މިއަދުގެ ހުކުރު ހުތުބާ ލިޔުއްވި ހައްވާ ލަތީފް
މިއަދުގެ ހުކުރު ހުތުބާ ލިޔުނީ އަންހެން އިލްމުވެރިއެއް
މިއަދުގެ ހުކުރު ހުތުބާ ލިޔުއްވީ، އަންހެން ދީނީ އިލްމުވެރިއެއް ކަމަށާއި މިއީ ރާއްޖޭގެ ތާރީހުގައި ވެސް މިގޮތަށް އަންހެނަކު ހުތުބާ ލިޔުއްވި ފުރަތަމަ ފަހަރު ކަމަށް، އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ވީ ކިހިނެއް؟- މިއަދު ހުތުބާ ލިޔުއްވީ، ޝަހީމް ވިދާޅުވި ގޮތުގައި އެ މިނިސްޓްރީގެ ނައިބު ހައްވާ ލަތީފެވެ. އޭނާއަކީ ކުރިން، އިސްލާމިކް ޔުނިވަސިޓީގެ ޑެޕިއުޓީ ވައިސް ޗާންސެލަރެވެ.
މިއަދުގެ ހުތުބާގެ މައުލޫއަކީ އާއިލީ ގުޅުން ދެމެހެއްޓުމެވެ. ހުތުބާގައި މައިގަނޑު ގޮތެއްގައި ފާހަގަކޮށްފައިވަނީ:
-
ހަރުދަނާ މުޖުތަމައެއްގެ އަސާސަކީ އާއިލާކަން
-
މި ބިންގާ ވަރުގަދަވެގެން ނޫނީ މުޖުތަމައު ވަރުގަދަ ނުކުރެވޭނެކަން
-
އާއިލީ ޒިންމާގެ ތެރޭގައި މުޖުތަމައަށް ބޭނުންވާ ހުރިހާ ދާއިރާއަކުން މީހުން ބިނާކުރުމުގެ މުހިއްމުކަން
-
އާއިލީ ވެއްޓެއްގައި އުފާވެރިކަމާ އެކު ދިރިއުޅުމަކީ ކޮންމެ މީހަކަށް ވެސް ލިބިގެންވާ ހައްގެއްކަން
-
އާއިލީ ގުޅުންތައް ކަނޑާމީހުންނަށް ހުރި ބިރުވެރިކަން
މިއަދުގެ ހުތުބާގެ ތަރުޖަމާ އިސްލާމިކް މިނިސްޓްރީން ވަނީ، އެ މިނިސްޓްރީގައި ހުންނަ ޓީވީތަކުންނާއި އެ މިނިސްޓްރީގެ ފޭސްބުކް ޕޭޖުން ގެނެސްދީފަ އެވެ. އިނގިރޭސި ބަހުން ތަރުޖަމާ ގެނެސްދިނީ، ސަބްޓައިޓްލްސްގެ ގޮތުގަ އެވެ.
މިނިސްޓަރު ވިދާޅުވީ، ހުތުބާގައި ބުނާ ވާހަކަތައް ރާއްޖޭގައި އުޅޭ ބިދޭސީ މުސްލިމުންނަށް ވެސް އެނގުމަކީ މުހިންމުކަމެއް ކަމަށާއި އެހެންވެ، އިނގިރޭސި ބަހުގެ އިތުރުން ބަންގާޅު ބަހުން ވެސް ހުތުބާ ތަރުޖަމާ ކުރައްވާނެ ކަމަށެވެ.