ތިލަފުށީ ބަނދަރަށް އިންޑިއާގެ އެހީ ދޭނެކަމުގެ އިޝާރާތެއް

މިދިޔަ ސަރުކާރުން ކ. ގުޅިފަޅުގައި އަޅަން އުޅުނު ރާއްޖޭގެ މައި ބަނދަރު ތިލަފުއްޓަށް ބަދަލުކުރަން މި ސަރުކާރުން ނިންމާފައި ވާއިރު، ތިލަފުށީގައި ގާއިމް ކުރާ ބައިލަންއަގުވާމީ ވިޔަފާރި ބަނދަރުގެ މަސައްކަތަށް އިންޑިއާ އިން އެހީތެރިކަން ދޭން ތައްޔާރު ކަމަށް އެ ގައުމުގެ ބޮޑުވަޒީރު ނަރެންދުރަ މޯދީ މިއަދު ވިދާޅުވެއްޖެ އެވެ.

ވީ ކިހިނެއް؟ - ރައީސް މުހައްމަދު މުއިއްޒު މިހާރު އިންޑިއާއަށް ކުރައްވަމުން ގެންދަވާ ދަތުރުފުޅުގެ ތެރެއިން ބޮޑުވަޒީރު މޯދީއާ އެކު މިއަދު ވަނީ ރަސްމީ މަޝްވަރާތައް ބާއްވައިފަ އެވެ.

އެ މަޝްވަރާތަކަށް ފަހު ދެ ބޭފުޅުން ދެއްވި ގުޅިފައިވާ ބަޔާނުގައި މޯދީ ވަނީ އިންޑިއާ އިން ރާއްޖޭގެ އުމްރާނީ ތަރައްގީއަށް ދެމުންގެންދާ އެހީތެރިކަން ފާހަގަކުރައްވައި ކުރިއަށް އޮތް ތަނުގައި ވެސް އެއްބާރުލުން ދެއްވާނެ ކަމަށް ވިދާޅުވެފަ އެވެ.

ތަފްސީލް - އިންޑިއާގެ ލައިން އޮފް ކްރެޑިޓުގެ ދަށުން ހދ. ހަނިމާދޫ އިންޓަނޭޝަނަލް އެއާޕޯޓުގައި ގާއިމް ކުރި އާ ރަންވޭ މިއަދު ރައީސް މުއިއްޒު އާއި ބޮޑުވަޒީރު މޯދީ ވަނީ އިފްތިތާހު ކޮށްދެއްވައިފަ އެވެ.

އެފަދަ މަޝްރޫއުތަކަށް ކުރިއަށް އޮތް ތަނުގައި ވެސް އެއްބާރުލުން ދެއްވާނެކަން ފާހަގަކުރައްވައި މޯދީ ވިދާޅުވީ އިންޑިއާގެ އެހީގައި ކުރިއަށްގެންދާ ގްރޭޓާ މާލެ ކަނެކްޓިވިޓީ ޕްރޮޖެކްޓް ނުވަތަ ތިލަމާލެ ބްރިޖު މަޝްރޫއުގެ މަސައްކަތް ހަލުވި ވެގެންދާ ތަން ދެން ފެންނާނެ ކަމަށެވެ.

"ތިލަފުށީގައި އާ ކޮމާޝަލް ޕޯޓެއް އަޅަން ވެސް އެހީތެރިކަން ދޭން އިންޑިއާ އިން ތައްޔާރު،" މޯދީ ވިދާޅުވި އެވެ.

މޯދީ ވިދާޅުވީ:

ދެ ވެރިންގެ ރަސްމީ މަޝްވަރާތަކުގައި ރާއްޖޭގައި ޓްރާންޝިޕްމެންޓު ފެސިލިޓީ ގާއިމްކޮށް، ބަންކަރިން ހިދުމަތުގައި އިންޑިއާގެ އެއްބާރުލުމާއި އެހީތެރިކަން ދިނުމާ ގުޅޭ ގޮތުން ވަނީ ވާހަކަ ދައްކަވައިފަ އެވެ.

އެނގުން މުހިއްމު - ތިލަފުށީގައި އަޅާ ބަނދަރަށް އިންޑިއާގެ އެހީތެރިކަން ދޭނެ ކަމުގެ އިޝާރާތެއް މޯދީ ދެއްވި އިރު، އެ މަޝްރޫއަކީ މީގެ ކުރިން ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ގުޅިފަޅުގައި ކުރިއަށް ގެންދަން ނިންމާފައި އޮތް މަޝްރޫއެކެވެ.

އެ މަޝްރޫއު ކުރިއަށް ގެންދަން އޮތީ އިންޑިއާގެ ކްރެޑިޓް ލައިންގެ ދަށުންނެވެ. ރައީސް މުއިއްޒުގެ ސަރުކާރުން ވަނީ އެ މަޝްރޫއު ގުޅިފަޅުގައި ކުރިއަށް ގެންދިއުމުގެ ބަދަލުގައި ތިލަފުށީގައި އެ ބަނދަރު އަޅަން ނިންމައިފަ އެވެ.