އެމްޑީޕީން މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ޗެއާޕާސަން ފައްޔާޒު އިސްމާއިލް (ވ) ވާހަކަ ދައްކަވަނީ (ދައުރު ފޮޓޯ/އަޒްމީ އަހުމަދު)
މަދު ބަޔަކު ވޯޓުލީ އިންތިހާބުގެ ނަތީޖާއާ މެދު މާޔޫސްވާން ޖެހޭ ސަބަބެއް ނެތް: ފައްޔާޒު
އިއްޔެ ބޭއްވި ލޯކަލް ކައުންސިލް ބައި-އިލެކްޝަންތަކުގައި ވޯޓުލާން ނުކުތީ މަދު ބަޔަކު ކަމަށާއި ނަތީޖާއާ މެދު މާޔޫސްވާން ޖެހޭ ސަބަބެއް ނެތް ކަމަށް، އެންމެ ގޮނޑިއެއް ވެސް ކާމިޔާބު ނުކުރެވުނު އިދިކޮޅު މައި ޕާޓީ އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ.
ވީ ކިހިނެއް؟ - މާލެ ސިޓީ ކައުންސިލްގެ ތިން ގޮނޑިއެއް ހިމެނޭ ހަ ބައި-އިލެކްޝަންގެ ތެރެއިން ފަސް ގޮނޑިއަކަށް އެމްޑީޕީން ވާދަ ކުރި އެވެ.ހަ ބައި-އިލެކްޝަން ވެސް ކާމިޔާބުކުރީ ވެރިކަންކުރާ ޕީއެންސީންނެވެ.
އެމްޑީޕީގެ މި ނާކާމިޔާބީއާ ގުޅިގެން، ފައްޔާޒު ހިމެނޭ ގޮތަށް ޕާޓީގެ ލީޑާޝިޕަށް ފާޑުކިޔުން އަމާޒުވެފައިވަނިކޮށް އޭނާ ވަނީ ރޭ އެކްސްގައި ޕޯސްޓެއް ކުރައްވާފަ އެވެ.
ބުނީ ކީކޭ؟ - "މަދު އަދަދެއްގެ ބަޔަކު ވޯޓުލީ އިންތިހާބުގެ ނަތީޖާ ނުކުތް ގޮތަކާމެދު މާޔޫސްވާންވީ ސަބަބެއް ނެތް. ޕާޓީގެ ހިންގުން ހަރުދަނާކުރުމަށް މިހާރު މިކުރެވޭ މަސައްކަތްތަކުގެ ތެރެއިން އިރާދަކުރެއްވިއްޔާ މި ޕާޓީއަށް ކުރިއަށް އޮތީ ކާމިޔާބު ދުވަސްތަކެއް،" ފައްޔާޒު ވިދާޅުވި އެވެ.
އެއާއެކު އެމްޑީޕީގެ ކެންޑިޑޭޓުން ކުރި ހިތްވަރާއި މަސައްކަތަށް އޭނާ ޝުކުރު އަދާ ކުރެއްވި އެވެ.
ކައުންސިލް ބައިއިލެކްޝަންތަކުގައި ވާދަކުރި މިޕާޓީގެ ކެންޑިޑޭޓުން ކުރެއްވި ހިތްވަރާއި މަސައްކަތަށް ވަރަށް ބޮޑަށް ޝުކުރު ދަންނަވަން. މަދު އަދަދެއްގެ ބަޔަކު ވޯޓުލީ އިންތިހާބުގެ ނަތީޖާ ނުކުތް ގޮތަކާމެދު މާޔޫސްވާންވީ ސަބަބެއް ނެތް. ޕާޓީގެ ހިންގުން ހަރުދަނާކުރުމަށް މިހާރު މިކުރެވޭ…
— Fayyaz Ismail (@faya_i) July 20, 2024
އެނގުން މުހިއްމު - އިއްޔެގެ ބައި-އިލެކްޝަންތަކުގައި ވޯޓު ދިނުމުގެ ހައްގު އޮތް 13،000އެއްހާ މީހުންގެ ތެރެއިން ވޯޓުލާން ނުކުތީ 3،260 މީހުންނެވެ. އެ އަދަދު މަދީ މާލެއިން ވޯޓުލާން ދިޔަ މީހުން މަދުވުމުންނެވެ. މާލޭގެ ބައެއް ދާއިރާތަކުގައި ވޯޓު ލާން ދިޔައީ އެންމެ %15 އެވެ. ނަމަވެސް ރަށްރަށުގެ ބައި-އިލެކްޝަންތަކުގައި ވޯޓުލާން ނުކުތް މީހުން ނިސްބަތުން ގިނަ އެވެ.
އެގޮތުން:
-
ޕީއެންސީން ކާމިޔާބު ކުރި ކުޅުދުއްފުށި ސިޓީ ކައުސިލްގެ ކުޅުދުއްފުށި އުތުރު ދާއިރާގެ އިންތިހާބުގައި %61 މީހުން ވޯޓުލާން ނުކުތް
-
އަމިއްލަ ކެންޑިޑޭޓަކު ކުރި ރ. ރަސްމާދޫ ކައުންސިލްގެ އަންހެން މެންބަރުގެ އިންތިހާބުގައި %74 މީހުން ވޯޓުލާން ނުކުތް
-
ޕީއެންސީން ކާމިޔާބު ކުރި ފ. ބިލެއްދޫ ކައުންސިލްގެ ރައީސްގެ އިންތިހާބުގައި %83 މީހުން ވޯޓުލާން ނުކުތް
މިއަދު ކުރިއަށްގެންދިޔަ ލޯކަލް ކައުންސިލްތަކުގެ ބައި-އިލެކްޝަނުގެ ވަގުތީ ނަތީޖާ pic.twitter.com/HL6hCGPvCG
— Elections Commission (@ElectionsMv) July 20, 2024
ކޮމެންޓް (2)
ރެމީ
ފަޔާ އަށް ސަލާމް