ޖިހާދުގެ ހިޔާނާތުގެ ދައުވާ ކޯޓުން ބޭރުކޮށްލި ނިންމުން އިސްތިއުނާފް ކޮށްފި

ކ. ފުށިދިއްގަރު ފަޅު މައްސަލައިގައި ކުރީގެ ނައިބު ރައީސް އަބްދުﷲ ޖިހާދުގެ މައްޗަށް ކޮށްފައިވާ ހިޔާނާތުގެ ދައުވާ ކްރިމިނަލް ކޯޓުން ބޭރުކޮށްލި ނިންމުން ދައުލަތުން ހައި ކޯޓުގައި މިއަދު އިސްތިއުނާފު ކޮށްފި އެވެ.

މައްސަލައިގެ ފެށުން - ޖިހާދުގެ މައްޗަށް ދައުވާކޮށްފައިވަނީ ކުރީގެ ރައީސް މުހައްމަދު ވަހީދުގެ ވެރިކަމުގައި އޭރުގެ ފިނޭންސް މިނިސްޓަރުގެ މަގާމުގައި ހުންނެވި އިރު، ސްޕެޝަލް ޓޫރިސްޓް ޒޯނެއްގެ ގޮތުގައި ފުށިދިއްގަރު ފަޅު ތަރައްގީ ކުރުމަށް ސަރުކާރުގެ %50 ހިއްސާވާ ގޮތަށް ޖޮއިންޓް ވެންޗާ އެއްބަސްވުމެއް ހަދަން ވަޒީރުންގެ މަޖިލީހުން ނިންމާފައި ވަނިކޮށް، ދައުލަތުގެ %25 ހިއްސާ އޮންނަ ގޮތަށް ޖޮއިންޓް ވެންޗާ ކުންފުންޏެއް ހެދުމަށް ޕްރައިމް ކެޕިޓަލް މޯލްޑިވްސް ލިމިޓެޑާ އެކު އެއްބަސްވުމުގައި ސޮއިކުރެއްވި މައްސަލާގަ އެވެ. 

ވީ ކިހިނެއް؟ - މި މައްސަލާގައި ޖިހާދުގެ މައްޗަށްކުރި ރައްޔިތުންނަށް ނުވަތަ ދައުލަތަށް ފައިދާއެއް ލިބެން އޮތް ކަމެއްގައި އެ ނޫން ގޮތަކަށް އަމަލުކުރުމުގެ ދައުވާ ކްރިމިނަލް ކޯޓުން ބޭރުކޮށްލީ ޝަރީއަތުގެ ކުރިން ހުށަަހަޅާ ހުށަހެޅުމާ މެދު ނިންމި ނިންމުމުގަ އެވެ. އެ މައްސަލަ ބެލެން ނެތް ސަބަބެއް ކަމަށް ކޯޓުގެ ނިންމުމުގައި ވަނީ ޖިހާދުގެ މައްޗަށް އުފުލާފައިވާ ދައުވާގައި އުނިކަމެއް ހުރި ކަމަށް ބުރަވެވޭތީ ކަމަށެވެ.

ތަފްސީލް - ޕްރޮސެކިއުޓާ ޖެނަރަލް (ޕީޖީ) އޮފީހުން މިއަދު ބުނީ، ދަށު ކޯޓުގެ އެ ނިންމުން ހައި ކޯޓުގައި އިއްޔެ އިސްތިއުނާފް ކޮށްފައިވާ ކަމަށެވެ. ޕީޖީން ހައި ކޯޓުގައި އެދިފައިވަނީ އެ މައްސަލައަކީ މައުލޫއީ ގޮތުން ބަލައި ގޮތެއް ކަނޑައަޅަންޖެހޭ މައްސަލައެއްކަމަށް ކަނޑައަޅައި މައްސަލަ ބެލުމަށް ކްރިމިނަލް ކޯޓަށް އެންގުމަށެވެ.

އެ އިސްތިއުނާފް ބިނާކޮށްފައިވާ މައިގަނޑު ކަންކަމަކީ: 

އެނގުން މުހިންމު - ޖިހާދުގެ މައްސަލަ ދަށު ކޯޓުން ބޭރުކޮށްލުމުގައި ގާޒީ ބައްލަވާފައި ވަނީ ޖިހާދުގެ ފަރާތުން ހުށަހެޅި ޝަރީއަތުގެ ކުރިން ހުށަހަޅާ ހުށަހެޅުމުގައިވާ އެ މައްސަލާގައި ކޮރަޕްޝަނުގެ އަމަލެއް ނުހިމެނޭ ކަމަށް އެންޓި ކޮރަޕްޝަން ކޮމިޝަނުން ނިންމާފައި ވަނިކޮށް، ބަންޑާރަނައިބުގެ ސިޓީއަކާ ގުޅިގެން އަލުން އެސެޓް ރިކަވަރީ ކޮމިޝަނުން އެ މައްސަލަ ބަލަން ނިންމި ސަބަބު ޖިހާދަށް އަންގާފައި ނުވާ ކަމަށް ބުނެ ހުށަހެޅި ހުށަހެޅުމަށެވެ.

ދަށު ކޯޓުގެ ނިންމުމުގައި ބުނީ ޖިނާއީ މައްސަލައެއް ކޮންމެ މުއައްސަސާއަކުން ތަހުގީގުކުރި ނަމަވެސް އޭނާގެ މައްޗަށް ކުރެވޭ ތުހުމަތަކީ ކޮބައިކަން އަންގާ ގާނޫނީ އިންޒާރު ދޭން ޖެހޭނެ ކަމަށެވެ. އެހެން ނޫން ނަމަ، އަލުން ތަހުގީގުކޮށްފައިވާ މައްސަލަ ބަލާފައި ވަނީ އިންސާފުވެރިކަމާ އެކު އަދި ލިބިދޭން ޖެހޭ ހައްގުތަކަށް ރައްކާތެރި ކުރެވިގެން ކަމާ މެދު ސުވާލު އުފެދި މައްސަލައަށް އަސަރުކުރާނެ ކަމަށް ކޯޓުގެ ނިންމުމުގައިވެ އެވެ.