ރޭސް ޖަހާ މީހުންގެ ޝަކުވާ ބޮޑު: ޕޮލިސް ކޮމިޝަނަރު

ރޭސް ޖަހާ މީހުން، ހުޅުމާލޭގެ މަގުތައް މަތީ ބާރު ސްޕީޑެއްގައި އުޅަނދު ދުއްވާ ކަމުގެ ޝަކުވާ ގިނައިން ލިބޭ ކަމަށް، ޕޮލިސް ކޮމިޝަނަރު އަލީ ޝުޖާއު ވިދާޅުވެއްޖެ އެވެ.

ވީ ކިހިނެއް؟- އާއްމުންގެ ހިތްތަކުގައި ބިރުވެރިކަން އުފެދޭގޮތަށް، ބާރު ސްޕީޑުގައި ރަށުތެރޭގަައި ރޭސްކާރު ދުއްވައިގެން މި ފަހަކުން ވަނީ ނުރައްކާތެރި އެކްސިޑެންޓުތަކެއް ހިނގާފަ އެވެ. ހުކުރު ދުވަހުގެ ރޭ ޒުވާނަކު މަރުވީ ވެސް، ބާރު ސްޕީޑެއްގައި ދުއްވާފައި ދިޔަ ސްޕޯޓްސް ކާރެއްގައި ޖެހި ހިނގި އެކްސިޑެންޓެއްގަ އެވެ.

'ދައުރު'އާ ވާހަކަ ދައްކަވަމުން ކޮމިޝަނަރު ވިދާޅުވީ ރޭސް ޖަހާ މީހުންނާއި ޑްރިފްޓިންއަށް ހުޅުމާލޭ ފޭސް-2ގައި އެކަމަށް ހާއްސަ ބިމެއް ހަމަޖައްސާފައި އޮންނައިރު، ކަންބޮޑުވުމަކީ އެ މީހުން އުޅަނދުތަކުގައި ރަށުތެރެއަށް ނުކުތުން ކަމަށެވެ. އެއީ، ގިނަ ބަޔަކު ނުރައްކަލަށް ހުށަހެޅިގެންދާނެ ކަމަށް އޭނާ އެއްބަސްވެ ވަޑައިގަނެ އެވެ.

"އާއްމު ގޮތެއްގައި އެ މީހުން އެ ކުޅިވަރު [ރޭސް ޖެހުމާއި ޑްރިފްޓިން]އަށް މިދަނީ ރޭގަނޑު 11 ޖަހާކަންހާއިރު. މާލެއިން ވެސް ގިނަ ވެހިކަލްތަކެއް އެ ގަޑީގައި ހުޅުމާލެއަށް ދާއިރު އެ މީހުން ރަށުތެރެއަށް އަރައިގެން މިދަނީ، ދާން ޖެހޭ މިނަށްވުރެ ބާރުމިނުގައި،" ޝުޖާއު ވިދާޅުވި އެވެ.

އޭނާ ވިދާޅުވި ގޮތުގައި ކުޅިވަރު، ރޭސް ޖަހާ މީހުން ނިންމާލަނީ ދަންވަރު 2:30 ހާއިރު އެވެ. ދެން އަނެއްކާ ވެސް އެ މީހުން ނުކުންނަނީ ބާރު ސްޕީޑުގައި ރަށުތެރެއަށް ކަމަށް ވިދާޅުވި އެވެ.

ޝުޖާއު ވިދާޅުވީ އެކަމުގައި ރޭސް ޖަހާ ހުރިހާ އެންމެން ޝާމިލް ނުވާ ކަމަށާއި އެކަން ރަނގަޅަށް ކުރާ ބަޔަކު ވެސް އުޅޭ ކަމަށެވެ. ހާއްސަކޮށް، ރޭސިން އެސޯސިއޭޝަނުގެ މެނޭޖްމެންޓާ ފުލުހުން ބާއްވާ ބައްދަލުވުންތަކުގައި، ކުޅިވަރު ނިންމުމަށް ފަހު ރަށުތެރެއަށް ނުނިކުމެ ގެއަށް ދިޔުމަށް އިރުޝާދުދޭ ކަމަށް އެ މީހުން ބުނާ ކަމަށް އޭނާ ވިދާޅުވި އެވެ.

"އެކަމަކު އަޅުގަނޑުމެންނަކަށް ހިޔެއް ނުވޭ އޭގެ ކޮންޓްރޯލް އެ މީހުން [ރޭސިންގެ އިސްމީހުން] އަތުގައި އޮންނަހެނެއް. އެ މީހުން ގެއަށް ދޭތޯ ނުދޭތޯ ވެސް ބެލުމަކީ ފަސޭހަކަމެއް ނޫން." ޝުޖާއު ވިދާޅުވި އެވެ.

މި ފަދަ އުޅަނދުތަކުން ކުރިމަތިވާ އެކްސިޑެންޓުތައް މަދުކުރުމަށް، ރައީސް ޑރ. މުހައްމަދު މުއިއްޒު މިދިޔަ ހުކުރު ދުވަހު ވަނީ، ހުޅުމާލޭގައި ރޭސިން އަދި ޑްރިފްޓިންނަށް ހާއްސަކޮށްފައިވާ ސަރަހައްދުގެ ހުއްދަ ބާތިލްކޮށްފަ އެވެ. އެއާއެކު އެހެން ގިނަ ފިޔަވަޅުތަކެއް ވެސް އެޅުއްވި އެވެ. އޭގެ ތެރޭގައި ހިމެނޭ ބައެއް ކަންކަމަކީ:

ކޮމިޝަނަރު ވިދާޅުވީ ހަފުތާ ބަންދު ދުވަސްތަކުގައި، މާލެ އާއި ހުޅުމާލޭގައި ބާރު ސްޕީޑުގައި ނުވަތަ އަޑުގަދަކޮށް ދުއްވާ އުޅަނދުތަކުގެ އުނދަގޫ ވެސް ބޮޑުވެފައިވާ ކަމަށެވެ. އެކަން ކޮންޓްރޯލް ކުރުމަށް، ކޮންމެ ހަފުތާ ބަންދެއްގައި ހައިވޭތަކާއި މަގުތަކުގައި ވެހިކަލް ޗެކް ޕޮއިންޓު (ޕީވީސީ)ތައް ހަދާ ކަމަށާއި، އެގޮތަށް ދުއްވާ ބައެއް އުޅަނދުތައް މިހާރު ފާހަގަ ކުރެވިފައިވާ ކަމަށް ވިދާޅުވި އެވެ.

"އެކަމަކު އެކަމުގައި ވެސް ދިމާވާ މައްސަލައަކީ ޕީވީސީ ޖެހިޔަސް، ވަރަށް އަވަހަށް އެތަން އެބަ ދެނެގަނޭ. އެހެންވެ، އޭގައި ނުޖެހެން، އެހެން މަގުތަކުން ދުއްވާފައި މިދަނީ،" ޝުޖާއު ވިދާޅުވި އެވެ.

"މި މައްސަލަތަކަށް ހައްލެއް ގެނެވޭނީ ހުރިހާ ފަރާތްތަކުން ވެސް ގަވައިދަށް ހުރުމަތްތެރިކޮށް ހިތައިގެން."