ނޯމަލަައިޒޭޝަން ކޮމިޓީގެ ލަފާ: އެފްއޭއެމްގެ ދަރަނި 85 މިލިއަން ރުފިޔާއަށް ވުރެ މައްޗަށް ދާނެ

ރާއްޖޭގެ ފުޓްބޯޅައިގެ މައި އިދާރާ އެފްއޭއެމްގެ ހުރިހާ ކަމެއްހެން އޮތީ ފެއިލްވެފައި ކަމަށާއި މިހާތަނަށް އަންދާޒާ ކުރެވޭ ގޮތުގައި ދަރަނީގެ މިންވަރު 85 މިލިއަން ރުފިޔާއަށް ވުރެ ބޮޑު ވާނެ ކަމަށް، ފީފާއިން ކަނޑައެޅި ނޯމަލައިޒޭޝަން ކޮމިޓީން މިއަދު ބުނެފި އެވެ.

ވީ ކިހިނެއް؟ - މާލީ ބޮޑެތި މައްސަލަތަކެއްގެ ތެރޭގައި ތާށިވެ، ހިންގުން ހުއްޓިފައި އޮތް އެފްއޭއެމް ނޯމަލައިޒޭޝަން ކޮމިޓީއަކާ ހަވާލުކުރަން ފީފާ އިން 23 ޖުލައިގައި ނިންމައި އެ ކޮމިޓީއަށް 19 އޮގަސްޓުގައި މެންބަރުން ވަނީ އައްޔަންކޮށްފަ އެވެ. އޭގެ ފަހުން މާދަމާއަށް އެއް މަސް ފުރޭއިރު، މިހާރު މަސައްކަތްތައް ގޮސްފައިވާ ހިސާބާ ގުޅޭ ގޮތުން އެ ކޮމިޓީން މިއަދު ވަނީ ފުރަތަމަ ފަހަރަށް ނޫސްވެރިންގެ ބައްދަލުވުމެއް ބާއްވައިފަ އެވެ.

ތަފްސީލު - ގަލޮޅު ދަނޑުގެ ވީއައިޕީ ރޫމްގައި ބޭއްވި ނޫސްވެރިންގެ ބައްދަލުވުމުގައި ކޮމިޓީގެ ޗެއާމަން އަހުމަދު ޒުހޫރު ވިދާޅުވީ އިދާރާތަކުން އެފްއޭއެމްއާ ގުޅޭ ގޮތުން ކުރިއަށް ގެންދާ ތަހުގީގާ ގުޅިގެން ބައެއް ލިޔެކިޔުންތައް ހިފަހައްޓާފައިވުމުން އަދިވެސް އެފްއޭއެމްގެ ހާލަތު މުޅިން ދެނެނުގަނެވޭ ކަމަށެވެ. ނަމަވެސް މިހާތަނަށް ފެންނަން ހުރި ލިޔެކިޔުންތަކުން  އެނގޭ ގޮތުގައި، 30-35 މިލިއަން ރުފިޔާގެ ދަރަނި އުޅޭނެ ކަމަށް އޭނާ ވިދާޅުވި އެވެ.

"އެހެން ނަމަވެެސް ފެކްޗުއަލްކޮށް ލިޔެކިޔުމުން ޔަގީން ނުވި ނަމަވެސް، އައިސްދާނެ ދަރަނި މިހާތަނަށް ލިބިފައި ހުރި މައުލޫމާތުތަކުން 85 މިލިއަން [ރުފިޔާ]އަށް ވުރެ މައްޗަށް ދާނެ ކަމަށް ލަފާކުރެވޭ،" އޭނާ ވިދާޅުވި އެވެ.

އެ 85 މިލިއަން ރުފިޔާގެ ދަރަނީގެ ތެރޭގައި ދައުލަތަށް ދައްކަން ޖެހޭ ފައިސާ އާއި ޔުޓިލިޓީ ކުންފުނިތަކަށް ދައްކަން ޖެހޭ ފައިސާ ވެސް ހިމެނޭ ކަމަށް ޒުހޫރު ވިދާޅުވި އެވެ. އަދި ޓެކްނިކަލް ޑައިރެކްޓަރުންގެ ގޮތުގައި ބޭރުން ވެސް ބޮޑު އަގުގައި މީހުން ނަގާފައިވުމުން އެ މީހުންނަށް ދައްކަން ޖެހޭ ފައިސާ އާއި އެހެން މުސާރަތައް ވެސް އޭގެ ތެރޭގައި ހިމެނޭކަން އޭނާ ފާހަގަކުރެއްވި އެވެ.

"މިގޮތަށް ދަރަނިވެރިވެފައި އޮތް ނަމަވެސް، އަޅުގަނޑުމެންގެ އުންމީދަކީ އަޅުގަނޑުމެންނަށް އެހީތެރިވަމުންދާ އެންމެހާ ފަރާތްތަކާ ވާހަކަދައްކައިގެން ދަރަނި ރީސްޓްރަކްޗާ ކުރުމާއި އަޅުގަނޑުމެންނަށް ލިބެން ޖެހޭ ފައިސާ ވެސް ހޯދަން މަސައްކަތް ކުރުމާއި އޮނިގަނޑު އެކުލަވާލައިގެން ކިރިޔާ ވެސް އާމްދަނީ ލިބެން ފެއްޓުމާ އެކު ހަރުދަނާ މުއްވަޒަފުން ހޯދައިގެން ކުރަން ޖެހޭ މަސައްކަތްތައް ކުރަމުން ގެންދިއުން،" ޒުހޫރު ވިދާޅުވި އެވެ.

ޒުހޫރު ވިދާޅުވި ގޮތުގައި:

މި ގޮންޖެހުންތަކާ އެކު މަސައްކަތް ކުރަމުން އަންނައިރު، ސަރުކާރުން ދެމެން އަންނަ އެއްބާރުލުން ޒުހޫރު ފާހަގަކުރެއްވި އެވެ. އެ އެހީތެރިކަމާ އެކު ގަލޮޅު ދަނޑުގައި މިވަގުތު ވަގުތީ ސެޓަޕެއް އިދާރީ ކަންކަން ކުރުމަށް ގާއިމްކުރުމުގެ މަސައްކަތް ފަށާފައިވާކަން އޭނާ ފާހަގަކުރެއްވި އެވެ. 

ޒުހޫރު ވަނީ އެފްއޭއެމް މިހާރު އޮތް ހާލަތުން އަރައިގަތުމަށް ހުރިހާ ސްޓޭކްހޯލްޑަރުންގެ ވެސް އެއްބާރުލުމަށް އެދިވަޑައިގެންފަ އެވެ.

"އެފްއޭއެމް ނަގާ ކޮޅަށް ޖެހެން މިއޮތީ އެންމެހާ ސްޓޭކްހޯލްޑަރުންގެ އެއްބާރުލުން ލިބިގެން... އަޅުގަނޑުމެން ފައްޓަން މިޖެހެނީ މައިނަސްއިން. މިވަގުތު އަޅުގަނޑުމެން ހަރަދެއް ކުރަން ބެލި ނަމަވެސް އެއްވެސް ހަރަދެއް ކުރެވޭނެ ގޮތެއް ނެތް. އެއްވެސް އެކައުންޓެއްގައި ފައިސާއެއް ވެސް ނެތް އަޅުގަނޑުމެން ހަވާލުވިއިރު،" އޭނާ ވިދާޅުވި އެވެ.

ފީފާއިން މި ކޮމިޓީއާ މައިގަނޑު ހަ މަސްއޫލިއްޔަތެއް ހަވާލުކޮށްފައިވަނީ އެއް އަހަރުދުވަހުގެ މުއްދަތަށެވެ. އޭގެ ތެރޭގައި:

ޒުހޫރު ވިދާޅުވީ އުންމީދަކީ ފީފާއިން ދިން މުއްދަތަށް ވުރެ ކުރިން ވެސް ކަންކަން ހަމައަކަށް އަޅުވައި އިންތިހާބު ބޭއްވުން ކަމަށެވެ. ނަމަވެސް ސީދާ ވަކި ތާރީހެއް އޭނާ ވިދާޅެއް ނުވެ އެވެ.

"މިއީ މިހާތަނަށް އަޅުގަނޑުމެންގެ ހަޔާތުގައި ދިމާވި އެންމެ ބޮޑު ޗެލެންޖް. އެކަމާ މެދު އެއްވެސް ޝަކެއް ނެތް،" މި މުއްދަތުގެ ތެރޭގައި މި މައްސަލަ ހައްލުކުރަން މިއީ ކިހާ ވަރެއްގެ ގޮންޖެހުމެއްތޯ 'ދައުރު'ން ކުރި ސުވާލުގެ ޖަވާބުގައި ޒުހޫރު ވިދާޅުވި އެވެ.

މީގެ ކުރިން ޔޫތު އަދި ހެލްތު މިނިސްޓަރުކަން ވެސް ކުރެއްވި ޒުހޫރު ވިދާޅުވީ މި މައްސަލަ ހައްލުކުރަން މިހާރު ޖެހިފައި އޮތީ "ހަމައެކަނި ގަވަނަންސް ނުވަތަ އެޑްމިނިސްޓްރޭޓިވް އެކްސްޕަޓައިޒް ލައިނަކުން ނޫން" ކަމަށެވެ.

"މިކަމުުގައި އަޅުގަނޑުމެން ފޭސްކުރަން ޖެހިފައި މިއޮތީ ގަވަނަންސް، ލީގަލް، އެޑްމިނިސްޓްރޭޓިވް، ޕޮލިސީ، މިހެން ގޮސް ކިޔާނެ ކަމެއް ނެތް އޮގަނައިޒޭޝަނެއް ހިންގަން ބޭނުންވާ ހުރިހާ ވަސީލަތެއް މިތަނުގައި މިވަނީ ފެއިލްވެފައި،" އެ ސުވާލަށް ޖަވާބު ދެއްވަމުން އޭނާ ވިދާޅުވި އެވެ.

އެ ސުވާލުގެ ދެވަނަ ބަޔަކީ، މިހާތަނަށް ބެލި ބެލުމުން ކަންކަން ބޮއްސުންލާފައިވަނީ ކިހާވަރަކަށްތޯ އެވެ. އެއަށް ވެސް ޒުހޫރު ޖަވާބު ދެއްވި އެވެ.

"އެފްއޭއެމްގެ ގަވާނަންސް ވަނީ ފެއިލްވެފައި. އެފްއޭއެމްގެ އެޑްމިނިސްޓްރޭޓިވް ސްޓްރަކްޗާ ވަނީ ފެއިލްވެފައި. އެފްއޭއެމްގެ އިންޓަނޭޝަނަލް ބެސްޓް ޕްރެކްޓިސްއާ އެއްގޮތަށް ހިންގަން ޖެހޭ މުއާމަލާތްތައް ހިންގިފައި ނެތް ތަން މި ފެންނަނީ. ފައިނޭންޝިއަލީ އޮންނަން ޖެހޭ އުސޫލެއް ގާއިމްވެފައި ނެތް ތަން މި ފެންނަނީ. އަދި ހެދެން ޖެހޭ އެސްއޯޕީތަކާއި ހެދިފައި އޮންނަން ޖެހޭ އުސޫލުތަކާއި ގަވާއިދުތައް ނެތް ތަން މި ފެނުނީ އަދި އެއަށް އަމަލު ވެސް ނުކުރި ތަން މި ފެންނަން އޮތީ،" ހިތާމަ އާއި ކަންބޮޑުވުމާ އެކު އޭނާ ވިދާޅުވި އެވެ.

ޒުހޫރު ވިދާޅުވި ގޮތުގައި މިއީ އެންމެ ދުވަހަކުން ނުވަތަ ދެ ދުވަހަކުން ފެއިލްވީ ތަނެއް ނޫނެވެެ. 

"މިއީ ވަރަށް ގިނަ ދުވަހެއްގެ ވަރަށް މަޑުމަޑުން އައި ފެއިލިއާއެއް. އެ ފެއިލިއާ ބޮޑުވެގެން އައިސް އެފްއޭއެމް ނެތި ގޮސްފައި މިއަދު މިވަނީ އޭގެ ޒާތުގައި އެޑްމިނިސްޓްރޭޓިވްލީ ވެސް، ޕޮލިސީ ލެވެލްގައި ވެސް އަދި ގަވަނަންސް ލެވެލްގައި ވެސް،" އޭނާ ވިދާޅުވި އެވެ.