އެމްއާރުއެމް އުވާލަން އީސީން އަނެއްކާވެސް ނިންމައިފި

ކުރީގެ ރައީސް މައުމޫން އަބްދުލްގައްޔޫމް އިސްވެ ހުންނަވައި އުފެއްދެވި މޯލްޑިވްސް ރިފޯމް މޫވްމަންޓް (އެމްއާރުއެމް) އުވާލަން އިލެކްޝަންސް ކޮމިޝަން (އީސީ) އިން އަނެއްކާވެސް މިއަދު ނިންމައިފި އެވެ.

ވީ ކިހިނެއް؟ - ގާނޫނުގައި ލާޒިމުކުރާ 3،000 މެންބަރުން ހަމަނުވާ ކަމަށް ބުނެ އެ ޕާޓީ އުވާލަން މިދިޔަ އަހަރުގެ މެއި މަހުގެ ތެރޭގައި ވެސް އީސީން ނިންމި އެވެ. އެއާ އެކު:

ތަފްސީލް - އެމްއާރުއެމް އުވާލަން އީސީން ނިންމި ނިންމުން ބާތިލްކޮށް، ކޯޓުން އޭރު ހުކުމް ކުރީ ޝަރީއަތުގެ ހަރަދަށް ހިނގި 50،000ރ. ވެސް އެ ޕާޓީއަށް ދައްކާށެވެ.

އެމްއާރުއެމް އުވާލަން މިދިޔަ އަހަރު އީސީއިން ނިންމިއިރު، އެ ޕާޓީގައި ތިބީ 2،981 މެންބަރުންނެވެ. އެހެންކަމުން ގާނޫނުގައި ބުނާ އަދަދު ހަމަވާން މަދުވީ އެންމެ 21 މެންބަރުންނެވެ.

އޭގެ ފަހުން މިދިޔަ އަހަރުގެ ފެބުރުއަރީ މަހުގެ ތެރޭގައި އެމްއާރުއެމް އިން ބުނީ، އީސީން ބުނާ އަދަދަށް ފޯމު ހަމަކޮށް، އެ ކޮމިޝަނަށް ހުށަހަޅާފައިވާ ކަމަށެވެ. އެކަމަކު އީސީން މިއަދު އަނެއްކާވެސް ވަނީ، 3،000 މެންބަރުން ހަމަނުވާ ކަމަށް ބުނެ ޕާޓީ އުވާލަން ނިންމާފައިވާ ކަމަށް ބުނެފަ އެވެ.

ނަމަވެސް، އީސީން ފޯނަށް ޖަވާބުނުދޭތީ އޭގެ ތަފްސީލެއް ސާފުވާ ގޮތެއް ނުވި އެވެ.