އެމްޑީޕީގެ ރިޔާސީ ކެމްޕެއިންގެ ހަރަކާތެއްގައި ހިސާން ވާހަކަ ދައްކަވަނީ: ޕާޓީގެ ނައިބު ރައީސްގެ މަގާމަށް އޭނާ އައްޔަން ކުރުމަށް ގައުމީ މަޖިލީހަށް ވަނީ ހުށަހަޅާފައި (ފައިލް ފޮޓޯ/ އެމްޑީޕީ)
އެމްޑީޕީގެ ނައިބު ރައީސަކަށް ހިސާން އައްޔަން ކުރަން ރުހުން އޮތްތޯ ބަލަން ހުށަހަޅައިފި
އިދިކޮޅު މައި ޕާޓީ، އެމްޑީޕީގެ ނައިބު ރައީސްގެ މަގާމަށް ޖުޑީޝަލް ސާވިސް ކޮމިޝަން(ޖޭއެސްސީ)ގެ ކުރީގެ ރައީސް ހިސާން ހުސައިން އައްޔަން ކުރުމަށްޓަކައި ގައުމީ މަޖިލީހުގެ ރުހުން ހޯދުމަށް އެޕާޓީގެ ރައީސް އަބްދުﷲ ޝާހިދު ހުށަހަޅުއްވައިފި އެވެ.
އެނގުންމު - އެމްޑީޕީން އޮގަސްޓު 2022ގައި ބޭއްވި އެޕާޓީގެ ކޮންގްރެސްއިން ޕާޓީގެ އަސާސީ ގަވައިދަށް ގެނެސްފައިވާ އިސްލާހާ އެކު، ނައިބު ރައީސްގެ މަގާމަކީ ކުރިމަތިލާން ހުޅުވާލައިގެން އިންތިހާބު ކުރާ މަގާމެއް ނޫނެނެވެ. އެގޮތުން:
-
އިސްލާހުކޮށްފައިވާ އަސާސީ ގަވައިދުގެ 64 ވަނަ މާއްދާގައިވާ ގޮތުން ނައިބު ރައީސްގެ މަގާމަކީ ޕާޓީގެ ރައީސްއަށް އެހީތެރިވުމުގެ ގޮތުން އެނާ ހަމަޖައްސަވާ ބޭފުޅަކު އައްޔަން ކުރާ މަގާމެއް؛ ނަމަވެސް އެކަން ކުރަން ޖެހެނީ ގައުމީ މަޖިލީހުގެ ރުހުމާ އެކު
-
އެ މަގާމަށް ޕާޓީގެ ރައީސް ހުށަހަޅާ ނަމަކަށް ގައުމީ މަޖިލީހުގެ ރުހުން ނުލިބިއްޖެ ނަމަ، އިތުރު ފަރާތެއްގެ ނަން ހުށަހަޅަން ޖެހޭ
ވީ ކިހިނެއް؟ - މިދިޔަ ފެބްރުއަރީ މަހު އެމްޑީޕީގެ ރައީސް ކަމުގެ މަގާމަށް ޝާހިދު ވަޑައިގެންނެވި އިރު، ނައިބު ރައީސްގެ މަގާމު އޮތީ ހުސްކޮށެވެ. ކުރިން އެ މަގާމުގައި ހުންނެވީ ޑިމޮކްރެޓްސްގެ މިހާރުގެ ނައިބު ރައީސް މުހައްމަދު ޝިފާޒެވެ.
ތަފްސީލު - ޝާހިދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، އަސާސީ ގަވައިދުގައިވާ ގޮތުގެ މަތިން ހިސާން ޕާޓީގެ ނައިބު ރައީސް ކަމަށް އައްޔަން ކުރުމަށް ގައުމީ މަޖިލީހުގެ ރުހުން އޮތްތޯ ބެލުމަށް މިއަދު އޭނާ ހުށަހަޅުއްވާ ކަމަށެވެ.
"އަލްއުސްތާޒާ ހިސާން ހުސެއިން މިޕާޓީއަށާއި، ޕާޓީގެ މެމްބަރުންނަށް ކޮށްދެއްވާފައިވާ އިހްލާސްތެރި ގިނަގުނަ ހިދުމަތްތަކަށް ބަލާ އިރު، އެކަމަނާއަކީ މި މަގާމަށް އެންމެ އެކަށީގެންވާ ބޭފުޅެއް ކަމަށް އަޅުގަނޑު ދެކެމެވެ،" ކުރީގެ ތުޅާދޫ ދާއިރާގެ މަޖިލިސް މެންބަރާ ގުޅޭ ގޮތުން ޝާހިދު ވިދާޅުވި އެވެ.
އެމްޑީޕީގެ ލީގަލް ޑިރެކްޓަރުގެ މަގާމުވެސް ފުރުއްވަމުން ގެންދަވާ ހިސާން އެ މަގާމަށް ހަމަޖެއްސުމަށްޓަކައި ގައުމީ މަޖިލީހަށް ހުށަހަޅަން ނިންމީ، ޝާހިދު ވިދާޅުވި ގޮތުގައި ޕާޓީގެ ލީޑާޝިޕްގައި މިވަގުތު އަންހެން ބޭފުޅުން މަދުކަމުން އެކަމަށް ވެސް ރިއާޔަތްކުރުމަށް ފަހު އެވެ.
I am grateful for the nomination by @MDPSecretariat Raees @abdulla_shahid. It is with deep honor that I accept this nomination, and I pledge to continue serving the Party with sincerity and unwavering dedication. I kindly ask for the approval and support of all members of MDP… https://t.co/FLpV1tRAev
— Hisaan 🎈؟ (@hisaanhussain) July 8, 2024
ގުޅުން ހުރި - ހިސާން މިއަދު އެކްސްގައި ކުރެއްވި ޕޯސްޓެއްގައި، އެމްޑީޕީގެ ނައިބު ރައީސްގެ މަގާމަށް އޭނާގެ ނަން، ޝާހިދު ނޮމިނޭޓްކޮށްދެއްވުން އެކަން ގަބޫލުކުރެއްވި ކަމަށް ލިއުއްވާފައިވެ އެވެ.
"އަޅުގަނޑު މި ނޮމިނޭޝަން މި ގަބޫލުކުރަނީ ވަރަށް އިހްލާސްތެރިކަމާ އެކު އަދި ޕާޓީއަށް ހިދުމަތް ކުރުމުގައި ސާބިތުކަމާއި އަމާނާތްތެރިކަމާ އެކު ދެމި ހުންނަވާނެ ކަމަށް ވައުދުވަން،" ހިސާން ވިދާޅުވި އެވެ.
އެއާއެކު ހިސާން ވަނީ އެ ޕޯސްޓުގައި ގައުމީ މަޖިލިސް މެންބަރުންގެ ތާއީދަށް ވެސް އެދިވަޑައިގެންފަ އެވެ.