ކޫޫއްޑުއަށް ދަތުރުތައް ފަށައިފި؛ ދުވާލަކު 2 ފްލައިޓު

ގއ. ކޫއްޑޫ އެއާޕޯޓުގެ ރަންވޭގެ ހާލަތު ގޯސްވެގެން އެ އެއާޕޯޓަށް ކުރި ދަތުރުތައް މެދުކަނޑާލުމަށް ފަހު މިއަދުން ފެށިގެން އަނެއްކާވެސް ދަތުރުތައް ފަށައިފި އެވެ.

ވީ ކިހިނެއް؟ - ގައުމީ އެއާލައިން، މޯލްޑިވިއަން އިން ބުނީ މިއަދުން ފެށިގެން ކޫއްޑުއަށް ދަތުރުތައް އަލުން ފަށާފައިވާ ކަމަށާއި ދުވާލަކު ދެ ދަތުރު އޮންނާނެ ކަމަށެވެ.

ތަފްސީލް - ކޫއްޑުއަށް ކުރި ދަތުރުތައް މޯލްޑިވިއަން އިން ހުއްޓާލީ ރަންވޭގެ ހާލަތު ދަށްވެގެންނެވެ.

ރަންވޭ ހަލާކުވެ ވަޅުގަނޑު ހެދި، ރަންވޭ މައްޗަށް ހިލަކޮޅުތައް އަރާފައި ހުރުމުގެ ސަބަބުން މޯލްޑިވިއަންގެ ދެ ފްލައިޓެއްގެ އިންޖީނަށް ވެސް މައްސަލަ ޖެހުނެވެ. ދަތުރުތައް ހުއްޓާލީ އޭގެ ފަހުންނެވެ.

އެއާޕޯޓުގެ ރަންވޭގެ މެއިންޓެނެންސް ނުހަދާ ހުރިކަން ސިވިލް އޭވިއޭޝަނުގެ އޮޑިޓުތަކުން ފާހަގަވެފައިވާ ކަމަށް ޓްރާންސްޕޯޓު މިނިސްޓަރު މުހައްމަދުު އަމީން މީގެ ކުރިން ވިދާޅުވި އެވެ. ނަމަވެސް އާންމުންނަށާއި ޓޫރިސްޓުންނަށް ވެސް ދިމާވާނެ ދަތިތަކަށް ބަލައި ފިޔަވަޅު އެޅުން ލަސްކޮށްފައި އޮތީ ކަމަށް މިނިސްޓަރު ފާހަގަކުރެއްވި އެވެ.

ކޫއްޑުއަށް އަލުން މިއަދު ދަތުރު ފެށި އިރު، އެއާޕޯޓުގެ ރަންވޭ މަރާމާތު ކޮށްފައިވަނީ އެ ތަން ހިންގާ ޕްރިސްޓީން އައިލެންޑް އިންވެސްޓުމެންޓުންނެވެ.