ދައުލަތުގެ މަތީ އިއްޒަތް، މޫސާ އަލީ ޖަލީލަށް ރައީސް މުއިއްޒު މިރޭ އަރުވަނީ (ފޮޓޯ/ ރައީސް އޮފީސް)
މޫސާ އަލީ ޖަލީލަށް ނިޝާން އަސްކަރީ ވެރިކަމުގެ އިއްޒަތް އަރުވައިފި
ކުރީގެ ޑިފެންސް މިނިސްޓަރު މޭޖާ ޖެނެރަލް (ރިޓަޔާޑް) މޫސާ އަލީ ޖަލީލަށް ނިޝާން އަސްކަރީގެ ވެރިކަމުގެ އިއްޒަތް، މިރޭ އަރުވައިފި އެވެ.
ވީ ކިހިނެއް؟ - މި އިއްޒަތް އޭނާއަށް އަރުވާފައި ވަނީ، ނަސްރުގެ ދުވަހުގެ މުނާސަބަތުގައި މިރޭ ދަރުބާރު ގޭގައި ބޭއްވި ހާއްސަ ރަސްމިއްޔާތުގައި ރައީސް މުހައްމަދު މުއިއްޒު އެވެ.
President Dr @MMuizzu conferred the Grand Order of Military Honour (GOMH) on Major General Retired Moosa Ali Jaleel in recognition of his distinguished service to national security and significant contributions to safeguarding the sovereignty of the Republic of Maldives.
— The President's Office (@presidencymv) November 3, 2024
Major… pic.twitter.com/PFeGMpCGyf
ތަފްސީލު - އެ ޖަލްސާގައި އެ އިއްޒަތް އޭނާއަށް އެރުވުމުގެ ކުރިން ރައީސް މިކަމާ ގުޅިގެން ނެރުއްވި ގަރާރު އިއްވާފައިވެ އެވެ. އެ ގަރާރުގައި ބުނީ އޭނާއަށް މި އިއްޒަތް އަރުވަން ރައީސް ނިންމެވީ، ގައުމަށާއި ރައްޔިތުންގެ ސަލާމަތަށްޓަކައި އަސްކަރީ ގޮތުން ކުރެއްވި އަގުހުރި ހިދުމަތްތަކުގެ އަގުވަޒަން ކުރުމުގެ ގޮތުން ކަމަށެވެ. އަދި ގައުމުގެ އިސްތިގުލާލާއި ސިޔާދަތު ރައްކާތެރިކުމަށް އޭނާ ކުރެއްވި މަސައްކަތް ފާހަގަކޮށްފައިވެ އެވެ.
"ހާއްސަކޮށް، 1988 ނޮވެންބަރު މަހުގެ 3 ވަނަ ދުވަހު ރާއްޖެއަށް ކުރިމަތިވި ނުރައްކާތެރި އުދުވާނީ ހަމަލާއާ ގުޅިގެން، ދިވެހި ގައުމާއި ރައްޔިތުންގެ ދިފާއުގައި ކުރެއްވި މަތިވެރި ޖިހާދުގެ އަގު ވަޒަން"ކުރެއްވުމުގެ ގޮތުން އެ އިއްޒަތް އެރުވުމަށް ނިންމި ކަމަށް ޖަލްސާގައި އިއްވި ރައީސްގެ ގަރާރުގައި ބަޔާންކޮށްފައިވެ އެވެ.
ރައީސްގެ ގަރާރު އިއްވަމުން ދިޔައިރު، މޫސަ އަލީ ޖަލީލަށް ކީރިތި ކުރެއްވެމުންދިޔަ އެވެ.
އިއްޒަތް އެރުވުމަށްފަހު، އޭނާގެ މަންމަ އާއި އަބިކަނބަލުން އަދި ހަތަރު ދަރިކަލުންނާ އެކު ރައީސް މުއިއްޒު ވަނީ ފޮޓޯއަކަށް ހުއްޓިވަޑައިގެންފަ އެވެ.
މޫސާ އަލީ ޖަލީލު:
-
ސިފައިންގެ ހިދުމަތާ ގުޅިވަޑައިގެންނެވީ، 1980 ވަނަ އަހަރު ޖުލައި 3ގައި
-
ލާންސްކޯޕަރަލް ރޭންކުން ފެށިގެން ދިވެހި އަސްކަރިއްޔާގެ އިސް މަގާމުތަކެއް އަދާ ކުރައްވާފައިވޭ
-
އޭގެ ތެރޭގައި ގިނަ ޔުނިޓްތަކެއްގެ ކޮމާންޑަރުކަމާއި ކޯސްޓްގާޑުގެ ޑައިރެކްޓާ ޖެނެރަލް ކަމާއި ވައިސް ޗީފް އޮފް ޑިފެންސް ފޯސްގެ މަގާމު އަދާކުރައްވާފައިވޭ
-
އެމްއެންޑީއެފްގެ އެންމެ އިސް ކޮމާންޑަރުގެ މަގާމު ކަމުގައިވާ ޗީފް އޮފް ޑިފެންސްގެ މަގާމު، 6 ނޮވެމްބަރު 2008އިން 9 ފެބްރުއަރީ 2012އަށް އަދާ ކުރެއްވުމަށް ފަހު، 31 އަހަރުގެ ހިދުމަތުން އޭނާ ރިޓަޔާ ކުރެއްވި
-
އޭގެ ފަހުން އޭނާ ވަނީ 2014ގައި ޕާކިސްތާނުގައި ހުންނަވާ ދިވެހި ސަފީރުގެ ކަމުގެ މަގާުމު އަދާ ކުރައްވާފައި
-
އެންމެ ފަހުން އޭނާ ހުންނެވީ ކުރީގެ ރައީސް އަބްދުﷲ ޔާމީންގެ ސަރުކާރުގެ ދެވަނަ ޑިފެންސް މިނިސްޓަރުގެ މަގާމުގައި
ނޮވެމްބަރު 3، 1988 ގައި މޫސާ އަލީ ޖަލީލު ދެއްކެވި ސާބިތުމަކަށް އޭނާއަށް ވަނީ މީގެ ކުރިން ނޮވޮމްބަރު ތިނެއްގެ މެޑަލް އާއި ރައިސްގެ މެޑަލް އަދި މި ނޫނަސް އެކި ކަހަލަ މެޑަލްތައް ލިބިވަޑައިގެންފަ އެވެ.
ކޮމެންޓް