މިއީ ބަތާ ގަރުދިޔަ ކައިގެން އާދައިގެ ދިރިއުޅުމަކަށް ދިވެހިން ތިރިވެލަންވީ ވަގުތު: އަލީ އާރިފް

އިގްތިސޯދީ ގޮތުން މިއީ ދަތި ދުވަސްކޮޅެއް ކަމަށާއި ރާއްޖެ ބަނގުރޫޓު ނުވިޔަސް ހަރަދު ކުޑަކުރުމަށް ފިޔަވަޅުތައް އަޅައި ބޭރުން ކާކެއުން މަދުކޮށް ގޭގައި ކައްކައިގެން ކެއުން ހަމަޖައްސަން މިދުވަސްކޮޅު ވިސްނަން ޖެހޭ ކަމަށް ރައީސް އޮފީހުގެ މިނިސްޓަރު އަލީ އާރިފް ވިދާޅުވެއްޖެ އެވެ.

ވީ ކިހިނެއް؟ - ޕީއެންސީ ހަރުގޭގައި ރޭ ބޭއްވި ޖަލްސާގައި ވާހަކަ ދައްކަވަމުން އާރިފް ވިދާޅުވީ އިގްތިސާދު މިހާރު އޮތް ހާލަތުން ހަރަދު ކުޑަކުރުމުގެ ފިޔަވަޅުތައް އަޅަން އެބަ ޖެހޭ ކަމަށެވެ.

ތަފްސީލް - އިގްތިސާދީ ހާލަތު އޮތް ގޮތުން ހަރަދު ކުޑަކުރުމަށް ރައީސް މުހައްމަދު މުއިއްޒު އަޅުއްވާފައިވާ ފިޔަވަޅުތަކަށް ތައުރީފު ކުރައްވާ އޭނާ ވިދާޅުވީ އިހުލާސްތެރި ވެރިކަން ކުރާނީ އުނދަގުލަސް، ދައްޗަސް އަޅަން ޖެހޭ ފިޔަވަޅު އަޅައިގެން ކަމަށެވެ.

"މީހަކު ބައްޔެއްވީމާ އެއަށް ޝިފާ އޮތީ ހިތި ބޭހެއް ބޮއިގެން ކަމަށް ވަންޏާ އެ ހިތި ބޭސް ބޯން އެބަ ޖެހޭ، އެއީ މަޖުބޫރު ކަމެއް،" އޭނާ ވިިދާޅުވި އެވެ.

ނަމަވެސް މުސްތަގުބަލު ފެންނަނީ ފާގަތިކޮށް ކަމަށް އޭނާ ފާހަގަކުރެއްވި އެވެ. ރައީސްގެ ހަރަދު ކުޑަކުރުމުގެ ސިޔާސަތަށް އެއްބާރުލުން ދިނުމަށް އާންމުން ވެސް ގަރުދިޔަ އާއި ބަތް ކާލައިގެން އުޅޭ ތަންކޮޅެއް އާދައިގެ ދިރިއުޅުމަކަށް ތިރިވެލަން ޖެހޭ ކަމަށް އާރިފް ވިދާޅުވި އެވެ.

"މިދުވަސްކޮޅު މިޖެހެނީ އަޅުގަނޑުމެން އަބަދު ޓޭކްއަވޭ ހަދައިގެން ގޭގައި އަޅުގަނޑުމެން ކޭ ކެއުން ހުއްޓާލާފައި ކޮންމެވެސް ވަރަކަށް ގޭތެރޭ އަމިއްލައަށް ކައްކައިގެން ގަރުދިޔަ އާއި ބަތާ ކައްކައިގެން ކާލައިގެން ތަންކޮޅެއް އާދައިގެ ދިރިއުޅުމަކަށް ތިރިވެލަން،" އަލީ އާރިފް ވިދާޅުވި އެވެ.

ސަރުކާރުން ރައްޔިތުންނަށް ދޭ އެއްވެސް ހިދުމަތެއް އަދި އިނާޔަތެއް ކަނޑާނުލާ ކަމަށާއި ހަމައެކަނި ހަފްލާތަކާއި ޖަލްސާތަކަށް ކުރާ ހަރަދު ކުޑަކުރަން ސަރުކާރުން ނިންމީ ކަމަށް އޭނާ ވިދާޅުވި އެވެ.

"ވަރަށް ކުޑަ ގޮތަކަށް އެކަން ނިންމާލަނީ،" ހަރަދު ކުޑަކުރަން އެޅި ފިޔަވަޅުތަކާ އެކު ރައްޔިތުންނަށް މާ ބޮޑު އަސަރެއް ނުކުރާނެކަން އަލީ އާރިފް ފާހަގަކުރެއްވި އެވެ.

ފާހަގަކުރެވޭ - ހަރަދު ކުޑަކުރުމުގެ ފިޔަވަޅުތައް އެޅުމަށް ސިޔާސީ މަގާމުތައް މަދުކޮށް، ކުރިއަށް އޮތް މިނިވަން ދުވަހާއި އެފަދަ އެހެން ހަފްލާތައް ވެސް ނުބާއްވަން ރައީސް މުހައްމަދު މުއިއްޒު ވަނީ ނިންމަވައިފަ އެވެ.