ކުރީގެ ރައީސް ޔާމީން ޖަލު ހުކުމުން މިނިވަންވުމަށްފަހު ޕީއެންއެފް އިން ބޭއްވި ފުރަތަމަ ޖަލްސާގައި ޔާމީން ވާހަކަދައްކަވަނީ. (ދައުރު ފޮޓޯ/ އަބްދުﷲ އަނޫފް ޖުނައިދު)
ޔާމީނާ ދެކޮޅަށް ހުށަހެޅި އާ ހެކި ބަލައިގަންނަން ޕީޖީން ސުޕްރީމް ކޯޓުގައި އެދިއްޖެ
ވ. އާރަށް ކުއްޔަށްދިނުމުގެ މައްސަލާގައި ކުރީގެ ރައީސް އަބްދުﷲ ޔާމީންގެ މައްޗަށް ރިޝްވަތު ދިނުމާއި މަނީ ލޯންޑަރިންގެ ކުށް ސާބިތުވާކަމަށް ކްރިމިނަލް ކޯޓުން ކުރި ހުކުމް ބާތިލްކުރަން ހައި ކޯޓުން ނިންމި ނިންމުމުގެ ބައެއް ސުޕްރީމް ކޯޓުގައި އިސްތިއުނާފު ކޮށްފި އެވެ.
ފަސްމަންޒަރު - އާރަށް ކުއްޔަށް ދިން މައްސަލާގެ ޝަރީއަތުގައި، ޔާމީންގެ އެކައުންޓަށް ޖަމާވެފައިވާ ފައިސާ އަކީ އެ މައްސަލާގައި ޔާމީނަށް ރިޝްވަތު ދިން ކަމަށް ތުހުމަތުވާ ކުރީގެ މަޖިލިސް މެމްބަރު ޔޫސުފް ނައީމްއާ ދެމެދު ހިންގާފައިވާ ޑޮލަރު މާރު ކުރުމުގެ މުއާމަލާތެއްކަން ސާބިތުކުރުމަށް ދިފާއީ ހެކިތަކެއް ހުށަހެޅި އެވެ. އެއާ އެކު:
-
އެ ހެކިތައް ނަފީ ކުރަން ދައުލަތުގެ ފަރާތުން އެ މައްސަލާގައި އާ ހެކިތަކެއް ހުށަހެޅި
-
ދައުލަތުގެ ހުށަހެޅުންތައް ކްރިމިނަލް ކޯޓުން ވަނީ ބަލައިގެންފައި
ނަމަވެސް، ހައި ކޯޓުގައި އެ މައްސަލަ އިސްތިއުނާފު ކުރުމުން ހައި ކޯޓުން ނިންމީ، ކްރިމިނަލް ކޯޓުން ދައުލަތުގެ ފަރާތުން ހުށަހެޅި ހެކިތައް ބަލައިގެންފައިވަނީ ގޯސްކޮށް ކަމަށެވެ. އެހެންކަމުން، އެ ހެކިތަކަށް ރިއާޔަތް ނުކޮށް ޔާމީންގެ މައްސަލަ އަލުން ބަލަން ހައި ކޯޓުން ވަނީ ކްރިމިނަލް ކޯޓަށް އަންގާފަ އެވެ.
ވީ ކިހިނެއް؟ - ހައި ކޯޓުގެ ނިންމުމުގައި، ދައުލަތުގެ ފަރާތުން ހުށަހެޅި ހެކިތައް އެއްފަރާތްކުރުމަށް ނިންމާފައިވާ ބައި ސުޕްރީމް ކޯޓުގައި އިސްތިއުނާފުކުރަން ޕީޖީ އޮފީހުން ހުށަހެޅީ މިދިޔަ ބުދަ ދުވަހު އެވެ.
ތަފްސީލް - އެކަމާ ބެހޭ ގޮތުން ޕީޖީ އޮފީހުން މިއަދު ނެރުނު ބަޔާނެއްގައިވާ ގޮތުން:
-
ކްރިމިނަލް ކޯޓުން އަލުން ބަލަން އަންގާފައިވާ މި މައްސަލާގައި އެ ހެކިތައް ބަލައިގަތުމަށް ދަށު ކޯޓުން ނިންމި އިޖުރާއަތަކީ މައްސަލަ އަލުން ބަލައި ގޮތެއް ކަނޑައަޅާއިރު އިސްލާހު ކުރެވިދާނެ އިޖުރާއަތެއް
-
އެ ހެކިތައް އެއްފަރާތްކުރުމަށް ހައިކޯޓުން އެންގި އެންގުން، ސުޕްރީމް ކޯޓުން ކުރިން ނިންމާފައިވާ ނިންމުންތަކާ އަރާރުންވޭ
ޕީޖީ އޮފީހުން ސުޕްރީމް ކޯޓުގައި އެދިފައިވަނީ، އެ ހެކިތައް އެއްފަރާތް ކުރުމަށް ހައިކޯޓުން ނިންމި ނިންމުން ބާތިލުކޮށްދިނުމަށެވެ. އަދި މައްސަލައިގައި އަލުން ގޮތެއް ކަނޑައެޅުމުގައި:
-
ޖިނާއީ އިޖުރާއަތުގެ ގާނޫނުގެ 135 ވަނަ މާއްދާގެ ދަށުން ހުށަހެޅި ހެކިތަކާ ގުޅިގެން، ދިފާއުން ހުށަހެޅުމެއް އޮތްނަމަ ހުށަހެޅުމުގެ ފުރުސަތު ދިނުން
-
އެ ހެކިތަކާ ގުޅިގެން ދެފަރާތުން ޝަރީއަތުގައި ބަހުސްކުރުމުގެ ފުރުސަތު ދިނުން
-
އެ ހެކިތައް ބަލައިގަތުމާމެދު އަލުން ގޮތެއް ކަނޑައެޅުމަށް ދަށު ކޯޓަށް އަންގައިދިނުން
ސުޕްރީމް ކޯޓުގައި އިސްތިއުނާފުކޮށްފައި ވަނީ މައްސަލައިގެ ހެކިތަކާ ގުޅޭ ބައި އެކަންޏެވެ. މި އިސްތިއުނާފުގެ ސަބަބުން، މައްސަލަ އަލުން ބަލައި ގޮތެއް ކަނޑައެޅުމަށް ހައި ކޯޓުން ނިންމާފައިވާ ނިންމުމަށް ބަދަލެއް ނާންނާނެ ކަމަށް ޕީޖީން ބުންޏެވެ.
އެނގުން މުހިއްމު - އާރަށް ކުއްޔަށް ދިން މައްސަލާގައި ރިޝްވަތާއި މަނީ ލޯންޑަރިންގެ ކުށް ސާބިތުވެ ޔާމީންގެ މައްޗަށް 11 އަހަރުގެ ޖަލު ހުކުމެއް ކޮށްފައިވަނީ 2022ގެ ޑިސެމްބަރުގަ އެވެ. އެ ހުކުމް އިސްތިއުނާފުކުރަން ހައި ކޯޓަށް ހުށަހެޅީ މިދިޔަ އަހަރުގެ މާޗު މަހު އެވެ.
ދިގު ލައިގެން ދިޔަ ހައި ކޯޓުގެ އަޑު އެހުންތަކުގެ ސަބަބުން މިދިޔަ އަހަރުގެ ރިޔާސީ އިންތިހާބުގައި ވާދަކުރެއްވުމުގެ ފުރުސަތު ވެސް ޔާމީނަށް ގެއްލުނެވެ. ހައި ކޯޓުގެ އަޑުއެހުންތައް ނިމި ޔާމީން މިނިވަންވެފައިވަނީ މިދިޔަ 18 އޭޕްރިލްގަ އެވެ.
ކްރިމިނަލް ކޯޓުން އަލުން މި މައްސަލާގައި ގޮތެއް ނިންމުމާ އެކު 11 އަހަރުގެ ޖަލު ހުކުމުން ޔާމީން މިވަގުތަށް މިނިވަންވެވަޑައިގަތް ނަމަވެސް:
-
އެމްއެމްޕީއާރްސީ ހިޔާނާތުގެ ތެރޭގައި ހިމެނޭ ރ. ފުއްގިރި މައްސަލާގައި ޔާމީންގެ މައްޗަށް ކުރާ ޝަރީއަތްތަކެއް ކްރިމިނަލް ކޯޓުގައި އަދިވެސް އެބައޮތް
-
ފުއްގިރި މައްސަލާގައި ވެސް ޔާމީންގެ މައްޗަށް ޝަރީއަތް ކުރަނީ ރިޝްވަތާއި މަނީލޯންޑަރިންގެ ކުށުގެ ދައުވާ
-
މި އަޑުއެހުންތައް މަޑުޖެހިފައި އޮންނަތާ ގާތްގަނޑަކަށް އަހަރެއް ވެއްޖެ
ކޮމެންޓް (1)
ސިކުނޑި