ސީއެޗްއެސްއީގެ މާލޭ އިމާރާތް ރަސްމީކޮށް ހުޅުވައިފި

މާލޭގައި އޭލެވެލްއަށް ކިޔަވައިދެމުން އައި ހަމައެކަނި ސަރުކާރު ސްކޫލް، ސީއެޗްއެސްއީ ރަސްމީކޮށް ރައީސް މުހައްމަދު މުއިއްޒު ރޭ އަލުން ހުޅުއްވައިދެއްވައިފި އެވެ.

ވީ ކިހިނެއް؟ - ގާތްގަނޑަކަށް 40 އަހަރަށް ވުރެ ދިގު މާޒީއެއް އޮތް ސީއެޗްއެސްއީ މާލޭ އިމާރާތް ބަންދުކޮށް، ހުޅުމާލޭގައި އަލަށް ހެދި އިމާރާތަށް ދަރިވަރުންގެ ކިޔެވުން ބަދަލު ކުރީ މީގެ އަހަރެއް ކުރިންނެވެ.

މި ސަރުކާރު ވެރިކަމަށް އައިސް ދަރިވަރުންނާއި ބެލެނިވެރިންގެ އެދުމުގެ މަތިން، މާލޭގެ އިމާރާތުގައި ވެސް ކިޔަވައިދޭން ނިންމި އެވެ. އެއާ އެކު، މިދިޔަ ސެޕްޓެމްބަރު މަސް ތެރޭގައި 400އަށް ވުރެ ގިނަ ދަރިވަރުންނާ އެކު ވަނީ އެ ތަނުގައި ކިޔަވައިދޭން ފަށައިފަ އެވެ.

ތަފްސީލު - ރޭގެ ރަސްމިއްޔާތުގައި ރައީސް މުއިއްޒު، ސްކޫލް ހުޅުވައިދެއްވުމުގެ ކުރިން ސީއެޗްއެސްއީގެ ދަރިވަރުންގެ ފަރާތުން އެ މަނިކުފާނަށް ސްކޫލްގެ އެހާރާއި މިހާރުގެ ހަނދާނީ ރަމްޒެއް އަރުވާފައިވެ އެވެ. ރައީސް މުއިއްޒަކީ ވެސް އެ ސްކޫލްގެ މުސްކުޅި ދަރިވަރެކެވެ.

އެ ރަސްމިއްޔާތުގައި ވާހަކަ ދައްކަވަމުން އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވީ، ސީއެޗްއެސްއީ މާލޭ އިމާރާތުގައި ކިޔަވައިދިނުމަށް ސަރުކާރުން ނިންމި ނިންމުމަކީ ގާތުން ތައުލީމް ދިނުމުގެ ސިޔާސަތު ހަރަދަނާ ވެގެން ދިޔަ ނިންމުމެއް ކަމަށެެވެ.

"ރާއްޖޭގައި އަޅުގަނޑުމެން ދަމަހައްޓަމުން އަންނަ މައިގަނޑު ސިޔާސަތަކީ ކުއްޖާއާ ވީހާ ވެސް ކައިރިން ތައުލީމް ފޯރުކޮށްދިނުން. މި ސީއެޗްއެސްއީ އުވި، ހުޅުމާލޭގައި ސީއެޗްއެސްއީ އުފެދި، ގިނަ ދަރިވަރުންތަކެއް މާލެއިން ސީއެޗްއެސްއީ ހުޅުމާލެއަށް ދަތުރުކުރަން ޖެހުމަކީ ވަރަށް ތަކުލީފު ބޮޑު، އެކަމުގެ އުދަނގޫކަން ގިނަ ރައްޔިތުންނަށް އިހުސާސް ކުރެވުނު ކަމެއް،" އެ ސްކޫލްގެ ކުރީގެ ދަރިވަރު އިސްމާއިލް ޝަފީއު ވިދާޅުވި އެވެ.

ޝަފީއު ވިދާޅުވި ގޮތުގައި، މާލޭ ސީއެޗްއެސްއީ ހުޅުމަށް ވަރަށް ގިނަ ސިޓީތަކާއި ވަރަށް ގިނަ އާދޭހުގެ އެދުންތައް ބެލެނިވެރިންގެ ފަރާތުން މިނިސްޓްރީއަށް ލިބެމުންދިޔަ އެވެ. އެހެންވެ، އެ ޝަކުވާތައް އަޑުއަހައި މާލޭ ސްކޫލް އަލުން ހުޅުވަން ނިންމިކަން އޭނާ ފާހަގަކުރެއްވި އެވެ.

"ވާރޭވެހޭ ދުވަސްތަކުގައި، ހޫނު ގަދަ އަވިގަދަ ދުވަސްތަކުގައި، އެކިއެކި ގަޑިތަކަށް ކުދިން ގޮވައިގެން ސީއެޗްއެސްއީ ހުޅުމާލެއަށް ދިޔުމަކީ، ހަމަ ޔަގީނުން ވެސް އެކަމުގެ އުދަނގުލާއި ތަހައްމަލު ކުރަން ޖެހުނު ވޭން އުފުލަން ޖެހުނު ކަމެއް،" އޭނާ ވިދާޅުވި އެވެ.

މި ނިންމުން ނިންމި ކަމަށްޓަކައި ރައީސް މުއިއްޒަށް މިނިސްޓަރު ޝަފީއު ޝުކުރު އަދާ ކުރެއްވި އެވެ. އަދި ޖަލްސާގައި ވާހަކަ ދެއްކެވި، އެ ސްކޫލުގެ ޕްރިންސިޕަލް އަބްދުﷲ ދީދީ ވެސް ވަނީ ސަރުކާރުގެ ނިންމުމަށް ވަރަށް ބޮޑަށް ތައުރީފުކުރައްވައި ޝުކުރު އަދާ ކުރައްވާފަ އެވެ.

އެނގުން މުހިންމު - ސަރުކާރުން ވަނީ މާލޭ ސްކޫލް ހުޅުވި ނަމަވެސް ކުރިއެކޭ ވެސް އެއްގޮތަށް ހުޅުމާލޭ ސީއެޗްއެސްއީގައި އޭލެވަލް ކިޔެވުން ކުރިއަށް ގެންދިޔުމަށް ނިންމާފަ އެވެ.