މިއަދުގެ މަޖިލިސް ޖަލްސާގައި ފަލާހު ވާހަކަ ދައްކަވަނީ. (ފޮޓޯ/ މަޖިލިސް)
މެމްބަރު ފަލާހުގެ މުސާރައިން %10 ނުނަންގަވަން ނިންމަވައިފި
ރައްޔިތުންގެ މަޖިލީހުގެ މެޖޯރިޓީ ލީޑަރު އަދި ޕީއެންސީ ޕާލިމެންޓްރީ ގްރޫޕުގެ ލީޑަރު އިނގުރައިދޫ ދާއިރާގެ މެމްބަރު އިބްރާހިމް ފަލާހުގެ މުސާރައިގެ %10 ނުނަންގަވަން ނިންމަވައިފި އެވެ.
ވީ ކިހިނެއް؟ - މިއީ ރައީސް މުހައްމަދު މުއިއްޒު ދައުލަތުގެ ހަރަދު ކުޑަކުރަން އަޅުއްވާ ފިޔަވަޅުތަކަށް އެއްބާރުލުން ދިނުމުގެ ގޮތުން ފަލާހު ނިންމެވި ނިންމެވުމެކެވެ.
ބުނީ ކީކޭ؟ - "ރައީސް މުއިއްޒު ގައުމުގެ އިސްތިސާދީ ހާލަތު ރަނގަޅުކޮށް، އާމްދަނީ އިތުރުކޮށް، ހަރަދުތައް ކުޑަކުރުމަށް އަޅުއްވަމުން ގެންދަވާ މުހިންމު ފިޔަވަޅުތަކަށް އެއްބާރުލުން ދިނުމުގެ ގޮތުން އަޅުގަނޑުގެ މަޖިލިސް މުސާރައިން، 1 ނޮވެމްބަރުން ފެށިގެން އެއް އަހަރު ދުވަހަށް %10 އުނިކުރަން ނިންމައިފިން،" ފަލާހު 'އެކްސް'ގައި ކުރެއްވި ޕޯސްޓެއްގައި ވިދާޅުވި އެވެ.
Raees Muizzu qaumu ge iqthisodhee haalathu Rangalhu koh Ammudhanee ithuru koh Haradhu tha kuda kurumah alhuvamun gendhavaa muhihmu fiyavalhu thakah eh baarulun dhinumu ge gothun alhugandu ge majilis musaara in Nov 1 feshi gen 1 aharu dhuvahah 10% unikuran ninmaafin.
— Ibrahim Falah (@IbrahimFalahR) October 24, 2024
އެނގުން މުހިންމު - އަންނަ އަހަރުގެ ބަޖެޓް ހުށަހަޅާއިރު، އިގްތިސާދީ އިސްލާހީ އެޖެންޑާގެ ދަށުން ދައުލަތުގެ ހަރަދުތައް ކުޑަކުރުމަށް ގިނަ ފިޔަވަޅުތަކެއް އެޅުމަށް ނިންމާފައިވާކަން ރައީސް މުހައްމަދު މުއިއްޒު ވަނީ އިއުލާން ކުރައްވައިފަ އެވެ.
އެ ފިޔަވަޅުތަކަކީ:
-
ސިޔާސީ މަގާމުތަކުގައި ތިއްބަވާ ބޭފުޅުންގެ މުސާރައިން %10 އުނިކުރުން
-
ބޭންކްތައް ފިޔަވައި ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރައިން %10 އުނިކުރުން
-
ކުންފުނިތަކުގެ ވެރީންނަށް އެންމެ ބޮޑުކޮށް ދެވޭނީ 90،000ރ ކަމަށް ކަނޑައެޅުން
-
ޝަރުއީ ދާއިރާގެ އިސްވެރިން އަދި ރައްޔިތުންގެ މަޖިލީހުގެ މެމްބަރުންގެ މުސާރައިން %10 އުނިކުރުމަށް އެ ފަރާތްތަކުގައި އެދުން
-
ރައީސްގެ އަމިއްލަފުޅު މުސާރައިގެ %50 ނުނަގާ ގޮތަށް ހަމަޖެއްސުން
ގުޅުންހުރި ކަމެއް - ރައީސް އަޅުއްވާ ފިޔަވަޅުތަކަށް އެއްބާރުލުން ދިނުމަށްޓަކައި މުސާރައިގެ %50 ނުނެންގެވުމަށް މަޖިލީހުގެ ރައީސް އަބްދުއްރަހީމް އަބްދުﷲ ވެސް ވަނީ ނިންމަވާފަ އެވެ. ނަމަވެސް އެއީ ކިހާ މުއްދަތަކަށްކަން އޭނާ ވިދާޅެއް ނުވެ އެވެ.
ކޮމެންޓް