކަތް ފަށަން މަސައްކަތް ކުރެއްވި ކަމަށެވެ. އޭނާ ވިދާޅުވީ:

"ސްކޫލްގެ މަސައްކަތް ފަށަން ކުރި މަސައްކަތުން އަޅުގަނޑުމެންނަށް ގަބޫލުކުރެވުނީ ގާތްގަނޑަކަށް ރައްޔިތުންގެ ފައިސާއިން 80 އެތައް މިލިއަން ރުފިޔާ އަގުބޮޑުކޮށްކަން އެކަން ކުރަން ޖެހެނީ،" ޝަފީއު ވިދާޅުވި އެވެ.

"އަޅުގަނޑުމެން އެ ޕްލޭން ކުރި ގޮތަށް މަސައްކަތް ފެށުނީސް ރައްޔިތުންގެ ފައިސާއިން 80 މިލިއަން ރުފިޔާ އަގުބޮޑުކޮށް ކުރިއަށް ގެންދިޔަ ނަމަ. އެހެން ނަމަވެސް ރައްޔިތުންގެ ފައިސާއަކީ އަގުބޮޑު އެއްޗެއް. އަރަބިއްޔާ ކުދިން މިހާރު ވެސް ކިޔަވަމުންދަނީ ދަރުމަވަންތަ ދަރިވަރުން އެތައް އަހަރެއް ވަންދެން ކިޔެވި އިމާރާތުގައި. ހިއުމަން ރައިޓްސްގެ ގޮތުން ވެސް، އެޑިއުކޭޝަންގެ ގޮތުން ވެސް އަދި އެހެނިހެން ގޮތް ގޮތުން ވެސް އަރަބިއްޔާގެ ދަރިވަރުންނަށް މިވަގުތަށް ގެއްލޭ މާ ބޮޑު ކަމެއް ނެތް."

އޭނާ ވިދާޅުވީ އަރަބިއްޔާ ސްކޫލް މަސައްކަތް ފެށުން ލަސްވެފައިވާތީ އެކަން ސްކޫލްގެ އިސްވެރިންނަށް އަންގާފައިވާނެ ކަމަށެވެ.

އެނގުން މުހިންމު - އަރަބިއްޔާގެ އިމާރާތް އެޅުމަށް 381 ނަންބަރު ކޮށި ހަމަޖައްސައި އެކަން އިއުލާނުކޮށްފައިވަނީ މިދިޔަ އަހަރުގެ ނޮވެމްބަރު 21ގަ އެވެ.

އަރަބިއްޔާ ސްކޫލް ޒަމާނީކޮށް، ފުޅާ ދާއިރާއެއްގައި އަރަބި ބަހުން ތައުލީމު ދޭ މަރުކަޒަކަށް ހެދުމާ އެކު، މާލެއިން އެކަށޭނަ ބޮޑު ބިމެއްގައި ޖާގައިގެ ގޮތުން ތަނަވަސް، ޒަމާނީ އާ އިމާރާތެއް ބިނާކޮށް، އެ ތަނަށް އަރަބިއްޔާ ސްކޫލް ބަދަލުކުރުމަކީ ރައީސް މުހައްމަދު މުއިއްޒުގެ 'ދިވެހީންގެ ރާއްޖެ' މެނިފެސްޓޯގައި ހިމެނޭ ރިޔާސީ ވައުދެކެވެ. ވެރިކަމާ ހަވާލުވެވަޑައިގަންނަވާ ގޮތަށް އެ ސްކޫލު އެޅުމުގެ މަސައްކަތް ފެށްޓެވުމަށް ވެސް އެ މަނިކުފާނު ވައުދުވެޑައިގެންފައިވެ އެވެ.

ފަސްމަންޒަރު - އިމާރާތް ބާވެ، ވަގުތީ ސްކޫލެއްގައި ކިޔަވަމުން ދިޔަ އަރަބިއްޔާ ސްކޫލުގެ ދަރިވަރުން މިދިޔަ އޮގަސްޓު މަހު ފެށި ދިރާސީ އާ އަހަރުގައި ވެސް ކިޔަވާނެ ދާއިމީ ސްކޫލެއް ނެތެވެ. އަހަރުގެ ކިޔެވުން އެ ދަރިވަރުން ކުރިއަށް ގެންދަން ޖެހުނީ ދަރުމަވަންތަ ސްކޫލުގެ ވަގުތީ އިމާރާތުގަ އެވެ.

އަރަބިއްޔާގެ އާ އިމާރާތަކީ ނިމިދިޔަ ރައީސް އިބްރާހިމް މުހައްމަދު ސޯލިހްގެ ސަރުކާރުގެ ވެސް ވައުދެކެވެ. އޭރު އެޑިއުކޭޝަން މިނިސްޓްރީން ވަނީ އަރަބިއްޔާ ސްކޫލުގެ އިމާރާތް ބާ ޖަމާލުއްދީން ބިމުގައި އަޅަން ނިންމައި 6.4 މިލިޔަން ރުފިޔާގެ ބަޖެޓެއް އެކަމަށް ކަނޑައަޅާފަ އެވެ. އެކަމަކު އެ ތަނުގެ އަމަލީ މަސައްކަތެއް ސަރުކާރު ބަދަލުވިއިރު ވެސް ފަށާފައެއް ނުވެ އެވެ.

މަސައްކަތް ނުފެށި އޮތް ސަބަބެއް ކަމަށް މިދިޔަ ސެޕްޓެމްބަރު ތެރޭ އެ މިނިސްޓްރީން ބުނީ މާލޭ ސިޓީ ކައުންސިލުން ހުއްދަ ނުދިނުމެވެ. މާލޭގައި ތަނެއް އިމާރާތް ކުރުމުގެ ކުރިން، ތަނުގެ ކުރެހުމަށް ކައުންސިލުން ދޭން ޖެހޭ ހުއްދަ ނުދީ، މަސައްކަތް ގަސްތުގައި ލަސްކުރާ ކަމަށް މިިނިސްޓްރީން ކުރި އެ ތުހުމަތު އެ ކައުންސިލުން ވަނީ ދޮގުކޮށްފަ އެވެ.