އަރަބިއްޔާގެ އާ އިމާރާތަށް ކައުންސިލުން ހުއްދަ ނުދޭ ކަމުގެ ތުހުމަތު

ބާ ޖަމާލުއްދީން ހުރި ބިމުގައި އިމާރާތް ކުރަން ނިންމާފައިވާ އަރަބިއްޔާ ސްކޫލުގެ ކުރެހުމަށް މާލޭ ސިޓީ ކައުންސިލުން ހުއްދަ ނުދީ، ގަސްތުގައި ލަސްކުރާ ކަމުގެ ތުހުމަތު އެޑިއުކޭޝަން މިނިސްޓްރީން މިއަދު ކޮށްފި އެވެ. ނަމަވެސް، ކައުންސިލުން އެކަން ދޮގުކުރެ އެވެ.

ވީ ކިހިނެއް؟ - އިމާރާތް ބާވެ ވަގުތީ ސްކޫލެއްގައި ކިޔަވަމުން ދިޔަ އަރަބިއްޔާ ސްކޫލުގެ ދަރިވަރުން، މިދިޔަ އޮގަސްޓު މަހު ފެށި ދިރާސީ އާ އަހަރުގައި ވެސް ކިޔަވާނެ ދާއިމީ ސްކޫލެއް ނެތެވެ. އަހަރުގެ ކިޔެވުން އެ ދަރިވަރުން ކުރިއަށް ގެންދަން ޖެހުނީ ދަރުމަވަންތަ ސްކޫލުގެ ވަގުތީ އިމާރާތުގަ އެވެ.

އެޑިއުކޭޝަން މިނިސްޓްރީން ވަނީ އަރަބިއްޔާ ސްކޫލުގެ އިމާރާތް، ބާޖަމާލުއްދީން ބިމުގައި އަޅަން މިދިޔަ އަހަރު ނިންމައި، 6.4 މިލިޔަން ރުފިޔާގެ ބަޖެޓެއް އެކަމަށް ކަނޑައަޅާފަ އެވެ. އެކަމަކު އެ ތަނުގެ އަމަލީ މަސައްކަތެއް އަދިވެސް ނުފެށެ އެވެ.

މަސައްކަތް ނުފެށި ލަސްވާތީ އެކަމުގެ އިނގިލި، މިނިސްޓްރީން ދިއްކުރަނީ މާލޭ ސިޓީ ކައުންސިލަށެވެ. އެއީ މާލޭގައި ތަނެއް އިމާރާތް ކުރުމުގެ ކުރިން، ތަނުގެ ކުރެހުމަށް ސިޓީ ކައުންސިލުން ދޭން ޖެހޭ ހުއްދަ ނުދީ، މަސައްކަތް ގަސްތުގައި ލަސްކުރާ ކަމުގެ ތުހުމަތާ އެކުގަ އެވެ.

ތަފްސީލް - އެޑިއުކޭޝަން މިނިސްޓްރީގެ އޮފިޝަލަކު ވިދާޅުވީ އިމާރާތް ކުރެހުމުގައި ދިމާވި މައްސަލައަކާ ގުޅިގެން، ކުރެހުން ބަދަލު ކުރުމަށް ފަހު، ސިޓީ ކައުންސިލްގެ ހުއްދައަށް ހުށަހެޅީ މިދިޔަ މަހުގެ 29ގައި ކަމަށެވެ. އެކަމަކު އެ ކުރެހުން ކައުންސިލުން ގަބޫލުކުރަން ބޭނުން ނުވި ކަމަށާއި ބައެއް ލިޔެކިޔުންތައް މަދު ކަމަށް އެންގި ކަމަށް އޭނާ ވިދާޅުވި އެވެ.

އޮފިޝަލް ވިދާޅުވި ގޮތުގައި:

"އަޅުގަނޑުމެންނަކަށް ނޭނގެ ކުރިން ބޭނުން ނުވާ ޑޮކިއުމަންޓުތަކެއް މިހާރު ބޭނުން ވެގެން އުޅެނީ ކީއްވެގެން ކަމެއް. ބޮޑަށް ބެލެވެނީ ގަސްތުގައި މަސައްކަތް ލަސްކުރުމަށް ކުރާ ކަމެއް ކަމަށް،" އޮފިޝަލް ވިދާޅުވި އެވެ.

އޭނާ ވިދާޅުވީ ސްކޫލު އިމާރާތް ކުރުމަށް ކޮންޓްރެކްޓަރު މިހާރަށް ކުރަން ޖެހޭ މަސައްކަތްތައް ހުރީ ނިމިފައި ކަމަށާއި އެކަމަކު ސްކޫލުގެ އެޅުމުގެ އަަމަލީ މަސައްކަތް ފެށޭނީ ސިޓީ ކައުންސިލުން ކުރެހުމަށް ހުއްދަ ދިނުމުން ކަމަށެވެ.

ކައުންސިލްގެ ބަސް - އެޑިއުކޭޝަން މިނިސްޓްރީގެ ތުހުމަތުތައް ސިޓީ ކައުންސިލުން ދޮގު ކުރެ އެވެ.

ކައުންސިލުން ބުނި ގޮތުގައި، އަރަބިއްޔާ ސްކޫލު އެޅުން ލަސްވަނީ، ކައުންސިލާ ހެދި ކަމަށް މިނިސްޓްރީން ބުނަނީ ދޮގު ވާހަކަތަކެެވެ. އެއާ އެކު، ސިޓީ ކައުންސިލުން ވަނީ، ކުރެހުން ގަބޫލު ނުކުރަން އެ ތަނުން ނިންމި ސަބަބުތައް ހާމަކޮށްފަ އެވެ.

އެޑިއުކޭޝަން މިނިސްޓްރީއަށް މިދިޔަ އަންގާރަ ދުވަހު އެ ތަނުން ފޮނުވި އީ-މެއިލެއްގައި ބުނީ، ކުރެހުން ޗެކްކުރި އިރު ފާހަގަކުރެވުނީ:

ކައުންސިލުން ބުނީ މިކަންކަން ފާހަގަކޮށް، ކުރެހުން އަލުން ހުށަހެޅުމަށް އެޑިއުކޭޝަނަށް އަންގާފައިވާނެ ކަމަށެވެ.