އިމާރާތެއްގެ ނުވަ ވަނަ ބުރިން ވެއްޓުނު މީހަކު މަރުވެއްޖެ

މާލޭގެ އިމާރާތެއްގެ ނުވަ ވަނަ ބުރިން މިއަދު މީހަކު ވެއްޓި މަރުވެފައިވާ ކަމަށް ފުލުހުން ބުނެފި އެވެ.

ވީ ކިހިނެއް؟- ފުލުސް އޮފީހުން މިއަދު ބުނިގޮތުގައި ކަސްޓަމްސް ކައިރީގައި ހުންނަ އިމާރާތެއްގެ މަތިން "ވެއްޓި މީހަކު ނިޔާވި ހާދިސާ" ފުލުހުން އަންނަނީ ތަހުގީގު ކުރަމުންނެވެ.

އަދި ފުލުހުން ބުނީ "މި ދަނޑިވަޅުގައި އާއިލާގެ އިހުސާސްތަކަށް އިހުތިރާމުކޮށް، ނިޔާވި މީހާގެ ފޮޓޯ އާއި ހާދިސާގެ މަންޒަރުތައް މީސް މީޑިއާގެ ވަސީލަތްތަކުގައި ދައުރު ނުކުރުމަށް" ވެސް އިލްތިމާސް ކުރާ ކަމަށެވެ.

އެ މީހާ މަގުމައްޗަށް ވެއްޓިފައި އޮންނަ ވީޑިއޯއެއް ސޯޝަލް މީޑިއާގައި ދައުރުވަމުން ދާއިރު އެއިން ފެންނަ ގޮތުގައި އެއީ ޒުވާން އަންހެނެކެވެ. އަދި ފުލުހުން ވެސް ކަށަވަރުކޮށްދޭ ގޮތުގައި އެއީ 25 އަހަރުގެ އަންހެނެކެވެ.

'ދައުރު'އަށް އެނގިފައިވާ ގޮތުގައި އޭނާ ވެއްޓުނީ މ. ހަސޯވާ ބިލްޑިންގެ ނުވަ ވަނަ ބުރިންނެވެ.

އޭނާ ވެއްޓުނީ ކީއްވެގެން ކަމެއް އަދި ސާފެއްް ނުވެ އެވެ. ފުލުހުން އަންނަނީ މަސައްލަ ބަލަމުންނެވެ.

ސޯޝަލް މީޑިއާގައި ދައުރުވާ ވީޑިއޯ އިން ފެންނަނީ ބަޔަކު މީހަކު އެ މީހާ ނަގައިގެން، ޕިކަޕަކަށް ލައިގެން ހޮސްޕިޓަލަށް ގެންދާތަނެވެ.