އެލައިޑުން ހުއްޓާލި ކޭޝްލެސް ސާވިސް އަލުން ދޭން ފަށައިފި

ހޮސްޕިޓަލުތަކުން އައުޓް ޕޭޝަންޓުކޮށް ހޯދާ ހިދުމަތްތަކަށް އެލައިޑް އިންޝުއަރެންސް އިން ހުއްޓާލާފައި އޮތް ކޭޝްލެސް ސާވިސް އެ ކުންފުނިން ރޭ އަލުން ދޭން ފަށައިފި އެވެ.

ވީ ކިހިނެއް؟ - ސިއްހީ ހިދުމަތް ދޭ ތަންތަނުން އައުޓް ޕޭޝަންޓްކޮށް ހިދުމަތް ހޯދާ ބަލިމީހުންނަށް ޕްރައިވެޓް އިންޝުއަރެންސް އޮންނަ ނަމަ އާސަންދަ ނުލިބޭ ގޮތަށް މިދިޔަ ހުކުރު ދުވަހު އާސަންދަ ހިދުމަތަށް ވަނީ ބަދަލު ގެނެސްފަ އެވެ.

މި ބަދަލާ އެކު ބައެއް ޕްރައިވެޓް އިންޝުއަރެންސް ކުންފުނިތަކުން ވަނީ އައުޓް ޕޭޝަންޓުކޮށް ހިދުމަތް ހޯދާއިރު ދޭ ކޭޝްލެސް ސާވިސް މެދުކަނޑާލާފަ އެވެ. އެެހެންކަމުން، ޕްރައިވެޓް އިންޝުއަރެންސް އޮންނަ ފަރާތްތަކުގެ އަތުން ހޮސްޕިޓަލުތަކުން މުޅި ހިދުމަތަށް އިއްޔެއިން ފެށިގެން ދަނީ ފައިސާ ނަގަމުންނެވެ.

ކޭޝްލެސް ހިދުމަތް ދިނުން މެދުކަނޑާލާފައި އޮތީ:

ބުނީ ކީކޭ؟ - 'ދައުރު'އަށް އެނގިފައިވާ ގޮތުގައި، އައުޓް ޕޭޝަންޓުކޮށް ބޭސްފަރުވާ ހޯދާ މީހުންނަށް އެލައިޑުން ހުއްޓާލި ކޭޝްލެސް ހިދުމަތް ރޭގެ ވަގުތެއްގައި އަލުން ވަނީ ދޭން ފަށާފަ އެވެ. 

އެ ހިދުމަތް އަލުން ދޭން ފަށައި އެކަން ރޭގެ ވަގުތެއްގައި އަންގާފައިވާކަން އޭޑީކޭއިން ވެސް މިއަދު ވަނީ 'ދައުރު'އަށް ޔަގީންކޮށްދީފަ އެވެ.

އޭޑީކޭގެ ޗީފް މެޑިކަލް އޮފިސަރު ޑރ. އަބްދުﷲ ނިޔާފު ވިދާޅުވީ ކޭޝްލެސް ސާވިސްގެ ހިދުމަތް އެލައިޑުން އަލުން ދޭން ފަށާފައިވާތީ މިއަދުން ފެށިގެން އެ ހޮސްޕިޓަލުން ކޭޝްލެސްކޮށް ކުރިއެކޭ ވެސް އެއްގޮތަށް އެލައިޑް އިންޝުއަރެންސް ކަވާ ކުރަމުންދާނެ ކަމަށެވެެ.

އެލައިޑުން ކޭޝްލެސް ހިދުމަތް އަލުން ދޭން ފެށި ނަމަވެސް ސޮލަރެލް އާއި އަމާނާ ތަކަފުލް އިން އަދިވެސް އޮތީ ކޭޝްލެސްކޮށް ހިދުމަތް ނުދޭ ގޮތަށް ކަމަށް އަފާލް ވިދާޅުވި އެވެ. އެ ހިދުމަތް އަލުން ދޭން ފަށަން އެ ދެ ކުންފުނިން އަދި އަންގާފައި ނުވާތީ އެ ކުންފުނިތަކުގެ އިންޝުއަރެންސް ގެންގުޅޭ ފަރާތްތަކަށް ކޭޝްލެސްގެ ހިދުމަތް އަދި ނުލިބޭނެ އެވެ.

އެނގުން މުހިންމު - އިންޝުއަރެންސް ކުންފުނިތަކުން ކޭޝްލެސް ހިދުމަތް ހުއްޓާލުމުގެ ސަބަބުން އަމިއްލަ ޖީބުން ފައިސާ ދައްކަން ޖެހޭ ކޮންމެ ހާލަތެއްގައި ވެސް، ކުރިއެކޭ އެއްގޮތަށް އާސަންދަ ހިދުމަތް ލިބޭނެ ކަމަށް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން މިއަދު ވަނީ ބުނެފި އެވެ.

އެހެންކަމުން، މިހާރު ކޭޝްލެސް ހިދުމަތް ހުއްޓާލާފައިވާ އޮތް އިންޝުއަރެންސް ގެންގުޅޭ ފަރާތްތަކަށް ވެސް އާސަންދައިން ހިލޭ ބޭސްފަރުވާގެ ހިދުމަތް ކަވާކޮށްދޭން ޖެހޭނެ އެވެ.