އަސަރު ގަދަ ހުތުބާއެއް: ފާފަ ކުރެވުނަސް ދީނަށް ހިދުމަތް ކުރުން ދޫކޮށްނުލާ

ކިތަންމެ ފާފަތަކެއް ކުރެވުނު ނަމަވެސް އެއީ އިސްލާމް ދީނަށް ހިދުމަތް ކުރުމަށް އޮތް އުޒުރެއް ނޫން ކަމަށާއި އެހެންވެ، ކޮންމެ ހާލެއްގައި ވެސް ދީނުގެ މަތީގައި ދެމިހުރެ، ހިދުމަތް ކުރުމަށް ހުކުރު ހުތުބާގައި ގޮވާލައިފި އެވެ.

ވީ ކިހިނެއް؟ - މިއަދު ރާއްޖޭގެ މިސްކިތްތަކުގައި ކިޔާފައިވަނީ، މިދިޔަ ހުކުރު ދުވަހު އިސްލާމީ މަރުކަޒުގައި މައްކާގެ އިލްމުވެރިއަކު ދެއްވި ހުތުބާގެ ތަރުޖަމާ އެވެ. އަރަބި ބަހުން މިދިޔަ ހަފުތާގައި އެ ހުތުބާ ދެއްވާފައިވަނީ، މައްކާގެ ހަރަމްފުޅުގެ ފަތުވާ ކޮމިޓީގެ މެމްބަރު ޕްރޮފެސަރު ޑރ. ހަމްދާން އައްސުލަމީ އެވެ.

އައްސުލަމީގެ ހުތުބާ ހާއްސަ ކުރައްވާފައިވަނީ، އިސްލާމް ދީނަށް ހިދުމަތް ކުރުމުގެ މުހިއްމުކަމާ ގުޅޭގޮތުންނެވެ. ހުތުބާގެ ބަލާގާތްތެރިކަމާއި މެސެޖް ގެނެސްދީފައިވާ ގޮތުން، ގިނަ ބަޔަކު އަންނަނީ އެއަށް ތައުރީފް ކުރަމުންނެވެ. އެ މީހުންގެ ނަޒަރުގައި މިއީ، އަސަރު ގަދަ އަދި ގިނައިން އަޑުއަހަން ބޭނުންވާ ފަދަ ހުތުބާ އެކެވެ.

ތަފްސީލު - އައްސުލަމީގެ ހުތުބާގައި ބުނީ، އިންސާނުންނަކީ ކުށް ކުރެވޭނެ، ކުށަށް ހުށަހެޅިފައިވާ ބައެއް ކަމަށާއި ފާފަ ފުއްސެވުމަށް ﷲ ހަޒުރަތުގައި ދެންނެވުމުން ފާފަ ފުއްސަވާނެ ކަމަށެވެ. އެކަމަކު ހިތާމައަކީ، އެ ފާފަތަކުގެ ބޭނުންކޮށްގެން ނަފާ ހޯދުމަށް ޝައިތާނާއަށް ފުރުސަތު ދީ، މަގުފުރެއްދިޔަ ދިނުން ކަމަށާއި އެ ފާފަތަކުގެ ސަބަބުން، މިހާރު، ދީނަށް އިސްކަންދީ، ދީންވެރި އުޅުމުގެ ގާބިލްކަން ނެތި ހިނގައްޖެ ކަމަށް ބުންޏެވެ.

ހުތުބާގައި ބުނި ގޮތުގައި ﷲއަށް ކިޔަމަންގަތުމުގައި، އަހަރުމެންގެ ކިބައިގައި ހުރި ފަރުވާކުޑަކަމާއި އުނިކަމާއި ކުރެވޭ ކުށްތަކަކީ ދީނަށް ހިދުމަތް ކުރުމަށް އޮތް އުޒުރެއް ނޫނެވެ. އަދި އެއީ އެ ބޮޑު މަސްއޫލިއްޔަތުން ރެކެން އޮތް ބަހަނާއެއް ނޫން ކަމަށާއި އަހަރުމެންގެ ވާޖިބަކީ ދީނަށް ހިދުމަތް ކުރުން ކަމަށް ބުންޏެވެ.

ހުތުބާގައި ބުނީ:

"މުސްލިމް އަހުންނޭވޭ. އަހަރުމެންގެ ނަފްސުތަކުގައި އިސްލާމްގެ ޗާޓު އޮތީ ކިހާ ބޮޑުކޮށް ހެއްޔެވެ؟ ދީނަށްޓަކައި އަހަރުމެން ކުރަނީ ކިހާ ހޭދައެއް ހެއްޔެވެ؟ ދީނަށްޓަކައި އަހަރުމެން ކުރަނީ ކިހާ މަސައްކަތެއް ހެއްޔެވެ؟،" ހުތުބާގައި ބުންޏެވެ.

"ދީނާމެދު އަހަރުމެން ވިސްނަނީ ކިހާ ވަރަކަށް ހެއްޔެވެ؟ ދީނުގެ މައްސަލަތަކަކީ އަހަރުމެންގެ ހަޔާތުގައި ކިހާވަރެއްގެ އިސްކަމެއް ދީފައިވާ މައްސަލައެއް ހެއްޔެވެ؟" 

ދެން އެ ހުތުބާގައި ކިޔައިދިނީ، ދީނަށްޓަކައި އަދާކުރަން ޖެހޭ ކަންކަމާއި ހަޔާތް އުފާވެރިކޮށްދޭނެ ވާހަކަތަކެވެ. އެއީ ޝަހީދެއްގެ ގޮތުގައި ނިމުން ލައްވާނެ ކަންކަންކަމުގައި ވެސް ބުންޏެވެ.

އޭގެ ތެރެއިން ބައެއް ކަންތައްތަކަކީ:

"މުސްލިމް އަހުންނޭވޭ. ދީނަށް ހިދުމަތް ކުރުމުން ކަންބޮޑުވުމާއި ހާސްކަމާއި ފިކުރުތަކުން ދުރަށް ދާނެ އެވެ. އެއީ ހާޖަތްތައް ފުއްދަވައި ދެއްވާ، މޮޅިވެރިކަން ފިއްލަވައިދެއްވާނެ އަމަލެކެވެ،" ހުތުބާގައި ބުންޏެވެ.

"މި ހިނދުން ފެށިގެން ތިޔަބައި މީހުން ދީނަށް ހިދުމަތް ކުރަން ފަށާށެވެ. އެކަމުން ތިބާގެ ނަން ދިރުވާށެވެ. ދަރަޖަ މަތިވެރި ކުރާށެވެ. ފަހެ ހެޔޮ ބަހެއް ބުނުމަކީ ވެސް ސަދަގާތެކެވެ."