ކޮންމެ އަހަރަކު ވެސް ބޮޑު ރާޅެއް އަރާފާނެ ކަމުގެ ބިރުގައި

މީގެ ދެ އަހަރު ކުރިން، ހަމަ ހުޅަނގުގެ އެންމެ ގަދަ ދުވަސްވަރެވެ.

ގދ. މަޑަވެއްޔަށް ބިރުވެރިކަން ގެނުވީ، ރަށަށް އަރައިގެން އައި ބޮޑު ރާޅުތަކުންނެވެ. ރަށުގެ ދެކުނު ފަރާތުން އެންމެ ފަހުން ދޫކުރި ރޯހައުސްތަކުގެ ތެރެއިން ރާޅުގަނޑު އަރައިގެން އައި އިރު، ގިނަ ގެތަކުގެ ތެރެއަށް ލޮނުގަނޑު ވައްދާލި އެވެ. އަލަށް ލިބުނު ގޭގައި، މުޅިން އާ ފަރުނީޗަރުތަކާއި ހިފާ ގެންގުޅޭ ސާމާނާއެކު ދިރިއުޅުން ފަށައިގެން އާއިލާތަކަށް ޖެހުނީ އަނެއްކާ ވެސް އެ ތަކެތި ހޯދާށެެވެ.

ފުލުފުލުން ރާޅުތައް އަރައިގެން އައި އެ ދުވަހުގެ ބިރުވެރިކަން ސިފަކޮށްދެއްވަމުން، މަޑަވެލީ ކައުންސިލްގެ ރައީސް ފިޔާޒް ހަސަން އެ ދުވަހު ވިދާޅުވީ، "އެ ފަދަ ދެ ވަނަ ރާޅެއް އަރައިފިއްޔާ މަޑަވެލި ނޯންނާނެ" ކަމަށެވެ. 

"އެހާ ވެސް ބިރުވެރި މަންޒަރެއް އެއީ،" އެ ދުވަހު އޭނާ ވިދާޅުވި އެވެ.

އަނެއްކާ ވެސް ހުޅަނގުގެ ގަދައިގައި، އުދަ އަރާނެ ކަމުގެ އިންޒާރު، މޫސުމާ ބެހޭ ގައުމީ އިދާރާ (މެޓު) އިން މިއަދު ވަނީ ދީފަ އެެވެ. އެއީ މަޑަވެލީގެ އިތުރުން، އެ އަތޮޅު ނަޑެއްލާ އާއި ހޯޑެއްދޫން ވެސް ކަންބޮޑުވާ އިންޒާރެކެވެ.

ފިޔާޒު ވިދާޅުވީ މިރެ އާއި މާދަމާ ދިޔަވަރު ވަރަށް ބޮޑުވާނެ ކަމަށް އަންގާފައި ވާއިރު، އެއިން ރައްކާތެރިވުމަށް އެއްވެސް ކަމެއް ނުކުރެވޭ ކަމަށެވެ. އެންމެ ބޮޑަށް އުދަ އަރާނެ ކަމަށް ބެލެވޭ، ރޯހައުސްތަކާ ދިމާގައި ވެލި ބަސްތާ ޖެހުމަށް ވެލިކޮޅެއްހާ ހިސާބު ވެސް ނުލިބުނު ކަމަށް އޭނާ ވިދާޅުވި އެވެ.

"ކޯޒްވޭގެ މަސައްކަތް ކުރަމުންދާ އެމްޓީސީސީގައި އެދިގެން ވެސް އެކްސްކަވޭޓަރެއް ވެސް ލިބޭ ގޮތެއް ނުވި. ހިލަކޮޅެއް ލިބޭތޯ ވެސް ކުރި މަސައްކަތްވީ ހަމަ ނާކާމިޔާބު،" ވަރަށް މާޔޫސްވެ ހުންނަވައިގެން އޭނާ ވިދާޅުވި އެވެ.

ފިޔާޒް ވިދާޅުވި ގޮތުގައި މިރޭ އުދަ އަރާނެވަރު ބުނާކަށް ނޭނގެ އެވެ. އެހެންވެ، ބޮޑެތި ރާޅުތަކުން ރައްކާތެރިވުމަށް މާ ބޮޑު ކަމެއް ކުރެވިފައި ނުވުމަކީ ވަރަށް ބޮޑު ކަންބޮޑުވުމެއް ކަމަށް އޭނާ ވިދާޅުވި އެވެ.

ނަޑެއްލާގެ ހާލަތަކީ ވެސް މިއީ އެވެ.

ހުޅަނގުގެ މި ގަދައިގައި ނަޑެއްލާއަށް މީގެ ތިން ދުވަސް ކުރިން ވަރަށް ބޮޑަށް އުދަ އެރި އެވެ. ރަށުތެރެއަށް ލޮނުގަނޑު ފެތުރި ބައެއް ގެތަކާ ހަމައަށް ލޮނުގަނޑު ދިޔަ އެވެ. އެކަމަކު އެއްވެސް ގެއަކަށް ގެއްލުމެއް ނުލިބެ އެވެ.

ނަޑެއްލާ ކައުންސިލްގެ ނައިބު ރައީސް ފައިސަލް ނަޖީބު އެންމެ ކަންބޮޑުވެވަޑައިގަންނަވާ ކަމަކީ، މިއީ ކޮންމެ އަހަރަކު ވެސް ވާ ކަމެއް ނަމަވެސް، ދެން އަރާ ރާޅުތަކުގެ ބޮޑުމިން ވަޒަން ކުރަން ނޭނގުމެވެ. އޭނާ ވިދާޅުވި ގޮތުގައި ކޮންމެ އަހަރު ވެސް އުދައިގެ އަސަރު ބޮޑުވެދާނެ ކަމުގެ ބިރު މީހުންގެ ހިތުގައި އޮވެ އެވެ.

އުދައިގައި ނަޑެއްލާއަށް އެންމެ ބޮޑަށް ގެއްލުން ލިބިފައިވަނީ 2019 ވަނަ އަހަރެވެ. އެ ފަހަރު ރަށުތެރެއަށް އެރި ލޮނުގަނޑުގެ ސަބަބުން ރަށުގެ ދެ ބައިކުޅަ އެއް ބައިގައި ހެދިފައި ހުރި، ހުރިހާ ގަހެއްހެން މަރުވި އެވެ. ގޭގޭދޮށުގައި ހައްދާފައި ހުރި ބަނބުކެޔޮ ގަހާއި އަނބުގަސްތައް، ކުޑަ ދުވަސްކޮޅެއްގެ ތެރޭގައި މަރުވީ އެވެ. މީހުން ކާން ހައްދާފައި ހުރި މިރުހާއި ކޮޕީ ފަތް ފަދަ ހުރިހާ ކުދި ގަސްތަކެއްހެން ނެތި ދިޔަ އެވެ.

އެ ތަޖުރިބާ ދެވަނަ ފަހަރަށް ކުރަން ޖެހިދާނެ ކަމުގެ ބިރު އަބަދުވެސް އޮންނަ ކަމަށް ފައިސަލް ވިދާޅުވި އެވެ.

"މިއީ އަޅުގަނޑުމެން ކުޑައިރުއްސުރެ ހިނގަމުން އަންނަ ކަމެއް. އެކަމަކު މައްސަލައަކީ މިހާ ދުވަސްވީ އިރު ވެސް މިކަމަށް ހައްލެއް އައިސްފައި ނުވުން،" އޭނާ ވިދާޅުވި އެވެ.

"މިގޮތަށް އުދަ އަރައި ގިރަމުން ގޮސް ރަށުގެ ބޮޑު ބައެއް މިހާރު ރަށާ ވަކި ވެސް ވެއްޖެ."

އޭނާ ވިދާޅުވީ އުދައަކީ ހުވަދޫގެ އެ ރަށްތަކުން އަބަދުވެސް އެންމެ ކަންބޮޑުވުން ފާޅުކުރާ މައްސަލަ ކަމަށެވެ. ސަރުކާރުތަކާއި ކަމާ ބެހޭ ވެރިންގެ ގާތަށް ކިތަންމެ ފަހަރަކު މައްސަލަ ގެންގޮސްފި އެވެ. އެކަމަކު މިހާތަނަށް އައިއިރު، ގުދުރަތީ މި މައްސަލައަށް އޮތީ އަޅާނުލެވި ކަމަށް ވިދާޅުވި އެވެ.

މަޑަވެލީ ރައީސް ފިޔާޒު ވެސް ކުރެއްވީ ހަމަ އެ ޝަކުވާ އެވެ. ރަށުގެ ހުޅަނގު ފަރާތުގައި ބޮޑު ހިލަ ޖަހައިގެން، ރާޅުތައް ކޮންޓްރޯލް ކުރުމުގެ ފުރުސަތު އޮތް ނަމަވެސް، މިހާތަނަށް އައިއިރު، އެއީ އެއްވެސް ސަރުކާރަކަށް ނުވެ އޮތް ކަމެއް ކަމަށް ވިދާޅުވި އެވެ.

މަޑަވެއްޔަށް އުދަ އެރުން އެހާ ބޮޑަށް ގޯސްވެފައިވަނީ، އެ ރަށުގެ ގިނަ މީހުން ބުނާ ގޮތުން، މަޑަވެއްޔާއި ހޯޑެއްދޫ ގުޅާލުމަށް 2018ގައި ހެދި ކޯޒްވޭގެ ސަބަބުންނެވެ. މި ކޯޒްވޭ އެޅި ފަހުން، މަޑަވެއްޔާއި ހޯޑެއްދުއަށް ރާޅު އެރުން ވަނީ އިތުރުވެފަ އެވެ. އޮއެ ގަދަ ސަރަހައްދެއްގައި، ފެން ދައުރު ވާނެ ގޮތެއް ނެތި، ވެލީގެ ފާލަމެއް ދެ ރަށުގެ ދެމެދުގައި އެޅުމުން، ކޯޒްވޭ މަތިން ވެސް ރާޅު އަރަން ފެށި އެވެ.

ފިޔާޒު ކުރިން ވިދާޅުވި ގޮތުގައި، މި ފަހުން އެހާ ބޮޑަށް އުދަ އަރަން ފެށީ، ކޯޒްވޭ ހަދާފައި އޮތް ގޮތުން، އެ ތަނުން ލޮނުގަނޑު ދައުރުވުން ކުޑަވުމުގެ ސަބަބުންނެވެ. އަދި އެ ކޯޒްވޭ ހަދާފައިވަނީ، އޭގެ ޑިޒައިނާ މެދު ދެ ރަށުގެ ރައްޔިތުން ދެކޮޅުހަދަމުން ދަނިކޮށް ކަމަށް ވެސް އޭނާ ވިދާޅުވެފައިވެ އެވެ.

މަޑަވެލީގެ ރޯހައުސްތަކުގެ މީހުން މިހާރު ދިރިއުޅެނީ ގެތައް ވަށައިގެން އުސްކޮށް ވަށާފާރު ރާނައިގެންނެވެ. އޭގެ ސަބަބުން، އުދަ އެރިޔަސް ގޭތެރެއަށް ލޮނުގަނޑު ވަނުމުގެ ފުރުސަތު ކުޑަކުރުމުގެ ގޮތުންނެވެ. އެކަމަކު އުދަ އަރާ ދުވަސްވަރެއްގައި، ބޮޑު ރާޅުތަކެއްގެ އަަސަރު ކޮށްފާނެ ކަމުގެ ބިރު އެ މީހުންގެ ހިތުގައި އަބަދުވެސް އޮވެ އެވެ.