ސީއެޗްއެސްއީގެ މާލޭ އިމާރާތުގައި ވެސް އަލުން ކިޔަވައިދޭން ފަށައިފި

މާލޭގައި ގިނަ ދުވަސްތަކެއް ވާންދެން ހިންގި ސީއެޗްއެސްއީގެ ކިޔެވުން ހުޅުމާލެއަށް ބަދަލު ކުރުމަށް ފަހު، ގިނަ ބައެއްގެ އެދުމުގެ މަތިން މާލޭ އިމާރާތް ވެސް ބޭނުންކުރަން ފަށައިފި އެވެ. އެއާ އެކު، މިހާރު މާލެ އާއި ހުޅުމާލޭގައި ވެސް ސީއެޗްއެސްއީއިން އޭ-ލެވެލްއަށް ކިޔަވައިދޭނެ އެވެ.

ވީ ކިހިނެއް؟ - ސީއެޗްއެސްއީގެ ކިޔެވުން ހުޅުމާލެއަށް ބަދަލު ކުރީ، މާލޭގައި ކިޔަވައިދޭތާ 44 ފަހުންނެވެ. އަމީނިއްޔާ ސްކޫލާ އިންވެގެން ހުންނަ ސީއެޗްއެސްއީގެ އިމާރާތް ބަންދުކުރުމަށް ފަހު، ހުޅުމާލޭގައި އަލަށް ހެދި އިމާރާތަށް ދަރިވަރުންގެ ކިޔެވުން ބަދަލު ކުރީ މީގެ އަހަރެއް ކުރިންނެވެ.

އެޑިއުކޭޝަން މިނިސްޓްރީން ބުނީ ބަދަލުތަކަކާ އެކު އަނެއްކާވެސް މާލޭގެ އިމާރާތް ހުޅުވައި އެ ތަނުގައި ކިޔަވައިދޭން ފަށާފައިވާ ކަމަށެވެ. ސީއެޗްއެޗްއެސްއީގެ މާލޭގެ އިމާރާތް އަލުން މި ހުޅުވީ، ގިނަ އަދަދެއްގެ ދަރިވަރުން ހުޅުމާލެއަށް ދަތުރުކުރަން ޖެހޭތީ އުފުލަން ޖެހޭ ތަކުލީފު ބޮޑުވެ، ބެލެނިވެރިން ޝަކުވާ ކުރާތީ އެވެ.

ބުނީ ކީކޭ؟ - "މި ސްކޫލުވެގެންދާނީ ފުރަމާލޭގައި ހުރި މަތީ ސާނަވީއަށް ކިޔަވައިދޭ، އެންމެ ފެންވަރު ރަނގަޅު، އެންމެ ހިތްފަސޭހަ އަދި އުފާވެރި އުނގެނުމުގެ މާހައުލެއް ތަނަވަސްވެފައިވާ ސްކޫލަށް،" ސީއެޗްއެސްއީއަށް ދަރިވަރުން ވަންނަ މަންޒަރު ފެންނަ ފޮޓޯތަކާ އެކު، ފޭސްބުކްގައި ލިޔުއްވަމުން، އެޑިއުކޭޝަން މިނިސްޓަރު އިސްމާއިލް ޝަފީއު ވިދާޅުވި އެވެ.

އޭނާ ވިދާޅުވި ގޮތުގައި މި ބަދަލާ އެކު، އޭ ލެވެލްއަށް ކިޔެވުމަށް މާލެ އާއި ހުޅުމާލެއާ ދެމެދު ދަތުރު ކުރާ ދަރިވަރުންގެ އަދަދު މަދުވާނެ އެވެ. އަދި ގާތުން ތައުލީމު ފޯރުކޮށްދިނުމުގެ ސިޔާސަތު ތަންފީޒުކޮށް، ދަރިވަރުންނާއި ބެލެނިވެރިންނަށް ބޮޑު ފަސޭހައަކަށް ވާނެ ކަަމަށް އޭނާ ވިދާޅުވި އެވެ.

ސީއެޗްއެސްއީގެ ކިޔެވުން ހުޅުމާލެއަށް ބަދަލު ކުރީ މާލޭގައި ހުރި އިމާރާތް ވަރަށް ބޮޑަށް ބާވެ، ޖާގައިގެ ދަތިކަން ކުރިމަތިވުމުންނެވެ. ހުޅުމާލޭގައި ދަރިވަރުންނަށް ތަނަވަސް އިމާރާތަކާއި އެހެން ގިނަ ހިދުމަތްތައް ވެސް ގާއިމް ކުރި އެވެ.