21 ޖުލައި 2024: ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ 'ދައުރު'އަށް އިންޓަވިއުއެއް ދެއްވަނީ (ދައުރު ފޮޓޯ/އަބްދުﷲ އަނޫފު ޖުނައިދު)
ކަރަންޓު ބިލު ކުޑަކުރަން އަމިއްލައަށް ފިޔަވަޅު އެޅިދާނެ: ސްޓެލްކޯ
ކަރަންޓު ބިލު ބޮޑުވަނީ ސްޓެލްކޯގެ އިހުމާލުން ނޫން ކަމަށާއި ބިލު ކުޑަކުރަން ކަސްޓަމަރުންނަށް އަމިއްލަ އަށް ފިޔަވަޅު އެޅޭނެ ކަމަށް އެ ކުންފުނީގެ މެނޭޖިން ޑިރެކްޓަރު ހުސެން ފަހުމީ ވިދާޅުވެއްޖެ އެވެ.
ވީ ކިހިނެއް؟ - ފާއިތުވި ދެތިން މަހު ރާއްޖޭގެ ހުރިހާ ސަރަހައްދެއްގައި ވެސް ކަރަންޓު ބިލު ބޮޑުވެގެން އާއްމުން ޝަކުވާ ކުރި އެވެ. ރޯދަމަހާއި ހޫނުގަދަ ދުވަސްވަރާ އެކު ކަރަންޓު ބޭނުންކުރާ މިންވަރު އިތުރުވެފައިވާކަން ސްޓެލްކޯ އިން ވަނީ ފާހަގަކޮށްފަ އެވެ. ރޯދަމަހާއި އެއާ ޖެހިގެން އައި މަހަށް ސަރުކާރުން ވަނީ ކަރަންޓު ބިލުން ޑިސްކައުންޓު ވެސް ދީފަ އެވެ.
ތަފްސީލް - 'ދައުރު' އަށް އިއްޔެ ދެއްވި އިންޓަވިއުއެއްގައި ފަހުމީ ވިދާޅުވީ ކަރަންޓު ބިލު ބޮޑުވުމުގެ ހައްލަކަށް މިވަގުތު އޮތީ އިގްތިސޯދު ކުރުން ކަމަށެވެ.
ބުނީ ކީކޭ؟ - "ޖުމްލަ ގޮތެއްގައި ދިރިއުޅުމުގައި ހުރިހާ ކަމެއް މިހާރު ކުރަމުން މިދަނީ ކަރަންޓުން. އެހެންވީމާ ކަރަންޓު ބިލު ކުޑަ ކުރުމަށް ކުރެވޭނެ އެއް ކަމަކީ ހަމަ އިގްތިސޯދު ކުރުން،" ފަހުމީ ވިދާޅުވި އެވެ.
އޭނާ ވިދާޅުވީ އިއާދަކުރަނިވި ހަކަތައަށް ދިޔަ ނަމަވެސް، އެއީ ބޮޑު އިންވެސްޓުމެންޓަކަށްވާތީ، ކުރު މުއްދަތެއްގައި އޭގެ އެންމެ އެދެވޭ ހެޔޮ ބަދަލު ނުފެނިދާނެ ކަމަށާއި، އިންވެސްޓުމެންޓު ރިކަވަރީ ފަދަ ހުރިހާ ކަމަކަށް ބަލާއިރު، ކަރަންޓު ބިލު ބޮޑުވުމުގެ މައްސަލަ ހައްލުވާން އޮތް ގޮތަކީ އިގްތިސޯދު ކުރުން ކަމަށެވެ.
"އެބަ ބަލަން ޖެހޭ ގެ ހެދިފައި ހުރި ގޮތް ވެސް. ގޭގެ އިންސިއުލޭޝަން ހުރިތޯ އާއި، ހާއްސަކޮށް އޭސީގެ އައުޓްޑޯ ޔުނިޓު ހުންނަ ގޮތް. އައުޓްޑޯ ޔުނިޓުގެ ފިނިހޫނުމިން ހުންނަނީ ކިހިނެއްތޯ،" ފަހުމީ ވިދާޅުވި އެވެ.
'ހިޔާ ފްލެޓްތަކުގެ ކަރަންޓު ބިލު މާ ބޮޑު'
އޭސީ އައުޓްޑޯ ޔުނިޓްތައް ހުންނަ ގޮތުން ކަރަންޓު ބިލު ބޮޑުވުމުގެ އެއް މިސާލެއްގެ ގޮތުގައި ފަހުމީ ދެއްކެވީ ހުޅުމާލޭ ހިޔާ ފްލެޓުތަކެވެ.
"ހުޅުމާލޭގެ ހިޔާ ފްލެޓުތަކުގެ އައުޓްޑޯ ޔުނިޓު ހަރުކޮށްފައި ހުންނަ ތަނުގައި އެބަ ހުރޭ 50 ޑިގްރީ އަށް ވުރެ މަތީން ހޫނުމިން. އެއީ ވަރަށް ކުޑަ ތަންކޮޅެއްގައި މި އިންނަނީ ވަރަށް ގިނަ އޭސީތައް ހަރުކޮށްފައި. އަވަނެއްގެ ހޫނުމިން ހުންނަ ތަނެއްގައި އޭސީ އައުޓްޑޯ ބެހެއްޓީމާ ދެން އެ އިންނާނީ ޖެެހިޖެހި. އަޅުގަނޑުމެންނަށް ފާހަގަ ކުރެވޭ ހިޔާ ފްލެޓުތަކުގައި ކަރަންޓު ބިލު ބޮޑުކަން،" އޭނާ ވިދާޅުވި އެވެ.
ފަހުމީ ވިދާޅުވީ އެއީ ސްޓެލްކޯއަށް ހައްލެއް ހޯދައިދެވޭނެ ކަމެއް ނޫން ކަމަށެވެ.
"ހަގީގަތުގައި ވެސްް ހިޔާ ފްލެޓުތަކުގައި ކަރަންޓު ބިލު މާ ބޮޑު. ތަޖުރިބާކުރެވުނު އެއް ކަމަކީ، ބައެއް ފްލެޓުތަކުން އެބަހުރި އައުޓްޑޯ ޔުނިޓުތައް ރީލޮކޭޓުކޮށްފައި. އެ ފްލެޓުތަކުގެ ކަރަންޓު ބިލު ކުޑަ،" އޭނާ ވިދާޅުވި އެވެ.
ކޮމެންޓް (4)
ބެއްޔާގެ ދަރި
މީހުފަ
ސުނާރު
ލަޕޯ