ރާއްޖެ ވަރަށް ކުރިއަށް ޖެހިލިޔަސް މިއީ އދ.އަށް ފާހަގަވާ ބޮޑެތި މައްސަލަތައް

ޑިމޮކްރެޓިކް ވެރިކަމެއްގައި ބައެއް ދާއިރާތަކުން ބޮޑެތި ކުރިއެރުންތަކާ އެކު ރާއްޖެ ވަރަށް ކުރިއަށް ދަތުރުކޮށްފައިވާ ކަމަށާއި ނަމަވެސް އަދިވެސް ބޮޑެތި މައްސަލަތައް އެބަހުރި ކަމަށް އދ.ގެ އެސިސްޓެންޓް ސެކްރެޓަރީ ޖެނެރަލް އަދި ޔޫއެންޑީޕީގެ އެސިސްޓެންޓް އެޑްމިނިސްޓްރޭޓަރު ކަންނީ ވިގްނަރާޖާ ވިދާޅުވެއްޖެ އެވެ.

ވީ ކިހިނެއް؟ - ވިގްނަރާޖާ ހިމެނިވަޑައިގަންނަވާ ގޮތަށް ޔޫއެންޑީޕީގެ ވަފުދުން ކުރި ތިން ދުވަހުގެ ދަތުރުގައި ސަރުކާރުގެ އިސް އޮފިޝަލުންނާ މުހިންމު ބައްދަލުވުންތަކެއް ވަނީ ބާއްވާފަ އެވެ.

އެ ބައްދަލުވުންތަކުގެ އަމާޒަކީ ޔޫއެންޑީޕީއިން ރާއްޖެއަށް ފޯރުކޮށްދޭ އެހީތެރިކަން މިހާރަށްވުރެ ހަރުދަނާކޮށް، އެކި ކަންކަމުގައި ރާއްޖެއަށް ދިމާވާ މައްސަލަތައް ދެނެގަނެ، ހައްލުކުރަން ގުޅިގެން މަސައްކަތް ކުރުމެވެ.

ބުނީ ކީކޭ؟ - "ޑިމޮކްރެޓިކް ގަވަނެންސް، ތިމާވެށި ހިމާޔަތްކުރުން އަދި އިންސާނީ ތަރައްގީގައި ބޮޑެތި ކުރިއެރުންތަކެއް ހޯދައި، ރާއްޖެ ވަރަށް ކުރިއަށް ދަތުރުކޮށްފި،" ޔޫއެންޑީޕީގެ އޭޝިއާ ޕެސިފިކް ސަރަހައްދުގެ ރީޖަނަލް ޑިރެކްޓަރުގެ މަގާމު ވެސް އަދާކުރައްވާ ވިގްނަރާޖާ ވިދާޅުވި އެވެ.

"ނަމަވެސް ދަރަނި، ކޭޝްފްލޯގެ ދަތިކަން، ދަރަނި ނަގަން ހިނގާ ބޮޑު ހަރަދު، ހަމަހަމަކަން ގެއްލުން އަދި ބޮޑުވަމުންދާ މޫސުމީ ކާރިސާގެ މައްސަލަ ފަދަ، ތަރައްގީވަމުން އަންނަ ގިނަ ގައުމުތަކުން ފެންނަ މައްސަލަތައް ރާއްޖެއަށް ވެސް ވަނީ ކުރިމަތިވެފައި."

ތަފްސީލު - ޔޫއެންޑީޕީގެ ދަތުރުގެ ތެރެއިން ދެމެހެއްޓެނިވި ތަރައްގީއާ ގުޅުންހުރި ބައެއް ކަންކަން ވަނީ އިފްތިތާހުކޮށްފަ އެވެ. އޭގެ ތެރޭގައި ހިމެނެނީ:

ޔޫއެންޑީޕީގެ ވަފުދުން ކުރި ދަތުރުގެ ފަހު ދުވަހުގައި ރައީސް މުހައްމަދު މުއިއްޒު އާއި ފޮރިން މިނިސްޓަރު ޑރ. އަބްދުﷲ ހަލީލްއާ ބައްދަލުކުރައްވައި ޔޫއެންޑީޕީ އާއި ރާއްޖޭގެ ގުޅުމަށް 45 އަހަރު ފުރުން ވަނީ ފާހަގަކޮށްފަ އެވެ.

އެކަމަށް ބޭއްވި ރަސްމިއްޔާތުގެ ތެރެއިން ޔޫއެންޑީޕީ މޯލްޑިވްސް އައިލެންޑް ލައިފް މަޖައްލާގެ ހާއްސަ އަދަދެއް ވެސް ވަނީ ނެރެފަ އެވެ.

އެ ރަސްމިއްޔާތުގައި ދެއްކެވި ވާހަކަފުޅުގައި ރައީސް މުއިއްޒު ވިދާޅުވީ ކުރިއަށް ހުރި ގޮންޖެހުންތައް ގިނަ ނަމަވެސް، ޔޫއެންޑީޕީގެ އެހީއާ އެކު ކުރިއަށްދެވޭނެ ކަމުގެ ޔަގީންކަން އެބައޮތް ކަމަށެވެ.